1- الخبر المفرد
2- الخبر الجملة :-
* خبر جملة أسمية
* خبر جملة فعلية
3- الخبر شبه الجملة :-
* الجار و المجرور
* الظرف ( زمان - مكان )
هناخد أول نوع حالا
#الخبر_المفرد
الخبر المفرد : هو الخبر الذي يتمم معني الجملة الاسمية و يتكون من كلمة واحدة . الكلمة الواحدة دي ممكن تكون بتدل علي مفرد او مثني او جمع. بس في النهاية هي كلمة واحدة
( نشيط . نشيطان . نشيطون . نشيطات . نشطاء )
هي كلمة واحدة قدامك اهيه .
الخبر المفرد ده بيكون مرفوع دايما
وعلامات الرفع : -
1- الضمة : اذا كان مفرد او جمع تكسير او جمع مؤنث سالم
2- الالف : اذا كان مثني .
3- الواو : اذا كان جمع مذكر سالم .
هرجع تاني اقولك اقسم بالله ما هتحل حاجة في النحو طول ما انت مش حافظ ( جدول الاعراب ).
تعالي ناخد الامثلة
………………………
1- أسعار السلع في مصر باهظة
2- الدهر يومان . يوم لك و يوم عليك
3- أبناء مصر أوفياء لوطنهم
4- معلمو المدرسة مهتمون بالتلاميذ
5- اللاعبات مصممات علي الفوز .
.
فين الخبر في الجمل السابقة ؟ وايه الاعراب ؟
* الجملة الاولي :
أسعار : اسم بدأت به الجملة الاسمية . يبقي مبتدأ . والمبتدأ دايما مرفوع . واسعار دي جمع تكسير .تبقي مرفوعة بالضمة .
طيب فين الخبر ؟
هروح ادور .. اروح ادور ..اروح ادور .
ايوة ... الكلمة اللي تممت المعني هي كلمة ايه ؟
يا تري السلع ؟ ... لا طبعا لاني كده لسه مفهمتش اسعار السلع مالها ؟ يا تري الاسعار منخفضة ؟ يا تري الاسعار مناسبة ؟ لا لا لا لا ههههه الاسعار باهظة . .هو باهظة يعني ايه ؟ ..باهظة يعني غالية ناااااااااااااااااار .
كدة انا فهمت ان الاسعار باهظة . تبقي باهظة هي الخبر . وعشان دي كلمة مفرد تبقي مرفوعة وعلامة رفعها الضمة.
………………
الجملة الثانية:-
الدهر ماله ؟ يومان . صح . يبقي يومان ده الخبر.
برااااااااافو . طيب قولنا نوعه ايه ؟ جاوب .
يا مستر ده خبر مثني
يخرب بيتك هههههههههه مفيش حاجة اسمها خبر مثني ..ارجع تاني لانواع الخبر شوفهم و تعالي .
ده خبر مفرد يا سيدي ..بس بيدل علي مثني.. لكنه عشان كلمة واحدة يبقي مفرد حتي وان دل علي مثني او جمع .
يبقي يومان ده خبر مفرد لانه كلمة واحدة وعشان ده خبر يبقي لازم يكون مرفوع ولانه مثني يبقي مرفوع بالالف .
…………………………
باقي الجمل اكيد وضحت من المثالين اللي فاتو مفيش داع اتعبك في القراءة اكتر من كدة . لكن لو حد عايز شرحها يكتب رقمها في كومنت و هشرحها له .
الحلقة الجاية هتكون اصعب نوع في الانواع وهو الخبر الجملة الاسمية . ده محتاج تركيز و حفظ شديد .
…………………………………………………………………
اللي ميعرفش جدول الاعراب . يركن علي جنب . انت لازم تحفظه الاول وبعدين تيجي تمشي معانا . واللي محتاجه هيلاقيه في الصور اللي ع الصفحة و كمان له منشور خاص به . ………………………………………………………
الحلقة الثانية
-------------( تابع أنواع الخبر )----------------
اتكلمنا الدرس اللي فات عن أنواع الخبر و شرحنا الخبر المفرد اللي لازم تعرف انه أقوي أنواع الخبر . وخلي بالك هنحتاج كلمة ( أقوي ) دي كتير جدا وعشان كدة أحفظها كويس جدا .
