مهم جدا لطلبة ثانوية عامة .. علشان متضيعش مجهود سنة كاملة لازم تركز جدا فى النصايح دى
ليلة الامتحان :
- متذاكرش اى ورق جديد حد جايبهولك ليلة الامتحان .. ذاكر من المصادر اللى طول السنة بتذاكر منها
- لو هتحل اسئلة ليلة الامتحان لازم يكون معاك حلها - متحلش من اى حاجة مش معاك حلها
- ليلة الامتحان اوعى تسهر ..
- لو مش جايلك نوم من التوتر اوعى تقول هقوم اذاكر احسن .. خليك على سريرك حتى لو فضلت صاحى
- اتسحر سحور متين و ابعد عن السكريات و عن اى اكل بيتعبك
قبل الامتحان الصبح :
----------------------
- مش لازم تراجع المنهج كله الصبح .. ممكن تبص بس على جزء بسيط انت دايما بتنساه او جزء انت متأكد انه لازم بيجى فى الامتحان
- الاحساس بالنسيان طبيعى لكن مجرد ما تستلم ورقة الامتحان هتفتكر
- روح الامتحان بساعة يد
- لو بيتك بعيد عن المدرسة انزل بدرى واعمل اعتبار للزحمة و المواصلات خصوصا لو من اهل القاهرة و اسكندرية
- صحابك الرخمين اللى صوتهم عالى و بيحبوا يعملوا هيصه ولازم يفرهضوك على باب المدرسة قبل الامتحان .. اقطع علاقتك بيهم
- وانت على باب اللجنة اى حد يسألك سؤال فى المادة اقطع علاقتك بيه برضه
- متاخدش ورق مراجعات من اى حد من صحابك على باب اللجنه
- اعمل حسابك ان اول يوم ( العربى ) غالبا هتستلم فيه ورقة الاسئلة متأخر 10 دقايق او ربع ساعه وده علشان بيكون اول يوم و التنظيم صعب شوية المهم انك متتوترش و مدير اللجان فى مدرستك هيزود الوقت و هتاخد وقتك كامل ان شاء الله وده حقك .
- متراجعش على باب اللجنة .. استغفر ربنا و اهدى احسن
جوا اللجنة :
-----------
- لما تستلم الامتحان بص عليه سريعا كده فى دقيقه علشان تطمن نفسك
- متتخضش من اى سؤال متعرفهوش
- ابدأ باكتر سؤال فاكره وخايف تنسى اجابته
- الاسئلة النظرية اللى كلها تسميع لازم تاخد منك اقل و قت
- أى سؤال حاسس انه فيه لعب و محتاج تفكير اقرأه اكتر من مرة بتركيز واديله حقه لكن متسرحش فيه .
- متحلش الاسئلة الاختيارى الا بعد ما تخلص الاسئلة الاجبارى و يتبقي معاك وقت
-اقطع علاقتك بالواد الرزل اللى من اول خمس دقايق بيقولك اجابة الاختيارات هتبقي ايه .. حاول تتخلص منه بأى شكل .
- المراقبين اللى بيتكلموا فى اللجنة بكل ذوق قوله انك مش مركز و من حقك انه يسكت و متتكسفش ابدا ده حقك
- متخليش المراقب يقعد جنبك لاى سبب .. قوله بكل ذوق انك مش عارف تركز .
- متعملش مشاكل فى اللجنة ومتضايقش نفسك و متتخانقش مع حد اطلاقا علشان تركيزك ميروحش .
- افكس لأى حد يقولك مينفعش تكتب بالرصاص او مينفعش تشخبط و لازم تعمل محضر وبتاع .. متخليش حد يعملك محضر فى اللجنه طالما انت مش غلطان .. هيضيع منك نص ساعه على كلام فارغ
- اى مراقب يكلمك كتير و يهزر معاك كتير قوله لو سمحت مش عارف اركز
- اعمل مسوده عادى حتى لو المراقب قالك متعملش
- اوعى تصدق اى مراقب مدرس فى المادة اللى بتمتحن فيها وبص فى وراقتك وقالك اجابتك دى غلط .. قوله شكرا انا عايزها غلط .
- المراقب اللى كل شوية يبص فى ورقتك ويروح يغشش حد تانى .. بكل برود قوله لو سمحت متبصش فى ورقتى علشان مش عارف اركز
- لو خلصت الامتحان وفاضل وقت خدلك بريك دقيقتين وارجع ركز فى الامتحان تانى وراجعه نقطه نقطه .. غالبا هتطلع غلطات مكنتش واخد بالك منها
- متغيرش اجابتك فى اخر خمس دقايق .. علشان هتندم غالبا
- متخرجش من اللجنة قبل ما الوقت يخلص حتى لو مخلص الامتحان من اول نص ساعه
بعد الامتحان :
-------------
- اللى اتكتب فى الامتحان اتكتب .. متراجعش ابدا لاى سبب ده لمصلحتك
- صاحبك اللى مبيهداش غير لما يراجع .. اقطع علاقتك بيه
- مهما غلط فى الامتحان و لا يهمك ركز فى الامتحان اللى بعديه
- متفكرش كل شوية هتنقص كام درجة و متقعدش تحسبها بالاله الحاسبة
- دردش مع اهلك و احكيلهم عملت ايه فى الامتحان علشان تتخلص من التفكير فى اللى فات وتبدأ تركز فى المادة اللى بعدها