من الألف للياء.. كل اللي طالب الثانوية العامة محتاج يعرفه من ساعة ما يوصل اللجنة لحد ما يخلص الامتحان:
= مبدئيا.. إن شاء الله أرقام الجلوس هتتوزع في المدارس من الأحد المقبل (5 يونيو).
= هتدخل اللجنة تستلم ورقة أسئلة وورقة إجابة بابل شيت.
= كل فصل (لجنة) هيكون فيه أربع نماذج أسئلة للامتحان.
= الأسئلة واحدة في النماذج الأربعة لكن ترتيبها متغير بينك وبين زميلك.
= ترتيب الإجابات هيكون مختلف بينك وبين زميلك.. يعني ترتيب الأسئة مختلف وترتيب الإجابات برضو مختلف.
= هتلاقي رقم كود على ورقة الأسئلة اكتبه بالنص في ورقة البابل شيت من فوق.
= لازم تكتب رقم الكود علشان يبقى نموذج الأسئلة اللي معاك مطابق للبابل شيت بتاعك.
= لازم يكون معاك قلم رصاص وقلم جاف ومسطرة وأستيكة (مساحة) وبراية.
= استخدم المسطرة في إنك تمشي براحة في البابل شيت وتحط الإجابة قصاد نفس رقم السؤال لأن عينك ممكن تروح على السؤال اللي بعده وتعلم عليه من غير ما تاخد بالك.. هنا أهمية المسطرة.
= هتستخدم القلم الرصاص في تظليل رقم الإجابة اللي انت شاكك فيها، وفي الآخر تبقى ترجع لها علشان تظللها بالقلم الجاف لما تتأكد منها.
= القلم الجاف هو الأساس في التظليل.. واتأكد إنك ظللت الدايرة كلها.
= لو ظللت إجابة بالجاف وعايز تغيرها.. اكتب عليها علامة (إكس).. وبعدها اختار الإجابة الصح.
= لو عملت (إكس) على الإجابة الغلط واخترت إجابة صح غيرها.. متقلقش.. هنا جهاز التصحيح الإلكتروني مش هيقول إنك اخترت إجابتين.. هنا هو هيصحح الدايرة اللي مش عليها إكس.
= لو انت عملت إكس على الإجابة اللي انت لغيتها، وظللت دايرة تانية بس مش بشكل واضح، متخفش، هنا الجهاز مش هيصحح السؤال ده وهيصدر إشارة حمراء إن فيه سؤال لم يتم تصحيحه.. بعدها هيكون تصحيحه بالعين المجردة (تصحيح يدوي يعني)موقع الدكتور محمد رزق التعليمي، يعني لا تقلق هتاخد درجة السؤال، وده حصل السنة اللي فاتت، فبلاش تكون قلقان.
= السؤال اللي تحس إنك هتاخد وقت فيه ومش عارف توصل لإجابة صحيحة من الاختيارات.. سيبه وروح للي بعده، علشان الوقت، وبعدين ابقى ارجع له تاني لما تخلص إجابة باقي الأسئلة.
= بلاش تظلل دايرتين في التابلت شيت لنفس السؤال وتقول هما ياخدوا الإجابة الصح.. كده هتاخد صفر على السؤال ده.
= لازم تسلم ورقة الأسئلة وورقة البابل شيت للمراقبين.. علشان زي ما قلت لك هيطابقوا نموذج الأسئلة بتاعك بالبابل شيت، لأن النماذج مختلفة داخل اللجنة الواحدة، وهنا مش هيكون فيه مجال إن طالب تتبدل إجابته أو النموذج بتاعه مع طالب تاني.. اطمن.
= ورقة البابل شيت هتبقى من صفحة واحدة.. يعني هتبقى عارف انت جاوبت على ايه وسايب إيه مش هتقعد تقلب في ورقة الإجابة.. لأنها ورقة واحدة زي ما قلت لك.
= متنساش تكتب اسم ورقم جلوس ولجنتك على ورقة الأسئلة وتكتب اسم ورقم جلوسك ولجنتك ورقم الكود في ورقة البابل شيت.
= متحاوش تغش ولا تطلب إجابة من الطالب اللي قدامك ولا اللي وراك.. أسئلتهم ترتيبها مختلف عن ترتيب أسئلتك.. وترتيب الاختيارات عندهم مختلف عن ترتيب الإجابات عندك.. ركز في حالك ومضيعش وقت في حاجة هتضرك مش هتفيدك.
= لو اتمسكت بموبايل حتى لو مقفول، هتتحسب عليك محاولة غش وهتسقط في المادة.. سيب موبايلك مع المراقب.
= لو اتمسكت بموبايل مفتوح هتسقط في المادة وباقي المواد وهتبقى متهم بحيازة وسيلة غش وممكن تتحرم من دخول الامتحانات لمدة سنتين.
= عايز تقسم السنة على سنتين انت حر.. عايز تدخل نص المواد وتسيب النص التاني للسنة الجاية انت حر.. التقسيم متاح لأي طالب، كل اللي تعمله إما تروح المادة ومتحلش إجابات ممكن تنجحك، أو متروحش أصلا يوم امتحان المادة دي.. مش لازم تكتب طلب تأجل مادة أو تقسم مواد.
= لو عايز تتظلم على النتيجة انت حر.. التظلم متلغاش وهيكون مستمر إن شالله تتظلم في كل المواد.
= الحالات اللي يحق لك دخول الدور التاني في المادة بالدرجة الكاملة.. لو مريض ومعاك ما يثبت ده بلجنة ثلاثية وتقرير طبي موثق من التأمين الصحي.. لو حد من أسرتك بالدرجة الأولى اتوفى، لا قدر الله يوم الامتحان.. لو حصل كارثة طبيعية.. حريق.. الطريق اتقطع ومعرفتش توصل للجنة.. حادثة.. وهكذا.. كل ده بتعمل بيه محضر رسمي في الشرطة، وتقدم طلب تقول فيه حصل لي كارثة كذا يوم كذا وكان عندي امتحان كذا وأدي ما يثبت صحة كلامي.. وعايز أدخل دور تاني في المادة بالدرجة الكاملة.. حقك.
= لو صورت ورقة الأسئلة ونشرتها علشان الإجابات توصل لك.. هتسقط في كل المواد ومش هتدخل الامتحان لمدة سنتين (الكلام ده بيطبق حرفيا).
= عارف هيوصلولك ازاي لو صوّرت ورقة الأسئلة؟. هيوصلولك من خلال الباركود السري اللي مطبوع على ورقة أسئلتك، والباركود ده موجود في كل مكان بورقة الأسئلة، مش أعلى الصفحة بس زي الأول، ده هتلاقيه بين كل سؤال والتاني، يعني متحاولش تصوّر جزئية واحدة، وكز في هدفك وبس.
= كل بوكليت أسئلة فيه ورقتين (وش وضهر) كمسودات، يعني 4 صفحات بيضاء في كل امتحان تحل فيهم الأسئلة اللي محتاجة خطوات براحتك.
= نسيت أقولك إن أٔسئلة الامتحانات هتكون متفاوتة في درجات الصعوبة والسهولة، وبتخاطب كل الطلاب، يعني تلتها للطالب المعقول وتلتها للطالب المتوسط وجزء لفوق المتوسط وجزء للمتميز، وده اتراجع السنادي مرة واتنين وتلاتة قبل بدء طباعة الامتحانات.
=يارب أكون قدرت أوفر لك كل المعلومات اللي محتاج تعرفها.
الصحفي أ/ احمد حافظ