= الطلبات اللي بتطلبها بعض المدارس الحكومية والتجريبية والرسمية المتميزة (الحكومية)، من أولياء الأمور نظير قبول تقديم وتحويل ولادهم من وإلى المدارس، قمة الابتزاز والسرقة.. ياريتها طلبات تخدم المدرسة ككيان تعليمي محتاج إمكانيات، دي طلبات بتعكس إن المدارس دي بيديرها مجموعة أشخاص لا عندها ضمير ولا رحمة ولا إنسانية..
حضرتك
بتطلب تكييف ليه؟
بتطلب 5 شفاطات ليه؟.
بتطلب 3 و4 مراوح ليه سقف ليه مع إنها ممنوعة في المدرسة؟
بتطلب مبردات مياه ليه؟.. علشان تروي عطش الطلبة مثلا؟..
بتطلب بالأربعين لمبة ليه؟ هي الوزارة قالت لكم باتوا في المدارس ولا درسوا للولاد على النور بالليل؟..
بتطلب كراسي مكاتب الواحد بألف جنيه ليه؟..
 معنديش مشكلة يكون فيه مشاركة مجتمعية - باللي ولي الأمر يقدر عليه - وبشرط إن الحاجة تكون المدرسة محتجاها - وبدون إكراه - لكن إنك تطلب طلبات، لا بتستخدمها المدرسة ولا بيستفيد بيها الطلبة، وبالذل والإكراه لازم الأب يشتريها علشان ابنه يتقبل أو يتحول عندك.. انت لا مدير ولا تربوي ولا إنسان ولا مسئول، لا انت واللي ساعدك ولا اللي ساكت عليك في منصبك، وعمر الوزارة دي ما هينصلح لها حال طول ما فيه مسئولين زيك ومسئولين ساكتين عليك علشان الكعكة اللي بتتوزع.

= السيد وزير التعليم: هي الناس دي اللي هتعدل المنظومة؟..
ريح نفسك مش هتتصلح لو ركبت جناحات تشتغل بيها.. هتحط سياسات هتشيل سياسات هتعدل سياسات، مش هتتعدل إلا لو جبت ناس عايزة تشتغل، وفاهم شغلها، وعندها فكر ورؤية وبقى عندك مديرين مدارس وإدارات بالكفاءة مش بالعلاقات..
صحيح فيه ناس عندها ضمير وبتشتغل وملهاش في الطمع ولا استغلال المنصب وبتحب بلدها.. لكنهم مش ظاهرين وسط الكوارث اللي بتحصل من الباقيين.. مش بتكلم كصحفي تعليم، لكن بتكلم كولي أمر بسمع وبشوف عن قصص بتجيب إحباط.. طبيعي أحط نفسي مكان ولي أمر مش قادر ومش معاه فلوس يشتري الطلبات دي.. منا في النهاية أب وعارف اللي فيها..
لكن يا فندم: يا تجيب ناس صح وتحط معايير صح لاختيار المسئولين صح ويديروا المنظومة دي صح، يا توفر على حضرتك وعلينا إننا نحلم إن يكون عندنا تعليم صح.
الاستاذ احمد حافظ
صحفي بالاهرام