كيفية عمل جدول المذاكرة أيام الدراسة وأيام الإمتحانات
إزاي أعمل جدول للمذاكرة للدراسة أو للإمتحانات يالا بيينا… ورقة وقلم معاك… ونكتب الخطوات المهمة جدا دي… علشان ننفذها بعد الحلقة على طول إنت مش بتحضر الحلقة علشان تتفرج عليا وأنا برسم على فكرة… مش برنامج الفانوس السحري هو, ولما تتفرج عليه بدون كتابة… الحفريت اللي في المصباح هايظبلك وقتك… الحفريت اللي في المصباح نفسه, جايب ورقة وقلم دلوقتي وقاعد يكتب...… إنت كمان, ورقتك الجميلة … وقلمك الحبوب… وإكتب مع الحفريت الحفريت الحفريت

الخطوة الأولى: إعرف إن عمل الجدول ده بياخد شوية وقت حلو أوي…. مش بيتعمل في ١٠ دقايق أو حتى ربع ساعة… ده ممكن ياخد ساعتين كاملين أول مرة تعمله… بس ده مش بيكون وقت ضايع أبدا بالعكس… دا إنت هاتجمع الدنيا كلها في دماغك و في لوحة كاملة تخليك ما تضيعش وقت أبدا يعني هاتستثمر ساعة أو ساعتين في أول الأسبوع تعمل فيهم الجدول ولما تمشي على الجدول ده, هاتوفر لنفسك كل الساعات والساعات والساعات الي كانت بتطير منك من غير تخطيط على الفايسبوك وعلى اليوتيوب وعلى جميع أنواع الهبل كلها خلاص… فهمت الإستثمار بتاع وقت عمل الجدول ده؟ لو مناسب لك إنك تستثمر ساعة أو ساعتين في عمل الجدول وتوفرهم باقي الأسبوع… يبقى روح للخطوة التانية

الخطوة الثانية: إكتب ليسته ب كل الحاجات اللي المفروض تعملها الاسبوع ده كل الحاجات, سواء لها علاقة بالدراسة أو ب غير الدراسة

الخطوة الثالثة: تسطير الجدول إنت ممكن تعمل الجدول الفعلي ده على إكسل شيت أو جوجل سبريد شيتس أو أي برنامج جداول في الكوكب ده… لو ده كان أسهلك طبعا… بس أنا عن نفسي بحب من وقت للتاني إني أعمل الجدول على لوحة حقيقية…… بس إنت و مزاجك طبعا

الخطوة الرابعة نملى بقى المربعات الجميلة دي … بالحاجات اللي عندنا واللي المفروض نعملها تعالى نجرب بأمثلة جميلة كده لو إنت مش أيام الإمتحانات, ولسه بتروح المدرسة يبقى هاتحط أوقات المدرسة كلها وتعلم عليها زي كده مثلا

الخطوة الخامسة إنت لغاية دلوقتي… حطيت المواعيد في الجدول اللي مفيش لك أي إختيارات فيها أبدا الكلام الكبير بقى, في المواعيد اللي لك إختيارات فيها مواعيد المدارس والدروس دي ثابتة مش بتتغير … ياريت تكون كتبتها بقلم جاف أو قلم مش بيتمسح وخلاص والفراغات بقى تبدأ تخطتها بقلم رصاص… لأنك هاتحتاج تعدل الجدول كل كام يوم كده… خصوصا في الأوائل إبدأ بقى شوف الفراغات اللي قبل مواعيد الدروس… وشوف هاتحط فيها مذاكرة المادة اللي عندك فيها دروس… ولا نوم قيلولة ولا إيه بالظبط سيب فراغات عقلانية بين المواعيد يعني مثلا مش يبقى عندك درس الساعة ٦ … وتكتب إنك هاتذاكر قبله من ٥:٣٠ للساعة ٦ لأن أكيد لو عندك درس الساعة ٦ مثلا… أكيد أكيد أكيد هاتحتاج وقت علشان تلبس وتنزل تروح درسك… ممكن يكون الوقت ده ١٥ دقيقة وممكن يكون أكتر من ساعة… حسب الوقت اللي بتاخده علشان تروح درسك

الخطوة السادسة والخطوة دي فعلا مهمة جدا جدا جدا ألا و هي… التعديلات على الجدول جداول المذاكرة, هي جزء مهم جدا من إنك تتعلم التخطيط في الحياة الإستفادة منه, مش مجرد إستفادة إنك هاتعمل جدول تذاكر عليها لأه خالص… ده هايعلمك إزاي في المستقبل إن شاء الله تعمل جداول دراسة جدوى للمشاريع, وجداول تخطيط للمشاريع… وجداول وخطط كتيرة أوي في النهاية بقى… أكيد إنت شوفت إن الجدول ده هايختلف مليون في المية حسب مواعيدك وخطتك ومفيش جدول واحد ممكن نعمله أبدا ونبعتهولك تمشي عليه لكن بنوعدك بجد, إن أي جدول هاتعمله, هايكون أفضل من عدم وجود جدول خالص ولما تعمل جدول… إلتزم بالأعمال اللي فيه و لو عملت جدول و مامشيتش عليه بالظبط, مفيش أي مشكلة أبدا…. إبدأ عدله تاني وإبدأ من الأول تاني وغالبا هاتحتاج تبدأ من الأول تاني كل يوم … ماتقلقش يعني وما تشتكيش إنك عملت جدول وما مشيتش عليه من أول كام مرة لأن ده طبيعي جدا… وهو ده اللي إحنا قولنالك عليه في الخطوة رقم ٦ سيب بقى موبايلك الجميل ده… وروح إعمل الجدول بتاعك وشجع نفسك على تنظيم وقتك وعلى المذاكرة
شاهد الفيديو

المصدر: OsLoop أسلوب