كلية اللغات والترجمة من الألف لليــاء

استعرض الموضوع السابق استعرض الموضوع التالي اذهب الى الأسفل

10082020

مُساهمة 

. كلية اللغات والترجمة من الألف لليــاء




كلية اللغات والترجمة من الألف لليــاء 11986
تعادل كلية اللغات والترجمة بجامعة الأزهر كليات الألسن بجامعات التعليم العام
يعنى اية كلية الالسن ؟
كلية الالسن هية كلية لغات بتدرس فيها لغتين الاولى اسمها الفرست والتانية اسمها السكند " كلمة فرست وسكند دول عبارة عن مصطلحات هتسمعهم كتير اوى ف الكلية "

اية هية اللغات ( الاقسام ) الموجودة ف كلية الالسن جامعة عين شمس ؟؟
1- قسم اللغة العربية.2- قسم اللغة الإنجليزية.3- قسم اللغة الفرنسية.
4- قسم اللغة الإيطالية.5- قسم اللغة الإسبانية.6- قسم اللغة الألمانية.
7- قسم اللغات السلافية ويضم:
(أ) شعبة اللغة الروسية
(ب) شعبة اللغة التشيكية
8- قسم اللغة الصينية.
9- قسم اللغات الأفريقية ويضم:
(أ) اللغة السواحيلية
(ب) لغة الهوسا
10- قسم اللغات السامية (العبرية).
11- قسم اللغات الشرقية الإسلامية ويضم:
(أ) فارسي
(ب) تركي
12- قسم اللغة اليابانية.
13- قسم اللعة الكورية.

- اية هية اللغات ( الاقسام ) الموجودة ف كلية الالسن جامعة المنيا ؟
ايطالى , المانى , اسبانى , انحليزى , صينى , فرنسى وانا كاتبهم عشوائى مش بترتيب , ومفيش لا هولندى ولا كورى ولا يونانى ولا يابانى هيفتحوا جديد ف الكلية عشان الشائعات اللى بتطلع دى , هية الاقسام دى بس اللى عندنا

- ازاى اعرف نسبتى ف مجموع التلت لغات بتوع الثانوية العامة ؟
انت بتجيلك اللغة على اساس درجات التلت لغات بتوعك اللى درستهم ف الثانوية العامة " العربى – الانجلش – اللغة التانية سواء فرنش او المانى"
هتجمع درحاتك فيهم وتضربهم ف 100 وتقسمهم على المجموع الاصلى للتلت مواد دول وبكدة هتعرف نسبتك

ملحوظة : لو انت من دارسى الالمانى ف الثانوى وعاوز تخشة ف الكلية ف انت هتخشة من غير تنسيق اصلا هتكتبة بس ف ورقة الرغبات (وهقولك ازاى ) وهيجيلك علطول ودا بينطبق على الالمانى بس مش على اى لغة تانية , اما بقى لو انت مش من دراسى الالمانى ف الثانوى وعاوز تخشة بردة ف ممكن تخشة عادى بس هيبقى بتنسيق والتنسيق ممكن يحتم عليك متدخلوش عشان ممكن متكونش جايب نسبتة اللى هتتحدد فيما بعد ان شاء الله , بالنسبة للغات الباقية كلها بتنسيق عادى هوة الالمانى بس اللى فية استثناء صغير

- اية الفرق بين اللغة اﻻولى واللغه التانية ؟
اللغة اﻻولى هية لغة التخصص هتدرسها ع مدار 4 سنين , اللغة التانية مادة هتدرسها محاضرتين ف اﻻسبوع على مدار الاربع سنين بردة , بمعنى ان انا قسم اللغة اﻻيطالية بيبقى عندى عدد المواد فيها 8 بيبقى 6 مواد للايطالى + مادة لغة عربية + مادة لغة تانية

- لية الكلية بتحط تنسيق للغات ؟
اﻻعتقاد السائد عندكم ان التنسيق عبارة عن تقييم اﻻقسام واهميتها ودا غلط , التنسيق ما هو اﻻ توزيع اعداد بمعنى ان قسم المانى عايز 100 طالب بس ف ببحطوا شرط اﻻلتحاق بالقسم بتكون بنسبة معينة يكون عدد الحاصلين علي النسبة دى 100 بس , مثلا قسم انجليزى عايز 80 طالب بس فبيحط شرط اﻻلتحاق بالقسم تخلى ان العدد ﻻ يتجاوز 80 , من اﻻخر التنسيق مش مقياس ﻻهمية اللغة عشان بس الناس اللى بتقول دا مقياس ﻻهمية القسم ﻻ هو عنصر تحديد وتوزيع اعداد مش اكتر

