ازاي نقوي مناعه الأطفال عشان الكورونا ؟!!..
ورقه وقلم واكتبي ورايا المقادير يا ست الكل .

ولا هو سحر وشعوذه وازازه ولا اتنين دوا حلوين كده تمنع عننا البلاء والوباء واول ما نقول اسمها جري تخلص من السوق من التكالب عليها ..

-اسمحولي .. انا طبعا مقدره جدا خوفكم كأمهات علي الولاد بس الحقيقه السؤال ده سطحي جدا وغير منطقي وأي اجتهاد مننا كاطباء بيكون لدعم جهاز المناعه اللي بالفعل اتكون واتبني ..

جهاز المناعه عند الاطفال الطفل بيتولد بيه وبيقوي او يضعف مع الزمن والسنين وخلال مراحل النمو .. هو بيتولد قوي وعظيم وللاسف الممارسات الخاطئه مننا هي اللي بتضعفه وجدا كمان ونرجع كلنا نعاني بعد كده وانا أولكم ..

-طب افكركم كنا بنقوي جهاز المناعه ازاي ومن زمان اوي ..

-من اول لما كنا بنتخانق ان الرضاعه تكون طبيعيه فقط وماندخلش لبن صناعي غير للضروره الحتميه (عدم زياده الوزن )

-من اول لما كنت بتخانق مع الام اللي بتدي مضاد حيوي بدون استشاره طبيه او بتكرر روشته قديمه او بترجع للصيدلي يوصفهولها ..

-من اول لما كنا بنبدا مرحله ادخال الاطعمه وبمنتهي الحذر والتأني ونركز ندي اكل ايه امتي وازاي نوسع نافذه النكهات عند الاطفال عشان يدوقوا اغلب انواع الخضار والفواكه والبروتينات المفيده واللي بدورها بتشكل جسمهم ومناعتهم في العمر ده ..

-و من اول ما كنت باعض الامهات اللي بتدي اغذيه محفوظه او سكر او ملح في السن الصغير واحذرها منهم ..

-من اول ما كنا بنقول لازم فيتامين د من اول يوم وبانتظام ومن غير حمرقه ..

-من اول ما نصحنا باهميه التطعيمات الاضافيه ومدي اهميتها لحمايتهم من امراض كتير ..

-من اول الخناق مع الامهات اللي بتدي كورتيزون لاطفال الحساسيه واتعلمنا ازاي نبدلها بجلسات بخار و بخاخات وازاي نستخدمها ونمشي عليها كبروتوكول علاج امن وما بيأثرش علي المناعه ..

-من اول ما كنا بننصح ونصر ان الاطفال يتعملها صوره دم كامله ومخزون حديد عند عمر السنه لمعرفه نسب الحديد والهيموجلوبين لانه بياثر بشكل رهيب علي شهيتهم وبالتالي مناعتهم وما نكتفيش باننا ندي فواتح شهيه او اي فيتامين والسلام .

رحله طويله جدا امهات كتير معانا هنا عاشوها معايا وتعبوا فيها وهيفهموا كلامي ده كويس جدا ويحسوه ..

- طب نعمل ايه دلوقتي يعني ؟

مفيش غير النصايح العاديه بالعادات الصحيه السليمه والاكل الصحي الخضار والفواكه اللي ماليانه بالعناصر المهمه اللي الجسم محتاجها (زنك وفيتامين سي) والسوايل الدافيه ومنع السكر والحلويات قدر المستطاع .. نوم في مواعيد طبيعيه وبلاش سهر كتير .. تعرض للشمس في توقيت مفيد الصبح بدري او بعد العصر (فيتامين د) .. لعب رياضه وحركه قدر المستطاع واكيد نفسيه سليمه وبعيده عن التوتر والقلق ..

الامهات الجداد يحفظوا كل كلمه في البوست لان الرهان للاجيال الجديده هيكون علي مناعتهم وفقط زي ما حضراتكم شايفين .

-وتبقي النصيحه الاهم والاغلي علي الاطلاق ..

الوقايه من الكورونا تكون بعدم التعرض ليها ولا لشبهة حدوثها حتي ..

حفظنا وحفظكم الله .
فاطمة خضر
منقول