كيفية الكشف في المعجم في خطوة واحدة
الطريقة دي هي إنك بتجيب الفعل الماضي المكون من ٣ حروف لأي كلمة حضرتك عايز تكشف عنها.
وفي بعض الطلبة المتميزة بتعرف تجيب التلات حروف بمجرد النظر للكلمة.
وال ٣ حروف دول بتجيبهم بشعورك الداخلي كدا.
بمعنى إنك بتبص للكلمة بتعرف حروفها الأصلية اللي هما يعتبروا وتد الكلمة والأساس بتاعها.
وباقي الحروف اللي فيها زيادة. والزيادة دي بتحصل لأسباب أخرى تتعلق بالمعنى، بس دا مش موضوعنا.
#فمثلا:-
كيف نكشف عن كلمة( مخلصين ) ؟!
حضرتك هتجيب الفعل الماضي المكون من ٣ حروف ودا هتجيبه بالسينس بتاعتك.
فهنكشف عن كلمة المخلصين في ( خَلُصَ)
وبطريقة تانية وهي طريقة الميزان الصرفي.
نوزن كلمة
#المخلصين في ( المفعلين)
وهناخد ال ٣ حروف اللي مقابلين لحروف كلمة ( فعل)
وهما ( خ ل ص) بردو
#مثال٢كيف تكشف في المعجم عن كلمة ( سباحة)؟!
بردو هتجيب الفعل الماضي المكون من ٣ حروف وهو ( سبح)
فهكشف عنها في( س ب ح)
#ملحظ_مهملكن خلي بالك من حاجة إن المعجم مفهوش حرف الألف.
فلو حضرتك جبت من الكلمة الفعل الماضي المكون من ٣ حروف ولقيت في الوسط ألف أو في الآخر
يبقى لازم ترجع الألف دي لأصلها.
#وأصلها بيكون( واو أو ياء)
#سؤال: نجيب الأصل إزاي يا مستر محمد؟!
#أقولك عن طريق الفعل المضارع. ولو الألف لسه موجودة هتجيب المصدر اللي هو المفعول المطلق. زي ضرب ضربًا وشرح شرحًا.
وتعالى نشوف مثال.
#مثال٣ كيف تكشف في المعجم عن كلمة( الفائز)؟!
هتعمل ايه؟! زي ما احنا متعودين
هتجيب الفعل الماضي المكون من ٣ حروف وهو
( فاز )
بس كلمة( فاز ) في نصها ألف يبقى هنعمل إيه يا ترى؟!
يبقى زي ما قلتلك فوق، هجيب الفعل المضارع عشان أجيب أصل الألف
يفوز
يبقى أصل الألف كان واو، فهكشف عن فائز في ( ف و ز )
#مثال٤كيف تكشف ف المعجم عن كلمة ( الحماية)؟
هجيب الفعل الماضي المكون من ٣ حروف ( حمى)
بس خلي بالك في ألف في الآخر.
هتقولي يا مستر بس دي مكتوبة ياء
هقولك هي مكتوبة ياء لكنها في النطق ألف فتبقى ألف ودي حاجة خاصة بقواعد الإملاء.
المهم هنرجع الألف لأصلها من خلال الفعل المضارع فهتبقى كدا
يحمي
فهكشف عنها في( ح م ي )
#مثال٥ كيف تكشف في المعجم عن كلمة( اهتمام)
هتجيب الماضي المكون من ٣ حروف وهو ( همَّ)
هتقولي يا مستر بس دول حرفين
هقولك فك التضعيف لان دول اتنين ميم مش ميم واحدة.
فهكشف عنها في ( همم)
#مثال٦ كيف تكشف في المعجم عن كلمة ( يخافون)؟
هتجيب الماضي المكون من ٣ حروف ( خاف )
هجيب أصل الألف من المضارع
( يخاف)
بس الألف لسه موجودة
يبقى هجيب المصدر( خوف ) فهكشف عنها في( خ و ف)
#مثال٦في كلمات مهمة هقولك عليها
تكشف عن ( اتساع - سعة ) في
وسع
تكشف عن ( اتصاف- صفة - صفات ) في
وصف
تكشف عن ( اتجاه - جهة ) في
وجه
تكشف عن ( هبة - هبات ) في
وهب
تكشف عن ( سمة- سمات) في
وسم
تكشف عن ( ثقة - ثقات ) في
وثق
تكشف عن ( ميراث ) في
ورث
تكشف عن( ميزان - زنة) في
وزن