- مجاﻻت العمل " لما اتخرج هشتغل اية " ؟
اى لغة خلقها ربنا ليها شغل واحد وهو الترجمة , الارشاد السياحى بس لازم يا اما تاخد دبلومه ارشاد سنتين في اي معهد خاص او تنجح في امتحان الوزاره في الارشاد الي بيتعمل كل سنه , ممكن تبقى معلم او محاضر ف اى سنتر , ممكن تكمل وتعمل دراسات عليا , ممكن تشتغل كول سنتر او ف بنوك او شركات بانوعها لان بيبقى فيها اقسام ترجمة او ف العلاقات العامة او ف السفارات او السلك الدبلوماسى ممكن تشتغل ف اى مدرسة حكومية لما تعمل دبلومة تربوية , ممكن تشتغل ف اى مدرسة انترناشونال كبيرة , او اى مدارس للغات .. الخ , الشغل كتير بس انا دايما بقول بلاش ننط مرحلة مش اوانها ادرس الاول واتقن الحاجة اللى انت فيها ساعتها ربنا هيوسعلك كل الطرق اللى تكون بيها حاجة كويسة

- اللغات اللى ليها تقدير ف الكلية ؟
مافيش حاجة اسمها لغة ليها تقدير , التقدير بيجى بالمذاكرة وعلى الرغم من ذلك ناس جايبة امتيازات اﻻ انها ممكن متكونش متقنة اللغة وممكن ناس تكون جايبة مقبول وعايدة السنة اﻻ انها قادرة على التحدث للغة بطلاقة ف التقدير ليس معيار ﻻتقان اللغة ودا ميمنعش انك تجيب تقدير بردة

- ألسن احسن من الكليات التانية ف اية ؟
اﻻلسن بتخليك متمكن من لغة زى اهل اللغة نفسها واصحابها ودا ف حد ذاتة ميزة بتخليك شخص مطلوب ف السياحة والترجمة والعلاقات العامة ف الشركات وغير ذلك ويمكن من خلالها الدخول ف مجال اﻻعلام والسياسة وهذا يتوقف على اتقانك للغة

- ينفع اشتغل باللغة التانية ولا لاء ؟
زى ما قولت اللغة التانية مادة فقط وعلى الرغم من ذلك يمكن ان تدعمها بالكورسات وخاصة كورسات المحادثة حتى تستطيع ان تجعل اللغة التانية كاﻻولى ( اللغة اﻻولى هية اللى هتشتغل بيها وممكن تشتغل بالتانية بردة على حسب قدراتك فيها )

- انا سمعت ان اﻻلمانى اهم من ايطالى والصينى اهم من اﻻنجلش واللغة دى احسن واهم من اللغة دى واللغة دى ليها مستقبل وشغل عن اللغة دى ؟
العبرة مش ف بتسمع وﻻ ﻻء الموضوع بيتركز على حاجة واحدة وهية العلاقات الدبلوماسية واﻻقتصادية والسياسية بين مصر والدولة صاحبة اللغة دى لذلك السياسة ليها علاقة كبيرة ف موضوع اللغات دى وف عملية العرض والطلب عليها ف ممكن النهاردة لغة مطلوبة بكرة ميبقاش ليها سوق والعكس , فسيب حاجة زى دى بأيد ربنا المهم بس تتقن اللغة واتقانك للغة بيخلق ليك اى فرص للعمل , اللغات كلها حلوة وجميلة وكل سنة بقول كدة مافيش اى فرق ما بين اى لغة والتانية , انا دخلت ايطالى من غير ما حد يقولى خشها ولا كنت اعرف عنها اى حاجة دخلتها وقولت ان شاء الله هنجح فيها وهدرسها كويس واحاول اتعلمها على قد ما اقدر , عشان كدة كل واحد قرار نفسة عشان متقولش ف الاخر دى الناس هية اللى قالتلى ولا تلوم اى حد ..

مفيش لغة اسمها ملهاش شغل او مستقبل ف مصر والا مكنوش نزلوها ف البلد دى ودرسوها لينا , هية معادلة بسيطة عاوز تشتغل اتقن اللغة اللى انت بتدرسها اى كانت , اتقنت اللغة يبقى انت مش هتدور على شغل , الشغل هوة اللى هيطلبك لانهم هيبقوا محتاجين حد زيك متقن للغة عشان تعود بالنفع عليهم , الالمانى مش افضل لغة والصينى مش هوة بس اللى لية شغل والانجليزى اة اللغة الاولى على مستوى العالم كلة بس دا ميقللش من اهمية اللغات التانية ف اى حاجة , ف بدل ما تفكر انهى لغة احسن , فكر ازاى تبقى متفوق ف اللغة اللى انت هتختارها وانت متعرفش عنها حاجة ( وهقولك ازاى تختار اللغة اللى تناسب قدراتك )

- هدرس اية ف اللغة اﻻولى ( لغة التخصص ) ؟
هتدرس اللغة من كل جوانبها ادب ونصوص وجرامر وترجمة ومقال واستماع ومحادثات حتى تتمكن من اللغة كاهل اللغة واصحابها

- مواد الكلية ؟
عربى - لغة تانية - نصوص - استماع ومحادثات - مطالعات ومقال - دراسات لغوية (جرامر / انلزى ) - ادب وحضارة - ترجمة من العربية - ترجمة الى العربية دا بالنسبة لبعض اللغات زى الايطالى والاسبانى والالمانى والفرنسى والصينى
ملحوظة :بالنسبة ل الانجلش بقى فية مواد متغيرة زى مثلا حضارة ودراما وشعر ونقد , الحضارة هية هية الادب والشعر والنقد هوة هوة النصوص , هية بس تغير ف الاسماء مش اكتر.

