ازاي تذاكر مادة اللغة الإنجليزية في ظل النظام الجديد

استعرض الموضوع السابق استعرض الموضوع التالي اذهب الى الأسفل

13082020

مُساهمة 

. ازاي تذاكر مادة اللغة الإنجليزية في ظل النظام الجديد




ازاي تذاكر مادة اللغة الإنجليزية في ظل النظام الجديد 130
ازاي نذاكر المواد في ظل النظام الجديد
مادة اللغة الإنجليزية

النهاردة هنتكلم عن تاني أهم مادة بعد العربي واللي هي عليها 50 درجة من اجمالي مجموع الثانوية العامة

مادة اللغة الإنجليزية

الإنجليزي في النظام الجديد بقى مختلف بشكل كبير عن القديم
دلوقتي الإمتحان بقى يعتمد على التفكير الإبداعي بشكل كبير ، الإمتحان دلوقتي بيتكون من أربع حاجات أساسية ، الإختياري ، القطعة ، الترجمة ، المقال ( ممكن ينضاف عليهم حاجه في تالته وممكن لأ )

نتعامل معاهم سؤال سؤال ، أول حاجه الإختياري

1- الإختياري بينقسم لأسئلة كلمات وأسئلة جرامر
نبدأ بالكلمات ، أسئلة الكلمات في النظام الجديد بقت بتعتمد على المعاني المختلفة للكلمة الواحدة
انما مش زي النظام القديم يجيب السؤال مباشر وانتا بتختار الكلمة اللي انتا حافظها وعارف معناها اللي عليك في المنهج

انما دلوقتي هيجيبلك سؤال الكلمات بطريقة مختلفة ، هيطلب منك معنى كلمة معينة ويجيبلك الاختيارات تظن ان كلها تنفع بس هتلاقي كلمة واحدة هي الأدق وعشان تعرف الكلمة الأدق دي لازم تكون حافظ المعاني المختلفة للكلمة الواحدة وعارف الفرق بين كل معنى والتاني

وممكن يسألك بردو في جملة انتا هتلاقي ان ملهاش علاقة بالمنهج بس في كلمة في الاختيارات ليها معنى ينفع هنا

زي مثلًا كلمة operation ، تنفع بمعنى عملية حراحية او عملية عسكرية ، فلو مثلًا عليك في المنهج المعنى الأولاني هيسألك في الإمتحان عن المعنى التاني...

طيب أنا كطالب مطلوب مني أحفظ كل كلمات اليونيت اللي بتبقى أكتر من 100 كلمة وكمان معانيهم المختلفة ؟!

لأ طبعًا لأنه في الإمتحان مش هيسألك بالطريقة اللي فوق غير في كلمات الـKey Words اللي هما بالكتير 15 كلمة

طيب مش كل الكتب هتجيبلك كل المعاني بتاع الكلمة ، فانت هجيب ترجمة جوجل وتكتب عليه الكلمة بالانجليزي وهيطلعلك كل معانيها بالعربي ( بس عشان يطلع كل المعاني لازم توصله بالنت )
بعدين تكتب كل المعاني دي في ورقة وتبدأ تحفظهم ، اعمل كدا مع الكام كلمة بتوع الـKey Words بدل ما تقعد تحفظ في كل كلمات اليونيت...

دا بالنسبة لاختياري الكلمات ، نيجي لاختياري الجرامر واللي هو أسهل مليون مرة من اختياري الكلمات بس لو انتا فاهم القاعدة مش مجرد حافظها

الجرامر في النظام الجديد بقى يعتمد على حاجه اضافية غير حفظ القاعدة ، بقى يعتمد على معنى الجملة كمان

يعني في النظام القديم كنا نقعد نقول I + am + معرفش ايه ... الخ ، الكلام دا مينفعش في النظام الجديد ، يعني على سبيل المثال لو قلتلك ،
ahmed and I ..... good players

لو هنحل بالنظام القديم هنختار am لأن كلنا حافظين ان I بتاخد am ، لكن هنا هناخد are لأن المعنى بيختلف ، هنا بيقول احمد ونا لاعبين جيدين ، كمان لو خدنا am المعنى مش هينفع بالعربي ، يعني ينفع مثلًا نقول أحمد ونا أكون لاعبين جيدين ، الجملة مش مظبوطة خالص ، عشان كدا عشان تحل جرامر في النظام الجديد يبقى تحفظ القاعدة ( بس مش حفظ أعمى ) + تحول الجملة للعربي وتشوف معناها مظبوط ولا لأ

كمان يا جماعة لازم نعرف الفرق في المعنى بين الأزمنة لأنه للأسف مدرسين كتير مش بيقولوا للطلبة هي ايه الأزمنة دي أصلًا ولا بيستخدمها الأجانب ليه ، لازم نعرف معنى الزمن دا وليه بنستخدمه عشان نعرف نحل

دا بالنسبة للاختياري ندخل على رقم 2

2- القطعة ، القطعة دي هي سبب مشاكل معظمنا ( أنا أول واحد ) عشان بيبقى فيها كلمات كتير صعبة وبتحتاج تركيز جامد في الإمتحان

عشان أحل قطعة لازم أول حاجه يكون عندي حصيلة كلمات تكفيني عشان أترجم على الأقل 70% من القطعة ، يعني من بين كل 10 كلمات تكون عارف معنى 7 ،