تعالي بقي النهاردة نتكلم عن النوع الثاني من انواع الخبر وهو الخبر الجملة الاسمية .اعرف ان الخبر الجملة الاسمية بيتكون من كلمتين . الكلمة الاولي لازم تكون اسم والكلمة التانية دي لها اشكال مختلفة بس احنا هنعرف الشكل اللي عليك بس . الكلمتين اللي بيتكون منهم الخبر الجملة الاسمية بيربط بينهم ضمير رابط .
الضمير الرابط له شكلين
- ضمير متصل ...- ضمير منفصل .
ده الشغل النظري يا باشا وعشان تبقي فاهم لازم العملي و تشتغل بايدك .
.
في الخبر الجملة الاسمية هتتاكد من شوية حاجات .
1- الخبر الجملة الاسمية كلمتين الاولي اسم ولازق فيه ضمير متصل
2- الضمير الرابط بيكون متصل او منفصل .
3- اوعي تقفل الجملة الا لما تعد اربع حاجات مهمة .
تعالي ناخد مثال علي الخبر الجملة الاسمية اللي الضمير الرابط بيكون منفصل
1- الفراعنة هم بناة الاهرامات
2- أبناؤنا هم الغرس للمستقبل
3- الامهات هن رحمة الله بالارض
4- المعلمان هما الراعيان للمواهب .
……………………
و دي امثلة علي الخبر الجملة الاسمية اللي الضمير الرابط بيكون متصل
1- الشمس حرارتها شديدة صيفا
2- المعلمان أخلاقهما طيبة
3- اللاعبون مواهبهم فائقة
4- الطبيبات رحمتهن بالمرضي عظيمة .
•••••••••••••••••••••••••••••••••••••••••••••••
#الشرح
هشرح مثال من كل نوع من النوعين
المهم التركيز لانك لو فهمت واحد هتفهم الباقي .
{ الفراعنة هم بناة الاهرام }
الجملة دي جملة اسمية يبقي فيها مبتدأ و خبر
المبتدأ هو الاسم اللي في اول الجملة الاسمية ( الفراعنة ) .. مالهم الفراعنة ؟ .. الاجابة متنفعش تكون كلمة ( هم ) لوحدها ..كدة محتاج حاجة كمان تكمل و تتمم المعني . طيب نجرب ( هم بناة ) .. ايوة كدة نفعت تكون خبر . و (هم بناة ) كلمتين - ضمير و اسم - اتكون منهم كدة جملة اسمية صغيرة جوة الجملة الاسمية الكبيرة .
الجملة الاسمية الصغيرة دي جواها مبتدأ و خبر
الجملة الاسمية الكبيرة كمان جواها مبتدأ و خبر .
حاسس انك مش فاهم ؟ طيب تعالي نعرب الجملة وانت هتفهم . اعمل جدول في كراستك بالرصاص . وحط الكلمة في العمود الضيق علي اليمين . وفي العمود الشمال هنكتب الاعراب.
- الفراعنة : مبتدأ مرفوع و علامة رفعه الضمة
- هم : ضمير منفصل مبني في محل رفع المبدأ الثاني .
- بناة : خبر المبتدأ الثاني مرفوع و علامة رفعه الضمة
- الاهرامات : مضاف اليه مجرور وعلامة جره الكسرة لانه جمع مؤنث سالم .
#اوعي تقول خلصت
انت كدة طلعت اتنين مبتدأ و خبر واحد . يبقي كدة ناقص خبر . ... ايوة بتاع المبتدأ الاول
هتكتب في نهاية الاعراب
- والجملة الاسمية ( هم بناة ) خبر المبتدأ الاول في محل رفع .
°°°°°°°°°°°°°°°°°°°°°°°°°°°°°°°°°°°°°°°°°°°
تعالي ناخد مثال من النوع الثاني
{ الشمس حرارتها شديدة }
الجملة دي جملة اسمية لانها بدأت باسم وهو الشمس اللي هنقول عليه مبتدأ . والمبتدأ محتاج خبر ... طيب الخبر ايه ؟ ... هل ينفع اقول ( حرارتها ) بس ؟ . لا طبعا عشان كدة الجملة ناقصة ومتمتش . طيب ( حرارتها شديدة ) ... ايوة كدة بقي المعني تام .
يبقي الخبر ( حرارتها شديدة ) . قدامك كلمتين و بيربط بينهم ضمير رابط اهو.
