قواعد التفوق العشرة للناس اللي في ثانوية عامة.

1- لم يفت الوقت بعد، قدامك شهر تقريبا قبل البدء في مذاكرة أول مادة، متعملش جدول لأنك مش هتمشي عليه، ومتضيعش وقت في عمله، لكن حدد بشكل يومي 4 دروس مثلا ومتنامش غير لما تخلص 75% منهم. ولو خلصتهم كلهم متذاكرش أي حاجة تاني في باقي اليوم.

2- كى تصلح الماضي لا تفسد المستقبل والعكس: مش معنى انك هتبدأ تراجع القديم يبقى تسيب كل الدروس الجديد. بس لازم توازن بينهم هما الاتنين.

3- مهم: من دلوقتى اعمل كشكول صغير، سجل فيه أصعب الافكار والمسائل والنقاط اللى فى المنهج .فى كل مادة، .بكلمات قليلة تقدر تفتكرها .
بعد ما تخلص المادة هتبص فى الكشكول هتلاقى كتير اوى من النقاط المهمة اللى هي أصعب حاجة وأنت جمعتها بسهولة.

4- اترك الفيسبوك : من دلوقتى مش من بكرة .صدقنى العالم كله مش هيتغير لو سبت الفيسبوك شهرين، شهرين بس ممكن يغيروا حياتك حرفيا !! الموضوع مش مستحيل استبدل تليفونك بواحد قديم مفيهوش انترنت واقطع الوصلة.

5- مفيش حل سحري هييجي يحط المعلومات في دماغك ومفيش محفز ليك أكتر من نفسك، فمتنتظرش مساعدة من أي شخص إلا من مجهودك وعقلك.

6- لا تخضع لابتزاز الأهل. سيبك من كلام أهلك وتعليقاتهم على مذاكرتك .انت اكتر واحد عارف انت بتذاكر صح ولا لا .

7- الثانوية ماراثون طويل بيفوز فيه الأكثر تنظيما للمجهود على مدار السنة، مش سباق بيفوز فيه الأسرع في المذاكرة، نظم وقتك براحتك واظبطه من دلوقتي على مقدار كل مادة ودرجاتها.

8- متقارنش نفسك بحد! ، مفيش أي حد في الدنيا بنفس عقليتك تماما أو طريقة مذاكرتك أو أسلوب حياتك. كل إنسان ليه طابع خاص، طرق متعددة بتؤدي لطريق واحد في النهاية.

9- تاني، بعد البوست ده اقطع النت، اختار أي وسيلة ترفيه تانية بس بلاش النت، بياخد كل وقتك.

10- الوقت هيعدى سواء أحبطت فيه أو خوفت أو يأست . فبما انه هيعدى يبقى قضيه فى المذاكرة بدل من الخوف اللي ملوش أي فايدة .

بالتوفيق، كلنا مرينا بالفترة دي وأهو عدينا منها ولسه عايشين أهو الموضوع مش مستحيل، آلاف الأشخاص كل سنة بيحققوا أحلامهم في المجموع اللي عايزينه، مفيش أي عائق إنك تكون واحد منهم.