- العربى بتاع الكلية زى بتاع ثانوى ؟
ﻻ مفيش علاقة بين دا ودا وبيعتمد على الحفظ عندنا عشان اكون صريح بس دا اخر السنة انما المحاضرات اغلب الدكاترة بتبقى متعاونة وبتخليك مبسوط بالمحاضرة وهية ممتعة بصراحة وبتتعلم منها حجات كويسة جدا وكمان بتخرجك من مود اللغة بتاعك وكدا

- انا سمعت انى هدرس حاسب ألى اية حكايتة دا ؟
الحاسب الالى مادة زى كل المواد هتدرسها ف الترم الاول من سنة اولى بس ومش هتشوفها تانى بقية حياتك , المادة دى عليها 100 درجة , مش صعبة ولا حاجة انك تجيب فيها تقدير كويس , لانك لو جبت فيها تقدير كويس هيرفعلك التقدير العام بتاع الترم كلة , بتبقى عبارة عن محاضرة واحدة كل اسبوع ودا بيبقى علية ربع الدرجة اخر الترم ف الورقة , الى جانب دا فية عندك الميد ترم ودا علية جزء من درجة المادة , وفية امتحان العملى ودا بردة علية جزء من المادة , وفية الشيت بتحلة وبتسلمة وبردة علية جزء من المادة ف انت من السهل اوى تجمع في المادة دى درجات كتير

- السكند كام محاضرة ف اﻻسبوع ؟
السكند بيبقى لية محاضرتين ف اﻻسبوع كل محاضرة 4 ساعات ودا اللى متسجل ف الجدول بس اللى بتاخدة منها فعليا مش اكتر من 3 ساعات دا اذا مكنش ساعتبن ودا على حسب كل سكند وايضا كل دكتور

- هاخد كورسات امتى ؟
ف الصيف بعد اول سنة ف الكلية افضل عشان يبقى عندك اساس ف اللغة وتعرف تتعامل ف الكورس وخاصة لو هتاخد كورس ف مكان محترم اللى بيدرسوا فية اجانب مثلا ف تبقى فاهم الدنيا ماشية ازاى.

- اخد سكند انجلش ؟
راى الشخصى اﻻنجلش مهم جدا جدا جدا جدا , عايز تاخد لغة تانية جديدة سكند وتظبط اﻻنجلش كورسات او لو انت اصلا كويس ف الانجلش ومش محتاج تاخدة ف الكلية تمام بس تبقى واثق من انك متمكن فية فعلا , انما خد بالك السوق محتاج انجلش فلازم يبقى معاك انجلش ف ظبط اولوياتك بقى انت عارف انت عاوز تعمل اية

- مجاليش السن وحاسس ان مستقبلى ضاع ؟
مين قال كدا المستقبل بايد ربنا وألسن مش الكلية الوحيدة اللى ممكن تدرس من خلالها لغات انت ممكن تاخد اللغة دى ف اكتر من مكان زى تربية او أداب بس اوعى تفقد اﻻمل وحط ف دماغك (قل لن يصيبنا اﻻ ما كتب الله لنا هو موﻻنا وعلى الله فليتوكل المؤمنون ) صدق الله العظيم

- السن وﻻ تجارة انجلش وﻻ اعلام وﻻ سياسة واقتصاد ؟
انت بايدك تختار المجال اللى نفسك تتخصص فية انما من رائ المتواضع انك من خلال كلية اﻻلسن واتقانك لغة او اتنين دا يديك فرصة انك تسخر نفسك ﻻى مجال من دول , كورس ادارة ومحاسبة هيخليك زى تجارة بس انت احسن منة انك معاك لغتين او اكثر كورس علاقات عاملة هيخليك اقوى من بتاع اعلام بكتير لما تتقدم ف امتحانات السفارات هما مشترطين اتقان لغتين ودراسة بعض المواد انت كدا كدا معاك اللغتين مش هيبقى قدامك غير كام مادة هتذاكرهم بس دى نظريتى ورأى واقتناعى الشخصى.

- اية هية البطاقة العسكرية ( للاوﻻد ) ؟
دى بطافة لتأجيل التجنيد للذكور بيبقى لونها لبنى ممكن حضرتك تجبها من مديرية اﻻمن.

- اية التدريب العكسرى ( للاوﻻد ) ؟
التدريب العسكرى دا بيبقى مدتة اسبوعين تحت اشراف عسكرى بتعملة ف اى وقت طوال اﻻربع سنين بس يستحسن يكون ف سنة تالتة او اى وقت انت تحب تعملة فية , اجرئاتة بتروح مكتب التجنيد وتسحب استمارة تدريب عسكرى بيبقى عبارة عن كام محاضرة بتمتحن فيهم وخلاص

- الكلية ليها نقابة زى المهندسين والاطباء كدة ؟
ﻻ ملهاش بس على ما اعتقد ان فية حاجة تحت اﻻنشاء والفكرة مطروحة بالفعل

- السن المنيا وﻻ عين شمس ؟
السن عين شمس عريقة وقوية عين شمس تضم 16 قسم انما المنيا 6 اقسام فقط تقدير ال جيد جدا ف عين شمس بمثابة اﻻمتياز ف المنيا ولكن ﻻ يوجد جامعة افضل من اخرى بامكانك اثبات انك اﻻفضل من الكل , ف للمنيا مميزات ﻻ توجد اطلاقا ف عين شمس وهية ان المنيا اوﻻ العدد فيها صغير جدا يعنى اكبر قسم مش هيتعدى ال 120 دلوقت انا كطالب لما اقعد وسط عدد صغير من الطلبة افضل وﻻ لما اقعد وسط 400 لما اقعد على مقعد وبراحة تامة والمكان يساعى جميع الطلبة وزيادة وﻻ ملاقيش مكان واقعد ع اﻻرض
تانى حاجة السن المنيا مش سهلة زى م ناس كتير مفكرة اﻻمتحانات فيها شئ من الصعوبة لقياس قدرات الطالب فقط ﻻ للتعقيد طبعا مش زى عين شمس بس بتقاربها ف درجة الصعوبة ويثبت كدة ان كل قسم فية ناس منة بتقع زينا زىهم وغالبا الناس دى بتبقى شاطرة ﻻ يعانوا من الفشل اطلاقا بس ظروف التعليم واﻻمتحان والدكاترة وايضا فية طلبة مبتبقاش عملت اللى عليها ف بينزلوا ف بدام انت بتعمل اللى عليك هتجيب تقدير كويس , عندنا دكاترة على مستوى عالى جدا بل يكاد معظمهم كانوا خريجى جامعة عين شمس عندنا فية دكاترة صعبين ودكاترة سهلين بس جميعم قمة ف اﻻخلاق واحترام ف التعامل بلا استثناء هتحس انك ابنهم مش مجرد دكاترة وانت طالب , بلاش تبص للحاجة من برا بص لجودة التعليم بص للاهتمام متبصش للاسم والفخامة , لو انت محتاج حاجة ممكن تسال فيها عاوز دكتور يعيد لك جزء مش فاهمة ف ببعدهولك على عكس لما يكون القسم زحمة ومفيش مجال ووقت للاسئلة , انا ﻻ اعيب ف اى كلية اطلاقا انا فقط اذكر مميزات جامعتى واﻻحترام للكلتين بلا استثناء.

- اية انشطة الكلية ﻻنى لسة خارج من ثانوى وهطق من الزهق ؟
الكلية فيها انشطة وندوات علمية ومسابقات كتير وحفلات ﻻكتشاف المواهب ف الغنى والشعر ومسابقات كرة قدم ويوم رياضى ورحلات الى اماكن عديدة زى شرم الشيخ والفيوم والقاهرة وزيارات الى اماكن متعددة زى مستشفى 57 او دار الايتام واﻻتحاد هوة اللى بيشرف على اﻻنشطة دى ﻻن اﻻتحاد بينظم اكتر من نشاط فنى ورياضى واجتماعى وثقافى ودا بيدفع الطلبة للانخراط ف الحباة اﻻجتماعية.

- هوة انا ف الكلية ﻻزم اذاكر كام ساعة ؟
والله السؤال دا ملوش اجابة الفكرة انك ازاى تقدر تلم كمية المعلومات اللى بتاخدها يعنى فية حجات ممكن تاخدها تروح البيت ماتخدش منك وقت وفية حجات بتبقى محتاجة مجهود ووقت اكبر المهم اﻻستيعاب.

- ازاى احسن نفسى ف اللغة ؟
كورسات ف الصيف ف اللغة اللى انت بتاخدها تسمع اغانى ونشرات اخبار او اذاعة للغة اللى انت بتدرسها , "هتقولى قال يعنى انا اللى لسة ف اولى ومخدتش حاجة هفهم كلمة" , هقولك ان المغزى مش انك تفهم المهم ودانك تاخد على اللغة ونغامتها وطريقة القائها والتعبير عن المفرادات بتاعها واكيد بعد الترم اﻻول اى حاجة هتسمعها هتلاقى فية كلمات انت عرفتها ﻻن فية كلمات اساسية ف اى لغة وكمان فية افعال , اﻻمر شاق بس محتاج مجهود شخصى منك.

- اية الاماكن اللى فيها كورسات كويسة ؟
زى ما انتو عارفين فية لكل لغة ف مصر مركز ثقافى , والمراكز الثفافية دورها مش بيقتصر بس على تنظيم ندوات للتعريف بحضارتها ومدي التقدم الذي تشهده في الوقت الحاضر ولا إثراء حركة التبادل الثقافي مع بلادنا وإرساء سبل الحوار الحضاري وتنمية العلاقات السياسية والاقتصادية وإقرار السلام بين الشعوب ولكن ايضا المراكز دى بتساعد بشكل كبير على تعليم لغة البلاد التابعة لها , صحيح الكورسات دى بتبقى غالية بس بتبقى معتمدة ونظيفة احسن من اماكن تانية كتير مبيُعترفش بيها.

- اية اﻻقسام اللى ليها منح ؟
المنح بتعتمد على اﻻتفاقيات الدولية بين جامعة المنيا والجامعات اﻻخرى ف ألسن , و اﻻقسام اللى ليها منح "اسبانى والمانى" معرفش بصراحة باقى اﻻقسام فيها وﻻ ﻻء بس مش شرط المنح تكون عن طريق الكلية ممكن يبقى من خلال التواصل بين جامعة ف الدولة اللى انت بتدرس لغاتها وتروح تدرس هناك ف اﻻجازة او من خلال السفارات التابعة للدول اللى انت بتدرس لغاتها او من خلال المراكز الثقافية.

- انا محتار اخش قسم اية ؟
الناس اللي لسة محتارة تدخل قسم ايه نصيحتي ليكم اسمعوا اللغة و اتعرفوا على حروفها من خلال النت او اليوتيوب و اختاروا اللي تعجبكوا , المهم بلاش تخلوا حد يقررلكوا , مش احنا اللى هنقولكوا تخشوا اية دا مستقبلكوا انتو , اتحملوا قرار اختيارتكوا وخليكوا قدة واتعبوا عشانة هتلاقوا كل خير ان شاء الله , مش لازم تمشوا ورا كلام حد لان كل واحد بيقول كلام ممكن يبقى سبب ف تعاستكوا وندمكوا مدى الحياة , انتوا قرار نفسكوا مش حد تانى.

- هية الالسن موجودة فين بالظبط ؟
السنة دى تم افتتاح كام كلية للاسن على مستوى الجمهورية دا غير كليات اللغات والترجمة اللى تم تحويل اسمها الى الالسن وهما كالاتى ( ألسن عين شمس - ألسن المنيا - ألسن اسوان - ألسن سوهاج - ألسن الاقصر "جنوب الوادى" - ألسن بني سويف - ألسن كفر الشيخ - ألسن السويس "الاسماعيلية " ).

- انا بطاقة الترشيح جاتلى ألسن المنيا هعمل اية بعد كدة ؟
هتروح كليتنا الجميلة ف ميعاد التقديم ودا الكلية هتحددة وهتعرفة لوحدك وهتاخد معاك الاوراق التالية واوعى تنسى حاجة عشان متتسوحش : اصل شهادة الثانوية العامة + صورتها / اصل شهادة الميلاد كمبيوتر + صورتها / صورة البطاقة الشخصية بتاعك او صورة بطاقة ولى الامر لو انت مطلعتش بطاقة لسة / عدد 6 صورة شخصية ليك واكتب عليهم كلهم اسمك من الخلف / بطاقة الترشيح اللى مكتوب فيها انة جالك ألسن المنيا اطبعها من على النت وخدها معاك / نموذج 2 جند للطلاب الذكور / الطلاب الذكور مواليد 97 وما قبلها ضرورة احضار البطاقة العسكرية ( استمارة 6 او 7 جند ) / مصروفات الكلية / قيمة دليل الكلية / دوسية بلاستيك وحط فية كل الورق دا عشان ف الشئون هياخدوة منك عشان يبقى ليك ملف خاص بيك هناك , ولو فية اى حاجة زيادة غير دا بردة هتعرفوا قبل ميعاد التقديم.

- طب انا ازاى ارتب الرغبات بتاعى ؟
اول ما تخش مكتب شئون الطلبة ف الكلية وبعد ما تقدم ورقك وملفاتك , هتاخد ورقة عشان تبدا ترتب رغابتك هتلاقى خانتين :
الخانة الاولى للغة الاولى "الفرست , لغة التخصص" فية 6 خاانات معملوين على اد ال 6 لغات , المطلوب منك ترتب اللغات دى ف الفراغات على حسب ميولك
تعالى افهمك اكتر : نفترض انك هتموت وتخش ايطالى هتكتب ف الخانة الاولى ايطالى , هتقول لنفسك افرض ملحقتهاش يبقى لازم تأمن نفسك وتشوف ممكن تخش اية غير الايطالى عشان لو جاتلك يبقى عادى بالنسبالك ومتزعلش ف تكتب ف الخانة التانية ولنفرض المانى , وتفضل تقول لنفسك كدة لحد ما تكتب الرغبة السادسة , يبقى انت كدة اسمك رتبت الرغبات حسب ميولك عشان لو مجتلكش اللغة اللى انت كاتبها ف الخانة الاولى تجيلك التانية او التالتة او الرابعة وهكذا
الخانة التاينة بقى للغة التانية " السكند , لغة جانبية " فية خانتين هتكتب ف الخانة الاولى اللغة اللى انت عاوز تدرسها لغة تانية ولنفرض انجلش , هية كدة كدة هتجيلك ف حالة واحدة لو مجالكش ف الفرست انجلش لان مينفعش تختار فرست وسكند لغة واحدة متشابهة . وتكتب ف الخانة التانية اى حاجة يمكن بردة تجيلك , بس مع العلم ان اللغة التانية ملهاش رغبات ولا تنسيق ولا اى حاجة واللى بتكتبة بيجيلك علطول
تعالى افهمك اكتر : نفترض ان جالك ف الفرست المانى وانت كاتب ف السكند المانى وانجلش يبقى هيجيلك انجلش لان ماينفعش تاخد المانى فرست والمانى سكند عشان كدة بيحطولك خانتين فاضيين ف اللغة التانية.

- انا جايب 47 انجلش و 75 عربى و 48 فرنش هلحق اقسام اية ؟
عندنا ف ألسن المنيا مافيش حاجة اسمها كدة , تنسيق كل لغة مبيتحددش على اساس درجاتك ف الانجلش والفرنش والعربى كمواد منفردة , يعنى كل اللى عليك هتعمل زى ما ذكرت ف اول البوست هتجمع درجاتك ف التلت مواد وتضربهم ف 100 وتقسمهم على المجموع الاصلى ليهم هتلاقى نسبتك من 85 % فيما فوق ف انت كل ما نسبتك تبقى عالية كل ما فرصتك ف انك تلحق الاقسام كلها بيبقى اكتر , وبردة هرجع اقول التنسيق دا بيتحط عشان خاطر بيبقوا عاوزين اعداد معينة لكل قسم بحيث يبقى فية توزان , والا بقى لو كل الطلبة كتبت المانى رغبة اولى تخشها والاقسام الباقية تبقى فاضية.

- طب انا مش من المنيا هسكن ازاى وفين ؟

((1))- بالنسبة للولاد هتسكن ف المدينة الجامعية اللى معمولة للمغتربين من كل حتة , ودى بتبقى من شهر 7 لحد شهر 12 للى هما مواليد 1998 طب معنى كدة لو انت اكبر كام شهر مش هتسكن ف المدينة , لا هتسكن بردة بس مش ف اول الدراسة زيهم هتتاخر شوية حوالى اسبوعين تلاتة شهر كدة وبعدين هيجيلك الموافقة عادى , لانها بتبقى مجرد اولوية لصغار السن ولما كلهم بيسكنوا وبيبقى فية اماكن فاضية لسة بينزلوا السن شوية عشان الباقى يسكن هوة كمان
بالنسبة للبنات : هتسكنى علطول بدون اى شروط .

هام جدا : سيتم فتح باب التسجيل للمدن الجامعية يوم 2016/9/1

- انا لقيت المدينة زحمة وهبصة ومش هتناسبنى اعمل اية ؟
((2))- فية سكن خارجى للمغتربين ودا كتير اوى وف كل حتة ودى قايمة بالجميعيات الموجودة ف المنيا اللى هتلافى فيها سكن سواء للبنين او للبنات : الجمعية الشرعية 2363434 / جمعية الفتح الإسلامية 2366051 / جمعية الشبان المسلمـين 2363176 / جمعية الشبات المسلمـات 2363221 / الجمعية الإسلامية بالإخصاص 2365762 / جمعية مصعب بن عمير بشاهين 2362756 / دار الكاثوليك بأرض السلطـان 2364567 / الإنجيلية شارع عدلي يكـن 2364567 / دار المغتربين بطه السـبع 2364659
- انا مش عاوز مدينة ولا ليا ف جمعيات وعاوز شقق مستقلة ف عمارات عادية فية ولا لاء ؟
((3))- طبعا فية فى اماكن زى " دماريس وشلبى و طة حسين وعدنان والاخصاص " وف كل حتة واللى يسأل ميتهوش المنيا كلها اوضة وصالة , والاماكن دى كلها جنب الكلية مش بعيدة سواء اللى قريب اوى زى دماريس و شلبى وف الحالة دى هتاخدها مشى ربع ساعة , او اللى بعيد زى طة حسين وعدنان والاخصاص ودول هتركبلهم سرفيس 10 دقايق وتكون ف الكلية.

- طب انا هقدم مدينة ازاى وامتى ؟
زى ما قولت فية فترة بتتحدد من قبل المدينة وخلاللها بتبدأ تعمل الاجراءات الاتية : اول حاجة المدينة بتاعنا تبع نظام اسمة الزهراء لادارة المدن الجامعية ودا موقع على النت عن طريقة بتبدا تسجل بياناتك علية عشان البيانات دى تروحلهم هناك وبتستنى بقى نتيجة القبول بتاعك ألكترونيا , بيبقى معاك رقم سرى انت بتسجلة من ضمن البيانات دى لازم تحفظة صم عشان دا الرقم اللى هتشوف بية على النت بردة اذا كان اتقبلت ف المدينة ولا لسة هتتأخر شوية , طب انت جالك القبول هتعمل اية بقى تعالى اقولك :
هتروح سايبر تطبع الاستمارة اللى مكتوب فيها انك اتقبلت وبتاخدها وانت رايح للمدينة بقى عشان تقدم اوراقك ومع الاستمارة دى هتاخد شهادة الميلاد وخد معاك صور شخصية ليك بزيادة وضورة بطاقتك او بطاقة ولى الامر وفية كام ورقة بتملاهم كدة من على النت هتعملهم ف السيبر بس خد بالك الورق دا هتملاة وتطبعة مش هتملاة بخط الايد عشان غلط وتاخد معاك مبلغ كويس مش عارف كام بالظبط لان كل سنة بيتغير عشان تدفعة مقدم لسكنك ف المدينة وكدة انت بقيت ف المدينة.

- اية هو الكشف الطبى دا هما هيكشفوا عليا ولا اية ؟
الكشف الطبى دا ما هو الا اجراء روتينى بتعملة وتجبلهم اثبات ف الكلية انك عملتة , بيبقى عبارة عن شوية اسئلة بيسألوهالك زى : نفسك تبقى اية , اية هية هوياتك المفضلة , باباك بيشتغل اية .... الخ
هتعملة ف الوقت اللى الكلية بردة هتحددة بيبقى قبل ما تبدا الدراسة بكام اسبوع , وعلى ما اتذكر بيبقى ف مبنى علوم , لو انت مش فاضى ومش عاوز تروح مخصوص او لو انت من مكان بعيد ممكن تعملة اول يوم ف الدراسة عادى جدا
- الكلية فيها ساعات معتمدة ولا لاء وهل الكلية واخدة الجودة زى ألسن عين شمس ولا لاء ؟
لا للاسف مفيهاش ساعات معتمدة , ولا واخدة الجودة

- فية امتحانات ميد ترم ولا فاينل بس ؟
لحد السنة اللى قبل اللى فاتت كان الميد ترم ملغى , السنة اللى فاتت بدأو يطبقوة على سنة اولى وسنة تانية , وان شاء الله هيطبق على الدفعة الجديدة , الميد ترم دا مهم جدا جدا جدا , لو آديت فية بشكل كويس هترتاح اوى ف امتحانات الفاينل لان الميد ترم بيبقى علية 10 % من كل مادة , هتلاقى نفسك جبت تقدير كويس اوى وانت مرتاح ودى تقدر تسميها اعمال السنة بتاعك , بيبقي ف الاول صدمة للطالب فى اولى لأن ديما انتو كنتوا متعودين نخلصوا المناهج قبلها ب 3 شهور في الثانوية العامه ونراجع انما هنا هتلاقي نفسك يا دوب بتخلص مذاكره اللي عليك ، ثانيا هتلاقى نفسك مكملتش شهر ف الكلية وبيقولولك فية امتحانات الاسبوع الجاى متخافش ولا تتوتر الامتحانات بتبقى سهلة وبسيطة جدا
ملحوظة : الاستاذة اللى موجودين ف مكتب شئون الطلاب من احسن الناس اللى ممكن تشوفهم ف حياتك , ناس بشوشة وبتضحك هيفتحوا نفسك على الكلية وعلى الحياة كلها لما تشوفهم وتتعامل معاهم وهتقدم ورقك وهتكتب رغباتك ف 5 دقايق وتكون ماشى وعن تجربة شخصية , محرد ما تخش المكتب هتلاقى اللى يقوم معاك بالواجب وزيادة اوى وهيساعدوك وهيفهموك كل حاجة ف متشلش اى هم ومتاخدش فكرة وحشة عنهم زى ما بيتقال عليهم ف اى كلية واى جامعة , عندنا حاجة تانية خالص ..

وأنشئت بهدف حفظ التراث الإسلامي ونشر حقائقه، ودراسة الإسلام وتدريسه، من خلال تخريج علماء يستطيعون التواصل مع الجميع باختلاف لغاتهم بحسب الهدف المعلن من قبل الكلية، وتخرج عدد كبير من دارسي اللغة كل عام.

يدرس بكلية اللغات والترجمة بالأزهر معظم لغات العالم الإسلامي وهي «التركية، الفارسية، الأردية، وعدد من اللغات الإفريقية الإسلامية»، وكبرى اللغات الغربية «الإنجليزية، الفرنسية، الألمانية، الصينية، واللغات الإفريقية»، حيث بدأت بقسمي اللغة الإنجليزية والفرنسية، ثم أخذت في التوسع حتى أصبحت تضم 12 قسم.
أقسام الكلية
قسم اللغة الإنجليزية وآدابها

يتضمن القسم ثلاث شعب هي«الأدب، الترجمة الفورية، والدراسات الإسلامية باللغة الإنجليزية».

شعبة الأدب: تهدف إلى تخريج جيل يلم بالأدب الإنجليزي، تمهيدا لعمله في مجال التدريس.

شعبة الترجمة الفورية: تهدف إلى تخريج من يمتلك مهارة الترجمة الشفوية والكتابية، تمهيدا لعمله مترجم في الأماكن التي تتطلب هذا العمل، ومدة الدراسة بها خمس سنوات.