الجملة الاسمية الكبيرة فيهارمبتدأ وخبر
الجملة الاسمية الصغيرة فيها مبتدأ وخبر
كدة المجموع 4 . اتنين مبتدأ . و اتنين خبر .
تعالي نعرب
- الشمس : مبتدأ مرفوع وعلامة رفعه الضمة
- حرارتها : مبتدأ ثان مرفوع وعلامة رفعه الضمة .
والهاء ضمير متصل مبني في محل جر مضاف اليه.
- شديدة : خبر المبتدأ الثاني مرفوع وعلامة رفعه الضمة .
#اوعي تقول خلصت هههههههههههههه
لسه المبتدأ الاول مخدش خبر .
طيب فين الخبر ....ايوة صح
والجملة الاسمية ( حرارتها شديدة ) خبر المبتدأ الاول في محل رفع . +++++++++++++++++++++++++++
في النهاية اتمني اكون غطيت الدرس ده و خلي بالك انه الدرس لسه فيه نصه بالظبط .
باقي نوعين متشرحوش . وده لانه درس طويل ولازم الطالب يفهمه جزء جزء . .
اللي محتاج اعراب اي جملة من الجمل اللي فوق يتركها في التعليقات واللي عايز يعرب جملة تانية من عنده اوك .
+++++++++++++++++++++++++
الحلقة الثالثة #الخبر_الجملة_الفعلية
اعرف أن الجملة الفعلية بتتكون من ركنين أساسيين ( الفعل و الفاعل ) .
فمثلا لو قلنا
1- التلميذ يذاكر الدرس
2- التلميذان يذاكران الدرس
3- التلاميذ يذاكرون الدرس
................................
4 - الام يحترمها أبناؤها .
5- السماء تلمع نجومها
6- السفينة يهتز شراعها .
..............................
7- المعلم عاقب المهمل
8- الله غفر للحجاج ذنوبهم
9- الجندي كافح الاعداء
°°°°°°°°°°°°°°°°°°°°°°°°°°°°°°°°°°°°°°°°°
المجموعة الاولي من 1-3 . هنلاقي ان الجملة الاسمية اللي اولها مبتدأ اكيد محتاج لخبر يتمم المعني هتلاقي ان الخبر اللي تمم المعني هو الفعل و الفاعل . اللي بعد المبتدأ و مش شرط يكون في مفعول به موجود او مش موجود .
( التلميذ يذاكر الدرس ) التلميذ
مبتدأ التلميذ مالو ؟ ايه خبره ؟ .... ها... ايوة صح
( يذاكر الدرس . ) طيب لو شاطر قول بين القوسين كام كلمة ؟ هههههههه
عارف انك هتقول انهم اتنين .
عددهم اتنين لكن هم تلاتة
( يذاكر فعل . الدرس مفعول. ...... ) كدة في ركن ناقص بالجملة الفعلية . ايه هو ؟ ... مظبوط
الفاعل. اوعي تنسي الفاعل . #الفاعل لو موجود بعد الفعل يبقي ظاهر و موجود .
طيب ولو مجاش بعد الفعل في الجملة يبقي ضمير مستتر .
يلا نعرب الجملة
( التلميذ يذاكر الدرس )
التلميذ : مبتدأ مرفوع و علامة رفعه الضمة
يذاكر : فعل مضارع مرفوع و علامة رفعه الضمة
والفاعل ضمير مستتر تقديره هو يعود علي المبتدأ
الدرس : مفعول به منصوب وعلامة نصبه الفتحة .
اوعي تقول خلصت هههههه لسه الخبر بتاع المبتدأ
لازم تكتب في الاخر
والجملة الفعلية ( يذاكر الدرس ) خبر المبتدأ في محل رفع .
طبعا مثال 2 و 3 . الافعال المضارعة دي من الافعال الخمسة المرفوعة بثبوت النون ودي هتكون الدرس التاني في الترم التاني . لكن الخبر واحد في محل رفع .
°°°°°°°°°°°°°°°°°°°°°°°
المجموعة الثانية من 4- 6دي امثلة لمجموعة من الجمل الاسمية اللي الخبر فيها جملة فعلية بس الفاعل موجود مش ضمير مستتر زي المجموعة الاولي.
تعالي نشوف
( الام يحترمها أبناؤها )
هنلاقي الجملة الاسمية بدأت بالمبتدأ الام .
