مدرس اون لايندخول

أهم 8 أشياء تدمر شخصية أولادك تماما

أهم 8 أشياء تعملهم عشان تدمر شخصية ولادك تماما
1- المقارنة comparison
هما أحسن منك في أيه .. ناقص عنهم أيد ولا رجل .. ابن خالتك عمل أحسن منك.
المقارنة مدمرة لو حبينا نحفز أولادنا يبقى نقارنهم بنفسهم ونحفزهم يعملوا أحسن "أنت خلصت الدرس امبارح في ساعة بس أنت تقدر تخلصه في نص ساعة وأنا معاك وهساعدك"
ولما نيجي نشاور له نشاور على مثل أعلى حقيقي مش على أخواته أو قرايبه.
2- الانتقاد criticism
أنت شكلك كده ليه .. دخل لبسك .. غسلت سنانك .. أقف عدل .. اتكلم كويس .. كل ما تكلمه تنتقد فيه شيء
ممكن بدل الانتقاد نخليها مساعدة ونقولها بين شكرين.
"ما شاء الله دايما مهتم بشكلك بس لو لبست التيشرت ده كان هيبقى أحلى عشان دايما اختيارك للألوان بيبقى حلو"
: 3- الحكم judgement
أنت دايما يضحكوا عليك كده وياخدوا فلوسك ويخلوك تعزمهم.
ممكن يبقى مش مضحوك عليه ولا حاجة ويبقى الكرم صفة فيه ممكن ساعتها نساعده يظبطها بحيث ميبقاش بييجي على نفسه بدل ما نلغيها فيه ونحوله لبخيل وخد ده وعممه على كل الصفات.
4- اللوم blaming
شوفت أديك خسرت لما مسمعتش كلامي - ما أنت لو بتمسك عدل مكنتش وقعت منك.
اللوم كثير بيبقى على حاجات معلمناش ولادنا ازاي يعملوها أصلا فبدل ما ألومه ممكن أحلل معاه اللي حصل وأساعده في اللي جي إنه ميعيدش نفس الغلطة.
: 5- النعت labeling
أنت كسول .. أنت غبي .. أنت مبتفهمش وغيرها من الصفات اللي مع تكرارها بتتحول لقناعة عند ولادنا بيتعاملوا بيها فتطلع نفس النتيجة فتتأكد قناعتهم أكتر وتلزق الصفة فيهم.
بدل ما نلزق عليهم صفات سيئة تعالوا نساعدهم يتغلبوا عليها بالتشجيع والتعليم والمساعدة
6- التوقعات expectations
يا أما بنحط توقعات مش مناسبة لإمكانيات ولادنا أو بنتوقع حاجات من غير ما نقول لهم.
جوا دماغي أنا عايز ابني يجيب 97% في ثانوية وهو كل سنة مبيعديش ال 80% مش لتقصير ولكن لأن ديه إمكانياته وأحاسبه عليها.
أو جوا دماغي محتاجه يعمل حاجة وأنا مقولتلوش واتصدم لو معملهاش.
حط توقعات على قدر إمكانيات ولادك وناقشها معاهم وساعدهم فيها.
: 7- الذنب guilt
أنت السبب .. لولاك مكنش حصل كده.
ونشيل ولادنا مسؤولية ذنب يعيشوا بيه باقي حياتهم وده من أخطر غلطات التربية.
8- العار Shame
يا ريتني ما خلفتك .. أنت فضحتنا .. أنت عرتنا وهنا ابننا بيسمع صوت جواه بيقول أنا المشكلة .. أنا الغلط وده أكبر غلط وأخطرهم على أولادنا.
باختصار دورنا نربيهم ونساعدهم مهما ده أخد مننا وقت ومجهود ولازم نفهم ان غلط ولادنا فرصة عشان نعلمهم مش فرصة عشان نعاقبهم.
remove_circleمواضيع مماثلة
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى