كلام مهم عن المذاكرة في النظام الجديد للصف الاول والثاني وخصوصا طالب الثالث الثانوي
_______
 أولا طبعا خلينا متفقين أنه أهم حاجة في النظام الجديد هي الفهم ثم الفهم طيب عشان تفهم منهجك كويس تعمل إيه ؟ طبعاً لازم قدر الإمكان تحل كتير وتحل من كذا مصدر حلك الكتير هيخليك تكتشف نقاط ضعف كتير وحاجات مكنتش فاهمها أو مش واخد بالك منها فالحل الكتير مهم جدا وأهم حاجه في الحل أنك تحاول تحل أسئلة المستويات العليا متفضلش تحل أسئله سهله وتخدع نفسك انك بتحل  خليك مقتنع أنه مهما كانت صعوبة السؤال فطالما ليه أساس علمي ليه في منهجك متقلش عليه ده مش سؤال امتحان !!
 ثانيا
لازم تكون مقتنع تماماً أنه الأسئلة إلي بتحلها هتدخل الامتحان بنسبة 99% مستحيل تلاقي سؤال منهم يعني حتى لو حليت من 100 مصدر فكره انك تدخل تلاقي نفس الأسئلة ده مش هيحصل أبدأ أبدا الكلام ده كان في النظام القديم انما في النظام الجديد أشبه  بالمستحيل طيب هتسالني كده ايه فائده الحل الكتير ؟؟
ما أنا قولتلك يا غالي أنت بتحل كتير عشان تقدر تفهم المنهج وتتعمق فيه وصدقني طول ما انت حليت كتير وحليت مستويات عالية كمان هتدخل الامتحان مهما كانت صعوبته صدقني هتقدر تحل .
 ثالثا  
الرسول صلى الله عليه وسلم قال " ان الله يحب إذا عمل أحدكم عملا أن يتقنه " يعني لازم تتقن عملك كويس بمعني أنك حتى لو بتتعب فوارد جدا تدخل الامتحان متعرفش تحل رغم انك تعبت وسهرت لكن ممكن تكون كنت بتتعب بغباء يعني بتحفظ من غير ما تفهم مثلاً أو كنت بتحل اسئله عاديه مفيهاش تفكير عالي بمعني آخر فيه نوعين من التعب تعب بذكاء ،  وتعب بغباء
_التعب بذكاء / انك تجتهد في فهم المنهج والحل الكتير عليه .
_أما التعب بغباء / أنك تفضل نضيع من وقتك في الحفظ بدون فهم ورغم أنك تعبت لكن في النهاية في ظل النظام الجديد مستحيل يتساوى الي حافظ بالي فاهم .
 رابعا
وحاجه كمان بالإضافة إلى الحل / انك تحاول تسمع فيديوهات مراجعات على اليوتيوب أو المنصات صدقني كل مدرس بيضيف معلومات جديده ممكن يكون المدرس بتاعك مقالهاش خصوصاً المدرسين اللي بيكونوا شغالين مستويات عالية مثلا زي الاستاذ أحمد بركه في الفيزياء مستوى أسئلته عالي جدا ويساعدك انك تتعمق في المنهج وفيه كتير من المدرسين مش حابب اذكر حد علشان ما نساش حد فالخلاصه أنك لازم تتعمق في المنهج سواء بالحل الكتير أو بالفيديوهات.
خامساً
امتحانات الدروس ليست مقياساً لمستواك الحقيقي / جزء كبير من مدرسين الدروس بيجيبوا أسئله من الأفكار إللي شرحوها وممكن تقفل الامتحان وتفرح وتيجي تتصدم آخر السنه لانه طبيعي جدا آخر السنه يكون فيه أفكار جديدة متشرحتش ليك فمتخليش امتحان الدرس يخدعك وكمان متزعلش من المدرس اللي بيجيبلك امتحان صعب لأنه هو بيعودك علي امتحان آخر السنه .
 أخيراً
في ظل النظام الجديد لازم تتخلص من مقوله " أهم حاجة الكم مش الكيف والهبل اللي زي كده. " يعني نلاقي طالب يقولك مذاكره تلات ساعات أفضل من مذاكره عشر ساعات .
الكلام ده كان في النظام القديم اللي كنت مجرد بتحفظ وتدخل الامتحان تكتبهم اما في النظام الجديد فأنت محتاج تحل وتتعب والحل الكتير محتاج وقت اكيد .
______
مجرد خواطر لكيفية التعامل مع النظام الجديد اتمني أن أكون قد وفقت فيها.
بالنسبة بقى لطالب أولي وتانيه ثانوي اللي حصل على تقدير مش كويس ؟
لما الخوف ولما الجزع ؟؟ أنت خلال أولي وتانيه ثانوي بتستعد لتالته ثانوي يعني تشوف تذاكر ازاي تحل ازاي طريقه مذاكرتك ما كنتش كويسه تغيرها من الاخر أنت في مرحلة تجريبيه واحمد ربك أنك ممتحنتش علي التابلت زي السنين اللي فاتت لأنه لو الامتحان كان على التابلت كنت هتغش ومكنتش هتعرف مستواك الحقيقي  
استفاد من التجربه إللي أنت فيها دلوقتي واستعد لتالته ثانوي ولسه قدامك فرصه تعوض الترم الثاني يا بطل وبالنسبة لطالب أولي ثانوي التجربة كانت صعبه عليكم بسبب أنكم طالعين من الاعدادي من نظام كله معتمد على الحفظ لنظام معتمد على الفهم ده غير عدد المواد اللي زاد الضعف. فلما الخوف ولما الجزع
اتمنى لكم التوفيق والنجاح بإذن الله 
ماما منى