مالها الام ؟ .... ايوة صح .
يحترمها أبناؤها .جملة ( يحترمها أبناؤها ) دي اصلا جملة فعلية مكونة من فعل ( يحترمها ) وفاعل ( أبناؤها ) والجملة دي هي اللي تممت المعني كويس وبكدة تكون الجملة الفعلية دي هي الخبر بتاع المبتدأ .
طيب تعالي نعربها
( الام يحترمها أبناؤها )
الام : مبتدأ مرفوع وعلامة رفعه الضمة
يحترمها : فعل مضارع مرفوع و علامة رفعه الضمة والضمير في محل نصب مفعول به .
أبناؤها : فاعل مرفوع وعلامة رفعه الضمة و الضمير في محل جر مضاف اليه .
اوعي تكون نسيت الخبر وتقول خلصت هههههه
والجملة الفعلية ( يحترمها أبناؤها ) خبر المبتدأ في محل رفع .
°°°°°°°°°°°°°°°°°°°°°°°°°°°°
المجموعة الثالثة من 7-9 .هنلاحظ انها الخبر فيها جملة فعلية لكن الفعل المرة دي ماضي . و الفعل الماضي دايما مبني . والبناء علي الصف الثاني الاعدادي ما اريد الخبطكم . .
اعرف ان الفعل الماضي مبني تعالي نعرب المثال الاول
( المعلم عاقب المهمل )
المعلم : مبتدأ مرفوع وعلامة رفعه الضمة
عاقب : فعل ماض مبني علي الفتح
ايوة ههه اوعي تنسي الفاعل يا شطور
والفاعل ضمير مستتر تقديره هو المهمل : مفعول به منصوب وعلامة نصبه الفتحة
والجملة الفعلية ( عاقب المهمل ) خبر المبتدأ في محل رفع .
++++++++++++-++++++++++++
حاولت اختصر كتير جداااااا وما دخلنا في موضوعات غير مقررة . لكن ممكن نشرحها للي بيطلبها . اللي محتاج توضيح او اعراب اي جملة يطلبها .
*********************************
الحلقة الرابعة تابع الخبر #شبه_الجملة
بعد ما شرحنا الخبر المفرد والجملة الاسمية والفعلية . النهاردة هنشرح اخر نوع من انواع الخبر وهو الخبر شبه الجملة .
الاول لازم نعرف يعني ايه شبه جملة .
العادي ان الجملة يا تكون اسمية يا تكون فعلية .
ودي بيكون لها معني .
لكن شبه الجملة بيكون غير مكتمل المعني . يعني متقدرش تفهم منه حاجة لوحده .
عايزك تعرف ان الخبر شبه الجملة حاجة من اتنين يا يكون جار ومجرور . يا يكون ظرف بعده مضاف اليه . تعالي شوف الامثلة و نصحصح كده سوا
1- الزهرة في الحديقة
2- الجنود وسط المعركة
3- اللقاء غدا
لو شوفنا الجملة الاولي هنلاقيها اسمية وتبدأ باسم .. هنقول عليه مبتدأ . والمبتدأ محتاج خبر يتمم معني الجملة . يا تري الخبر ايه ؟... ها ..ينفع يبقي كلمة ( في ) .؟ ... الاجابة لا طبعا ..لانها حرف ولا يتمم المعني .
طيب ينفع يكون الخبر كلمة ( الحديقة ) . ؟
تعالي نجرب نحط المبتدأ ووراه الخبر كدة عشان نشوف الجملة تمت وبقي لها معني ولا لا ؟ ..
( الزهرة الحديقة ) ..ههههههههه شغل مساطيل .
طيب و بعدين
.الخبر هنا مينفعش يكون كلمة واحدة لوحدها . الخبر الكلمتين ( في الحديقة ) . كدة انت حددت الخبر ونوعه . هتعرف تعربه ؟ .
الزهرة : مبتدأ مرفوع وعلامة رفعه الضمة الظاهرة
في : حرف جر
الحديقة : اسم مجرور وعلامة جره الكسرة
......... انت بتعمل ايه ؟
خلصت
لا يا سيدي مخلصتش . باقي الخبر ولا انت نسيته .
ااااااااااه . صح . ... اوعي تنساها تاني .