نيجي بقى للحل ، أول حاجه اقرأ الأسئلة قبل ما تقرأ القطعة ، بعد ما تقرأ الأسئلة خلي أسئلة "ما رأيك" او "هل تعتقد" للآخر ، ركز الأول في الإختياري ، بعدين اقرأ القطعة كلها مرة واحدة عشان تعرف هي بتتكلم عن ايه ، ومش شرط على فكرة تكون عارف ترجمة الكلمة الرئيسية أو الحاجه اللي هو بيتكلم عليها ، زي القطعة اللي جاتلنا في الإمتحان اللي فات ، كان بيتكلم عن طائر الطنان اللي طبعًا معظمنا مكناش عارفين معنى الكلمة ، في الحالة دي تشوف صفات الحاجه اللي بيتكلم عنها ، هيقولك مثلًا ريشه ملون ، طيب أنا مش عارف معنى كلمة ريش أعمل ايه ؟ مفيش مشكلة خالص ، المهم ان انتا عرفت انه بيتكلم عن حاجه بتخص الكائن دا ملونه ، بعدين تتابع القطعة هتلاقيه كان بيقول يطير بسرعة كبيرة ، يبقى هنا عرفت انه بيتكلم عن حاجه بتطير ، ممكن طيارة أو صاروخ ، وممكن طائر عادي

بعدين تفتكر انك كنت مترجم كلمة ملون ، يبقى أكيد مش هيوصف الطيارة ويقول ملونة يبقى أكيد بيتكلم عن طائر

لما توصل للنقطة دي يبقى انتا كدا يعتبر حليت القطعة خلاص ، بعد كدا تبدأ تمسك الأسئلة سؤال سؤال ، ومتحلش بالترتيب لأن دا هيضيع الوقت ، امسك السؤال الأول في الاختياري وحاول تلاقي اجابته ، طيب لو ملاقيتش ؟ متقرأش القطعة تاني ، انقل عاللي بعده وهكذا

لحد اما تخلص الاختياري ، بعدها تنقل عالمقالي واللي كله تفكير ابداعي ، في المقالي الأول تحل السؤال عربي ، اكتب أي كلام بس خليه منطقي لأنه كدا كدا في الإبداعي مفيش اجابة معينة ، بعدين ترجم للإنجليزي ولو في كلمة معرفتش تترجمها حط كلمة مكانها قريبة في المعنى...

نيجي لتالت حاجه
3- الترجمة

الترجمة بتنقسم لترجمة انجليزي وترجمة عربي ، وعشان تحل ترجمة بسهولة متحفظش كلمات ، احفظ جمل
اللي هو تحل الترجمة على بعضها وبعدين تحفظها يعني معتقدش تجيب قواميس وتحفظ كلمات ، صدقني هتنساها بسرعة ، الحل انك تبدأ تحفظ جمل على بعضها ، ولما تيجي تتدرب عالحل يبقى تترجم جمل بتتكلم على نفس الموضوع

يعني مثلًا تحل ترجمات عن الإقتصاد بس او عن الطب بس
عشان الكلمات لما تتكرر معاك هتحفظها بسهولة أكبر او على الأقل هتعرف الكلمة دي بتيجي مع انهي مجال

في الترجمة الإنجليزي وانتا بتحل لازم أول حاجه تعرف نوع الترجمة ، يعني اقتصاد ولا سياسة ولا رياضة ولا ايه بالظبط ، بعدين تبدأ تحل والكلمة اللي تقف قدامك لو فعل تشوف اللي بعديها ايه وبعدين تربط بين الحاجه دي والفعل اللي دايمًا بييجي معاها ، طيب لو العكس ، يبقى لازم تخمن على حسب موضوع الترجمة يعني لو اقتصاد اتوقع ان الكلمة دي مثلًا معناها احتكار او تجارة او سلع ، شوف انتا بقى الموضوع وحاول تخمن

لو بقى ترجمة من عربي لانجليزي دي بقى أسهل بكتير
انتا ممكن تحط أي كلمة مكان الكلمة اللي انتا مش عارفها ( الا لو كلمة اساسية ) انما مثلًا بالنسبة للأفعال ممكن تعوض بأي فعل مكان الفعل اللي مش عارفه ، يعني ينفع تحط فعل kill مثلًا مكان الفعل "يغزو" لو مش عارف معناه

انما في الأسماء مينفعش الموضوع دا ، عشان كدا لازم يكون عندك حصيلة كلمات واللي هتيجي بالتدريب المستمر

نيجي بقى لآخر سؤال ألا وهو
4- المقال " Essay "

دا بقى لو بتعرف تحل تعبير عربي يبقى مش هيعملك ادنى مشكلة

طيب لو مش قد كدا ومعندك حصيلة كلمات كبيرة يبقى الحل انك تحفظ مقدمة وخاتمة طويلة ، وبعدين تكتب أي كلام في النص على حسب عنوان الموضوع ، وتحاول تنظم الموضوع وعمل مسافات وتلتزم بالمسافة في أول الفقرة وكمان الفواصل والنقط لأن هو دا اللي بيدي انطباع كويس للمصحح

الرجوع الى أعلى الصفحة اذهب الى الأسفل

مُشاطرة هذه المقالة على: redditgoogle

لا يوجد حالياً أي تعليق

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى