اهم تصريحات الوزير للسنة الدراسية الجديدة اليوم
_________
عن العام الدراسي الجديد مداخله د/ شوقي وزير التربية والتعليم مع الإعلامي عمرو أديب، في برنامج الحكاية، على mbc مصر في عدة نقاط :
- ٢ ثانوي عام تجريبية مش هتكون شهادة.
- ٣ ثانوي تراكمية امتحان واحد نهاية العام الدراسي.
- مفيش طباعة كتب لأولى ثانوي مع إن الامتحان "أوبن بوك"، لكن الطالب هينزل المنهج على التابلت وبكده هيستخدم المنهج الإلكتروني على إنه كتاب تفاعلي.
- حتى الآن.. امتحانات ٣ ثانوي إلكترونية.. ماعدا الطلاب اللي رسبوا السنادي ومدخلوش الامتحان وأجلوا للسنة الجاية، وطلاب الخدمات والمنازل اللي مش معاهم تابلت.
- الطلاب من كي جي ١ وحتى ٣ ابتدائي، هيروحوا المدرسة كل يوم في العام الدراسي الجديد.
- من كي جي ١ إلى ٣ ابتدائي مش هينفع معاهم تعليم أون لاين، ولازم يكون فيه تواصل مباشر بين الطفل والمعلم، علشان مش هيتأسس غير بالطريقة دي.
- من ٤ ابتدائي إلى ٦ ابتدائي هيروحوا المدرسة ٤ أيام، بحيث يتم تدوير الطلاب في الحضور لاستغلال الفراغات.
- الإعدادي هيروح يومين تلاتة والباقي هيبقى تعليم أون لاين، بس لسه هيشوفوا لها حل ازاي دول يتعلموا إلكتروني.
- المرحلة الثانوية طبعا كلها أون لاين وبرضو حضورهم هيكون محدود يعني تقريبا كده مش هيبقى إلزامي إن الطالب يحضر وهيبقى فيه دروس إلكترونية طول السنة.
- فكرة الحضور لأيام محدودة هدفها استغلال الفراغات.. يعني مثلا لما إعدادي مش هيروح هيحضر مكانهم ابتدائي وهكذا، ولما رابعة وخامسة وسادسة مش هيروحوا هيقعد مكانهم طلبة ابتدائي.
- هذا الكلام في حال اعتماده رسميا، وده وارد بقوة، هيطبق على الحكومي والخاص.
وكانت وزارة التربية والتعليم والتعليم الفني، قد أصدرت عدة قرارات بشأن بدء العام الدراسي الجديد، في ظل أزمة فيروس كورونا، حيث أعلنت موعد بدء العام الدراسي الجديد، والخريطة الزمنية للدراسة في المرحلة المقبلة.
وشملت القرارات ما يلي:
- مدة الدراسة الفعلية 33 أسبوعيًا
- سيبدأ العام الدراسي الجديد في 17 أكتوبر 2020 ويستمر حتى 24 يونيو 2021
- تبدأ إجازة نصف العام الدراسي في 6 فبراير وتستمر حتى 18 فبراير
- يبدأ الفصل الدراسي الأول في 17 أكتوبر ويستمر حتى يوم 5 فبراير 2021 (مدة أيام الدراسة الفعلية 93 يومًا)
- يبدأ الفصل الدراسي الثاني في 20 فبراير 2021 ويستمر حتى 17 يونيو 2021 (مدة الدراسة الفعلية 96 يومًا).