وشبه الجملة ( في الحديقة ) خبر المبتدأ في محل رفع . براااااااااااااااااافو
++++++++++++
الجملة الثانية :
الجنود : مبتدأ مرفوع وعلامة رفعه الضمة
وسط : ظرف مكان منصوب وعلامة نصبه الفتحة
المعركة : مضاف اليه مجرور وعلامة جره الكسرة .
وشبه الجملة ( وسط المعركة ) خبر المبتدأ في محل رفع .
++++++++++++
الجملة الثالثة :
اللقاء : مبتدأ مرفوع وعلامة رفعه الضمة
غدا : ظرف زمان منصوب وعلامة نصبه الفتحة
وشبه الجملة ( غدا ) خبر المبتدأ في محل رفع
…………………………………………………………
اللي عنده مثال وعايز نشرحه بالتفصيل يتركه بالتعليقات .
*******************************
الحلقة الخامسة #الحلقة_الاخيرة
***************
اليوم هو اخر حلقة من حلقات درس أنواع الخبر وفي الشرح النهاردة هنحاول نغطي كل النقاط اللي بتكون موضع أسئلة في الامتحان
بسم الله نبدأ
#الاستخراج
لما يطلب منك تستخرج خبر من الجملة أو من القطعة هتعمل ايه ؟
1- لازم تكون قريت القطعة كويس و فهمتها . وفهمتها و اوعي تعمل شاطر او تاخد حاجة بالشكل . وبعدين تحاول تقطع القطعة لجمل لو مكنتش متقطعة و طبعا لازم تعرف ان الخبر هيكون موجود في جملة اسمية اللي هتكون اولها اسم . او ضمير . او اسم اشارة .
اذا قالك هات خبر مفرد هتروح علي جملة اسمية الخبر فيها كلمة واحدة حتي ولو كانت بتدل علي مثني او جمع .
ولو قالك هات خبر جملة اسمية هتروح علي جملة اسمية الخبر فيها كلمتين بينهما ضمير رابط .وتاخد الكلمتين
ولو قالك هات خبر جملة فعلية هتروح علي جملة اسمية الخبر فيها هيكون فعل ماض او مضارع وتاخد الفعل والكلام اللي بعده .
ولو قالك هات خبر شبه جملة هتروح علي جملة اسمية الخبر فيها جار ومجرور او ظرف زمان او مكان .
………………………………………………………
#أكمل_بخبر_مناسب
سؤال سهل جدا محتاج تركيز و لباقة
هيجيب لك جملة فيها مبتدأ و بس . وطالب منك تكمل بخبر هو محدد لك نوعه .
فلو طلب خبر مفرد
تحط كلمة واحدة تكون اسم و تكمل معني الجملة و تكتبها كويس وبخط واضح ولو طلب خبر جملة اسمية
تحط كلمتين يكون الاتنين اسم و يكون بينهم ضمير رابط يتبع المبتدأ في النوع .ولو طلب خبر جملة فعلية
تحط فعل ماضي او مضارع و تكمل الجملة بمفعول او جار ومجرور او ظرف مش مهم . المهم انك حطيت فعل بعد المبتدأولو طلب منك خبر شبه جملة
تحط حرف حر و وراه اسم مجرور او انك تحط ظرف وراه مضاف اليه . ………………………………………………………………
#التحويلات
السؤال ده محتاج ذكاء وافتكر ( الطين الصلصال ) . هنفرض اني عطيتك قطعة طين لونها اخضر وقولت لك اعمل شجرة . يبقي لازم تستعمل الطين اللي عطيته لك بدون تغيير يعني مترميش الاخضر و تعملها احمر .
مثلا
طلب منك تحول الخبر في الجملة اللي جاية دي من مفرد لجملة اسمية وفعلية و شبه جملة .
( التلميذ مجتهد )
طبعا الخبر في الجملة مفرد و هنحوله
1- خبر جملة اسمية
التلميذ اجتهاده عظيم 2- خبر جملة فعلية
التلميذ يجتهد في المذاكرة 3- خبر شبه جملة
التلميذ في اجتهاد مستمر . محتاجة تدريبات كتيرة عشان تثبت .
………………………………………………………………
#السهل_الممتنع
من كتر ما الطلاب تدربوا علي الاعراب و الخبر اللي بيحط الاسئلة لازم يتعبهم فيعمل ايه ؟!!
يختار التافه و السهل من الانواع و المصيبة ان مفيش حد من الطلاب او المعلمين انتبه لهذا الامر .
