للمزيد لمن يريد |
أنواع حروف الجر
حروف الجر ليها تلات أنواع:
1-حرف جر أصلي.
2- حرف جر زائد.
3- حرف جر شبيه بالزائد.
حرف جر أصلي
ودا حرف الجر اللي تعرفه من أول ما خدت النحو ودا أصلي فما ينفعش يتحذف من الجملة وإلا هتبوظ زي (ذهبت إلى المدرسة) أو (محمد في البيت).
حرف جر زائد
دا لو حذفته من الجملة هتفضل سليمة زي (ليست أختك بجاهلة) ... لو حذفنا الباء هتبقى الجملة (ليست أختك جاهلة) ... لسا سليمة فتبقى الباء حرف جر زائدة واللي بعدها مش اسم مجرور ... (جاهلة) في الأصل خبر ليس ... بس عشان حرف الجر اللي قبلها خلاها مجرورة بنقول (جاهلة) خبر ليس مجرور لفظا منصوب محلا أو خبر ليس منصوب بالفتحة المقدرة.
حروف الجر الزائدة هما تلاتة (من – الباء – الكاف) ... وهنتكلم عنها واحدة واحدة:
1- من
حرف الجر (من) بيبقى زائد بشرطين لازم الاتنين يتحققوا:-
- يسبقه نفي أو استفهام أو نهي.
- يأتي بعده نكرة.
زي (ما جاءنا من بشير ولا نذير) – (هل من أحد في الدار) – (ما جاء من طلاب إلا أحمد).
هنا (بشير – طلاب) فاعل مرفوع بالضمة المقدرة ... (أحد) مبتدأ مجرور لفظا مرفوع محلا.
ملحوظة: حرف الجر (من) بيزيد قبل التمييز غير المحول وخاصة حالات التعجب السماعية زي (لله دره من فارس) و (يا لك من فارس) ... هنا (فارس) تمييز مجرور لفظا منصوب محلا.
2- الباء
حرف الجر الباء مش ليه شروط بس ليه مواضع معينة وهي:
- بعد النفي بـ(لم يكن – ما كان – ليس) ... وبتيجي قبل خبر الناسخ ... (أليس الله بعالم غيب السماوات والأرض) (ليس بجاهل ولا كذاب) (لم أكن بأكثر منكم مكانة) ... كل من (عالم – جاهل – أكثر) خبر ليس أو أكن مجرور لفظا منصوب محلا.
- بعد (ما النافية) وقبل الخبر ... زي (ما ربك بظلام للعبيد) ... أصل الجملة (ما ربك ظلام للعبيد) ... فعشان كدة (ربك) مبتدأ، (ظلام) خبر مجرور لفظا مرفوع محلا.
- بعد (كفى) ... زي (كفى بالله وكيلا) ... (الله) فاعل مجرور لفظا مرفوع محلا ... (وكيلا) تمييز منصوب بالفتحة.
- مع التوكيد بالنفس والعين ... زي (جاء الطلاب بأنفسهم) – (رأيت اللص بعينه) ... هنا (أنفسهم) توكيد مجرور لفظا مرفوع محلا ... (عينه) توكيد مجرور لفظا منصوب محلا.
- مع صيغة التعجب (أفعل به) ... زي (أجمل بالربيع) ... هنا (الربيع) فاعل مجرور لفظا مرفوع محلا.
- قبل كلمة (حسب) ... زي (بحسبك درهم) ... هنا (بحسبك) الباء حرف جر زائد، (حسب) مبتدأ مجرور لفظا مرفوع محلا، (الكاف) ضمير مبني في محل جر مضاف إليه ... (درهم) خبر.
3- الكاف
- ودي بتزيد في حالة واحدة ... وهي إنها تيجي بعد (ليس) أو (لم يكن – ما كان الخ الخ) ... وييجي بعدها ع طول كلمة (مثل) ... مثلا لو قلنا (ليس كمثله شيء) .... (ليس) فعل ماض ناسخ ... (كمثله) الفاء حرف جر زائد ... مثل خبر ليس مجرور لفظا منصوب محلا ... (شيء) اسم ليس مؤخر مرفوع بالضمة .... تمام نكرر تاني ... يبقي لازم ليها شرطين إنها تيجي بعد ناسخ منفي ... وإنها تيجي قبل كلمة (مثل).
حرف الجر الشبيه بالزائد
- حروف الجر الشبيهة بالزائدة هي حرف واحد في منهجك بس ... حرف الجر (رب) ... بييجي بعده مبتدأ ولاااازم يكون نكرة ... زي (رب ضارةٍ نافعة ٌ) ... (رب) حرف جر شبيه بالزائد ... (ضارة) مبتدأ مجرور لفظا مرفوع محلا وممكن كمان تقول مبتدأ مرفوع بالضمة المقدرة ... (نافعة) خبر مرفوع بالضمة.
- يجوز حذف (رب)| بعد حرف (الواو) ... وبيفضل عملها موجود ... وبنسمي الواو دي (واو رب) ... زي قول الشاعر (وليل ٍ كموج البحر أرخي سدوله على بأنواع الهموم ليبتلي) وزي (وأيام ٍ لنا غر ٌ طوال ٌ عصينا الملك فيها أن ندينا) ... (ليل – أيام) مبتدأ مرفوع بالضمة المقدرة.
