كل المعلومات التى يحتاجها الطلاب الجدد عن كلية تجارة عين شمس
-اول حاجة بالنسبة لادبي فالتنسيق نزل ومفيش مرحلة تانية خلاص...التنسيق نزل انتساب من ( ٢٧٤) وانتظام من (٢٩٢)...بالنسبة لعلمي بقا فالتنسيق لسة متحددش ولكن من المتوقع دايما انه بيبقى قريب من ادبي الى حد ما
-نيجي بقا للكلية نفسها والاسئلة المنتشرة زي:
-اي الفرق بين انتساب وانتظام؟
-الفرق بسيط جدا اولا انتساب مواعيدها غالبا بتبقى مسائية يعني من الضهر للمغرب مثلا وانتظام مواعيدها بتبقى من ٨ الى ٢...الفرق التاني بيكون في المصاريف انتساب بتبقى اغلى ٤٠٠ جنيه على اقصى تقدير...ومفيش اي فرق تاني.
-ممكن احول من انتساب لانتظام عادي؟
-اة عادي بس تبقى جايب جيد فيما فوق ومتكونش شايل مادة
-اي نظام الحضور والغياب؟
-مفيش حضور وغياب الدرجة لكل مادة من ٢٠ وبتبقى متوقفة على امتحانك في نص سنة او اخر السنة بس ومفيش ميدتيرم
-معاد التقديم امتى؟
-التقديم هيفتح يوم ١٢ الشهر الجي
-طاب بالنسبة لانجلش اي الشروط؟
-اول حاجة تكون انتظام مش انتساب عشان انتساب مينفعش انجلش لكن ينفع كريديت عربي بس....
-تاني حاجة تكون جايب فوق ال ٣٢.٥ في الانجلش ودي اول مرة تحصل السنادي كان دايما من ٤٠
اي الورق المطلوب لتقديم؟
- شهادة الثانوية العامة(الأصل ودي بتجييها من المدرسة) بتاعتك (ومعاها صورتين)
-شهادة ميلاد (أصل) ومعاها صورتين برضوا
- ٦ صور ٤*٦
- اطبع بطاقة الترشيح ومعاها صورتين برضوا
- صورتين من البطاقة الشخصية بتاعتك
- وتعمل تحليل فيروس سي بتاع حملة ١٠٠ مليون صحة من مستشفى الدمرداش...لو عاملها قبل كدة ومعاك التحليل تمام عادي مش لازم مستشفى الدمرداش
- للولاد بس : تروح مكتب التجنيد تجيب بطاقة ٢ جند
ملاحظة صغيرة بس: لو ورقة واحدة ناقصة من الكلام دة ملفك مش هيتاخد وهترجع تكمل الورق دة تاني وترجع يوم تاني وتقف في طابور بالساعات تاني...فاعمل الي مكتوب بالظبط.
اي الاقسام الموجودة في الكلية؟
موجود في كليتنا ٤ أقسام بشروط مختلفة وهما:
-عربي
-كريديت عربي
-إنجلش
-كريديت إنجلش
اي الفرق بين كل قسم وقسم؟
اولاً: الفرق بين عربي عادي وكريديت عربي!
الفرق ان عربي عددها بيبقى كبير جدا ممكن توصل ل ١٠٠٠ واحد في المدرج الواحد وكمان مفيهاش اعمال سنة ولا ميد تيرم...كرديت عربي بقا مختلفة شوية...من ناحية العدد فالسيكشن الواحد مش بيعدي ٨٠ طالب بس وطبعا مكيف... وبيبقى بنظام ساعات معتمدة يعني ممكن لو رسبت في مادة او جبت درجة مش عاجباك في مادة معينة ف ليك الحق تدخل سمر كورس وتمتحن تاني وتعدل درجاتك....طبعا فيه غياب وحضور....غير كدة الكلية كل سنة بتديك كورسات إنجلش وكمبيوتر وكمان بتنزلك تدريب في الصيف....دة غير كمان أن كريديت فيها تخصصات اكتر
ثانيا بقا: الفرق بين تجارة إنجلش عادي وإنجلش كريديت؟
الفرق بيبقى في العدد برضوا كريديت بتبقى اقل شوية...+ نفس الكلام الي الفوق + انك بتختار الدكاترة الي يدرسولك
مصاريف الكلية قد اي؟
عربي عادي ليها نوعين:
- انتظام ودي بتبقى في حدود (١٣٠٠) شاملة المصاريف وال Cd
- انتساب ودي بتبقى في حدود (١٦٠٠) وبرضوا شاملة كل حاجة
عربي كريديت: في حدود ١٠٠٠٠
إنجلش: السنادي هتبقى في حدود ١٨٠٠٠:٢٠٠٠٠
كريديت إنجلش ودي في حدود ٣٣٠٠٠:٣٧٠٠٠
شاهد ايضا:
- تعديل شروط القبول بكلية تجارة إنجليزي جامعة عين شمس
- تنسيق كلية التكنولوجيا الحيوية والعلوم الصحية بالجامعات الخاصة والأهلية 2021 / 2022
- تنسيق كلية التربية بالجامعات الخاصة والأهلية
- تنسيق الجامعات الخاصة والأهلية 2021
