نصائح مهمه قبل ما نتيجة المرحلة الأولى للتنسيق تظهر :
****************************
1- أول ما ينزل إن نتائج المرحلة الأولي ظهرت هتدخل علي نفس الموقع زي ما دخلت أول مره لكتابه الرغبات بالرقم السري ورقم الجلوس وهيظهرلك نتيجتك.
2- أول ما هتدخل هتلاقي جمله " تم ترشيحك لكليه " معناها إن مكتب التنسيق قبلك في كليه من الكليات اللي سجلتها ، وقتها هيكون ناقصك تروح تقدم ملفك في الكليه.
3- لو قبلت بالكليه اللي جتلك هتطبع بطاقه الترشيح اللي فيها اسم الكليه اللي اترشحتلك ، هتكون من ضمن الورق اللي هتقدم بيه في الكلية وتنتظر لحين ما يتم الإعلان عن فتح باب التقديم بالجامعات
4- لو مش عايز الكليه اللي اترشحتلك من مكتب التنسيق وعايز تحول لكليه تانيه هتعمل ايه؟
* حقك تحول لأي كلية تانيه بس شرط تكون جايب مجموعها ، هتطبع وقتها بطاقه الترشيح احتياطي وتاخدها اسكرين وهتنتظر الموقع يفتح التحويلات وتقليل الاغتراب
- طب لو جتلك كلية عايزها بس في مكان بعيد شوية وعايز تدخل محافظتك !
* هتطبع بطاقه الترشيح وتاخدها اسكرين وتنتظر الموقع يفتح تقليل الاغتراب
- طب لو في حاله إنك عملت تقليل اغتراب واترفض !
* السنه اللي فاتت الموقع فتح أكتر من مره لناس كتير لو وقتها فتحلك تاني بعد رفض تقليل الاغتراب تقدر تعمل تحويل أو لو حابب الكلية يبقي مفيش حل غير إنك تقضي سنه في المكان اللي جالك بعيد وتحول بعد سنه
5- بعد ظهور نتيجة المرحله الأولي هنعرف بعض الكليات أخدت من كام وطالما عرفنا خدوا من كام مش هينزلوا مرحله تانيه وهيكتفوا من الأولي
6- خطوات كتابه وتنسيق رغبات المرحله التانيه هتكون نفس خطوات المرحله الأولي باختلاف قائمه الكليات هتقل لسبب إن في كليات هتكتفي من المرحله الأولي مش هتنزل مرحله تانية
7- التقديم ل الجامعات الأهلية والخاصه شغالين اختبارات عادي حاليا هتمشي في إجرائاتهم براحتك ، ولكن متنساش تنسق في تنسيق الحكومه ، ولو اتقبلت في كلتا الكليتين كلية حكومه وخاصه .. لازم تقرر هتدخل اي فيهم لان مينفعش تدرس كليتين في نفس الوقت
#التحويل وتقليل الاغتراب
- تقليل الاغتراب هيفتح امتي !
* هيفتح بعد ما المرحلة التانية للتنسيق تخلص ، هيكون تقليل الاغتراب والتحويل للمرحلة الاولى والمرحله التانيه مع بعض و ممكن يفتح قبل التانية حسب ما يتم الإعلان عنه والقرار ينزل.
- اي الفرق بين تقليل الاغتراب والتحويل !
* تقليل الاغتراب اسمه ( تحويل مناظر ) بمعنى بتحول من كلية موجوده فى مكان بعيد لنفس الكليه فى محافظتك
" مثال : لو جالك مرحله أولى هندسه أسيوط ، بس انت من المنصوره ، وقتها هتعمل تقليل اغتراب من أسيوط للمنصوره
- التحويل الغير مناظر هتحول من كلية لكليه تانيه ( داخل محافظتك ) بشرط تكون جايب مجموعها
" مثال : جالك تجاره بس انت مش عايزها تقدر تعمل وقتها تحويل من تجاره لآداب بس شرط تكون جايب مجموع آداب
* ( تجارة المنصوره >>>> آداب المنصوره )
(تجارة المنصورة >>>> اداب القاهره )
- هل ينفع أعمل تقليل اغتراب وتحويل فى نفس الوقت !
" مثال : انت جيبت آداب ومجموعك جايب آثار الفيوم وانت من القاهره
ينفع تعمل تحويل لآثار الفيوم ثم تقليل الاغتراب للقاهره
* لا مينفعش ، الموقع مبيسمحش ليك إلا بإجراء عمليه واحده فقط إما تقليل اغتراب أو تحويل ( عملية واحدة فقط )
- تقليل الاغتراب بيقبل على أساس اى !
* تقليل الاغتراب بيقبل زياده عن الكلية ب 10% بمعنى لو هندسه المنصوره بتقبل عدد طلاب 100 طالب وتقليل الاغتراب جابلها 10 طلاب كمان ( اللى هما 10% من 100 ) يبقى كدا 110 طالب ، نفترض إن فى 20 طالب عاملين تقليل اغتراب للكليه وقتها الكليه هتقبل أعلى 10 فيهم من حيث المجموع
كل ما مجموعك كان قريب من تنسيق الكلية كانت فرصتك كبيره فى التحويل
- لو عملت تقليل اغتراب واترفض هتفضل فى المكان البعيد اللي اترشحت فيه !
* قدامك 3 حلول
" الحل الأول تحويل ورقى بين الجامعات ( التحويل دا مش كل الجامعات بتقبله للآسف )
" أو هتقدم التماس طبى فى الوزاره مرفق معاه شهاده طبيه إنك مريض ومينفعش ليك سفر ( و دا ممكن ميتقبلش برضو إلا لو ليك حظ )
" الحل الثالث هتفضل سنه فى الكلية وبعدين تحول ( الحل الأمثل والأسهل بالنسبه للباقي ).
#بالتوفيق والنجاح لجميع المتقدمين الجدد للتعليم الجامعي.