ازاى احسن خط الطالب فى اللغة الانجليزية؟
كتب: مستر محمود أبو غنيمة
ازاى احسن خط الطالب اللى عندى؟
سؤال بيسأله كتير من المدرسين
اولا: الخط ده هبة من الله عز وجل
ثانيا: لازم المدرس نفسه يكون ملتزم بالخط الجميل مع ترك مسافات بين الكلمات والكتابة الصح ع السطرين
كتير مننا بيدى واجب للطالب لتحسين الخط...... طيب الطالب هيبقى خطه حلو ازاى فى الواجب
ممكن تجرب الخطوات دى
1- اكتب اى جملة على السبورة علشان الواجب
2- يا ريت تكون الجملة من المقرر عشان يبقى الطالب عارف الكلمة ومعناها وبيركز فى الخط وبس ... جملة زى دى مثلا
- Happy birthday, Mona.
ونمسك كل كلمة نفصصها حرف حرف بمعنى
تسأل الطالب الحرف الاول اللى هو H يتكتب ازاى على السطرين؟
يطلع عن السطرين؟ ولا ينزل عن السطرين ؟ ولا بين السطرين؟
والطالب هو اللى يجاوب
ولازم تأكد على ان معنى بين السطرين ان الحرف لازم يلمس السطر اللى فوق والسطر اللى تحت عشان يبقى مظبوط
وتستمر هكذا مع كل حرف لحد الجملة ما تخلص
ومتنساش تأكد على ان
- حروف الكلمة تتكتب جمب بعضها
- بين الكلمة والكلمة بنسيب مسافة اد صابع اليد الصغير او اد القلم اللى بيكتب به
- تأكد ان بداية الجملة تكون CAPITAL
- وفى النهاية نحط (. \ ?)
- واسماء الانسان بتبدأ بحرف CAPITAL
يبقى انت كده بتعلم خط وعلامات ترقيم مع بعض
وهكذا .... يوم ورا يوم هتلاقى المستوى اتحسن ان شاء الله
ومتنساش تانى يوم تتأكد من ان اللى شرحته امبارح اتنفذ
ويااااااااااااا حبذااااااااااااا لو هتدى جوايز للى خطه حلو
لو اديت جوايز كل مرة.......
هتلاقى نفسك خلصت الفلوس اللى معاك
بس هتلاقى نتيجة هايلة ان شاء الله
ولو خط الطالب متحسنش بعد فترة
اعتبره زى العلماء اللى خطهم بيبقى وحش دايما ... وبلاش تكشر فى وشه