الفيزا اللي مش لذيذة..

عذاب اسمة صرف الرواتب، وبعد ماتستني بالساعتين وانت واقف في الطابور وتوصل لغاية الماكينة تلاقيها شطبت، او الماكينة الامورة بتاعة بنك القاهرة بتعمل ايه بنت الرايقة بتشغلي اعلان لمدة دقيقتين قال يعني ناقصة عطلة، وآخر واقف ساعة وده (الرخم) عشان يحول رصيد، والثالث جاي من قرية ومعاه 50 فيزا بتوع زملائه في العمل ودي حقيقة عايز يضربهم كلهم والناس تستني، وواحدة بتقترح ان الطابور يمشي راجل واتنين ستات فقلتلها الكلام ده في الميراث بس، وواحد يطلب منك تسحبله الفلوس عشان مش بيعرف يتعامل مع الماكينة، وواحد زعلان عشان الماكينة مفيهاش فئات 20 جنيه وبيدعي عليها انها تصرفهم في دواها، ولما توصل انك تدخل تسحب بتلاقي 9 معاك بيسحبوا معاك وكان الحساب حسابهم والادهي انهم هما اللي بيقولولي اسحب كام، وادوس علي ايه، وواحد صغنون بيتصل بماما بيسالها علي الرقم السري وماما مش بترد، وفجأة تخرج الماكينة من الخدمة وتعود بعد دقائق ويتفشكل الطابور وتبدأ الخناقات انا كنت قدامك والاخر لا انا موجود، والستات يطلبة نسيبلهم ماكينة لهم والرجالة تروح علي الماكينة التانية، وراجل وصل لغاية الماكينة ولقي الطابور طويل نزل المدام عشان تسحب وتمشي بسرعة، كله ده مع الفيزا.
بس خلاص.
‏شرف الدين غريب‏