مثال
1- هذا بلد الخير .
2 - أنا خير منك .
3- أنتم في ذمة الله .
4 - هو روح الله وكلمته .
يطلب منك تستخرج الخبر و تبين نوعه . طبعا انت رايح جاي في القطعة معدي علي الحاجات دي ولا في دماغك لانك متعرفش ان الضمائر تعامل معاملة الاسماء لكن الاسماء معربة و الضمائر مبنية
ناخد مثال
هذا : اسم اشارة مبني في محل رفع المبتدأ انا : ضمير متكلم مبني في محل رفع المبتدأ
أنت : ضمير مخاطب مبني في محل رفع المبتدأ
هو : ضمير غائب مبني في محل رفع المبتدأ ..
وطبعا الخبر سهل انك تعربه وتعرف نوعه من الحلقات اللي فات شرحها .
……………………………………………………………
#الضمير_الرابط
جميع الامثلة في الكتب قالت ان الضمير الرابط بيكون هاء الغيبة في الخبر الجملة الاسمية
طيب افرض انه حط حاجة تانية .. متخافش
1- أنا علمي نافع .
2- نحن أخلاقنا مهذبة
3- أنت قوتك عظيمة
هتلاقي ان الضمير الرابط هنا مش هاء الغيبة . لكن جه مرة ( ياء المتكلم . ناء المتكلمين . كاف المخاطب ) و برضو بتكون في محل جر مضاف اليه طالما متصلة بالاسماء.
………………………………………………………………
#التقديم_والتأخير .
من الفذلكة ان اللي بيحط الامتحان يعمل فيك مقلب و يشقلب لك الجملة و يقدم لك الخبر و يأخر لك المبتدأ .. بس علي مين يا عسل هههههههه
احنا اتفقنا اننا هنقرأ القطعة كويس عشان نفهمها .
مثال
( للمدرسة دور عظيم في التعليم ) فين الخبر ؟!!"
انت لازم تكون شاطر و تعرف ان الجملة أصلها
( دور عظيم للمدرسة في التعليم )
يعني دور
مبتدأ مؤخر -في الجملة الاصلية-و للمدرسة
ده الخبر اللي نوعه شبه جملة .مثال كمان للفهم .
للمتقين الجنة فين المبتدأ وفين الخبر ؟!!!
ها ... هنعمل ايه ؟
ايوة بالظبط هنعمل إعادة ترتيب .. و هتبقي ( الجنة للمتقين ) . وبكدة هتكون الجنة مبتدأ مؤخر . و للمتقين هو الخبر شبه الجملة. .
………………………………………………………………
#الاختيار .
احيانا بيكون في الجملة حاجات انا شايف انها تنفع تكون خبر . طيب اختار ايه ؟ و اخد ده ليه ؟ و اترك ده ليه . ؟!!! لازم يعمل لك لخبطة
.
هريحك اهو... اعرف ان :-
الخبر المفرد : قووووووووي جدا
الخبر الجملة : متوسط
الخبر شبه الجملة : ضعيييف جدا
مثال
1- ( النجوم في السماء )
2-( النجوم في السماء لمعانها براق )
3- ( النجوم في السماء تلمع )
4- ( النجوم في السماء في لمعان )
هنلاحظ
*في المثال الاول مكنش قدامنا غير اننا لازم ناخد الخبر شبه الجملة ( في السماء ) اصل مفيش غيره والامر لله
*في المثال الثاني تركت (في السماء ) واخدت ( لمعانها براق ) لان الخبر الجملة الاسمية اقوووي من شبه الجملة .
* في الجملة الثالثة اخدنا ( تلمع ) الخبر الجملة الفعلية لانه اقوي .
* في الجملة الرابعة اخدنا ( في السماء ) لان لو تساوي خبرين في القوة . فالاول أولي بسداد المعني .
**************************************
اللهم اجعل هذا للعمل خالصا لوجهك الكريم . وما كان من خطأ أو سهو أو نسيان فمن نفسي ومن الشيطان. ...........
مستر / رضا الحوتي .
أنواع خبر إن للصف السادس الابتدائي ترم أول 2023 أ/ نجلاء عبد الجواد
https://drive.google.com/file/d/15ULT9955FvXhV-RDmF8Tsgzw7DWPkjZu/view
+