شعبة الدراسات الإسلامية باللغة الإنجليزية: مدة الدراسة بالشعبة خمس سنوات، وتهدف إلى تخريج دعاة مؤهلين للعمل في مجال الدعوة الإسلامية في البلاد الإسلامية وغير الإسلامية الناطقة بالإنجليزية، وعينت وزارة الأوقاف المصرية عدد من خريجي هذه الشعبة للتدريب على القيام بالدعوة الإسلامية، تمهيدا لإرسالهم دعاة خارج مصر لمساعدة الجاليات الإسلامية التي تشكل أقلية في أوربا وأمريكا.
قسم اللغة الفرنسية وآدابها

تشمل الدراسة بالقسم إلى جانب المواد الإسلامية مواد الأدب والحضارة واللغة والنقد بمختلف الفروع كما تدرس به اللغتان اللاتينية والإنجليزية كلغتين إضافيتين.

ويتولى القسم القيام بعمليات الترجمة من وإلى الفرنسية في جامعة الأزهر وخارجها، بالإضافة إلى مراجعة المطبوعات الأجنبية المتعلقة بالإسلام وكتابة تقارير عنها.

قسم اللغة الألمانية وآدابها
كان إنشاء القسم لاحقا لإنشاء الكلية ببضع سنوات، ويقوم القسم بأعمال فحص للكتب الألمانية والترجمات الدينية إلى الألمانية وإبداء الرأي في مدى صلاحيتها من عدمه، ويدرس به بجانب المواد الإسلامية مواد تتعلق باللغة الألمانية.

قسم اللغة الإسبانية وآدابها

أنشأ القسم نظرا لأهمية اللغة الأسبانية نظرا لوجود 23 دولة تتحدث بها، والدراسة به كغيره من الأقسام تشمل المواد الإسلامية بجانب مواد اللغة الأسبانية، ويضاف على ذلك اللغتين اللاتينية والإنجليزية

قسم اللغة العبرية وآدابها

تدرس بالقسم اللغة العبرية بجانب المواد الإسلامية، وكان الهدف من إنشاء القسم خدمة المجتمع المصري والإسلامي من خلال الإطلاع على لغة دولة لطالما جمعتنا بها صدامات، وقد قام القسم بترجمة عدد من الكتب والمؤلفات المهمة.
قسم اللغة الفارسية وآدابها

يدرس الطالب فى هذا القسم مجموعة من المواد التى تعرف الطالب بتاريخ إيران وحضارتها وعصورها الأدبية المختلفة قديما وحديثا، كما يتم التركيز على الدراسات اللغوية والمحادثة والترجمة من الفارسية إلى العربية والعكس، فيتخرج الطالب وقد أحاط بكل ما يخص هذه اللغة، ليكون قادراعلى الإسهام فى كتابة البحوث والدراسات الخاصة بهذه اللغة وموطنها، وكذلك القيام بعملية الترجمة التحريرية والشفوية.


قسم اللغات الأفريقية وآدابها

يدرس بالقسم حاليا اللغة السواحيلية والتي يتكلم بها حوالي 70 مليون نسمة، وهي أكبر لغة مشتركة في أفريقيا، ولغة الهوسا والتي تعد ثاني أكبر لغة مشتركة جنوب الصحراء الكبرى، بجانب دراسة المواد الإسلامية.

تعد اللغة الأردية ـ التى تكتب بالخط العربي الفارسي ـ أكبر لغات العالم الإسلامي وأوسعها انتشارا بعد العربية والفارسية، فالمتحدثون بها يزيدون على 400 مليون نسمة فتهدف الدراسة بالقسم إلى ترجمة التراث الإسلامي المكتوب بتلك اللغة ومن أجل تسهيل التواصل مع أصحابها.
قسم اللغات اليونانية والإيطالية وآدابها
في هذا القسم يقوم الطالب خلال سنوات دراسته الأربع بدراسة مواد في مجالات عدة «لغوية، أدبية، تاريخية، ثقافية، دينية»، بهدف تخريج طالب متقن للغة، على دراية واسعة بثقافة شعبها، وقد انضم عدد  من الخبراء اليونانيين والإيطاليين للتدريس بالقسم بدعم من السفارة اليونانية والإيطالية بالقاهرة إضافة إلى السفارة القبرصية.
قسم اللغة الصينية وآدابها
ويهتم هذا القسم  بتدريس وتعليم اللغة الصينية وآدابها ، وحضارة وتاريخ هذه البلاد ، بهدف تخريج جيل من الشباب الأزهري، يتقن اللغة الصينية لسد احتياجات البلدين المتزايدة في كافة المجالات ، خاصة في مجال تدريس اللغة الصينية والترجمة، لمزيد من التعاون بين مصر والصين.
قسم الدراسات الإسلامية باللغات الأجنبية

في هذا القسم يدرس الطالب مجموعات من المواد العلمية المتخصصة، عن بلد اللغة التي يدرسها مثل تاريخ حضارة تلك اللغة، ووضع الأقليات المسلمة فيها، واتجاهات الناطقين بهذه اللغة نحو الإسلام والمسلمين، بالإضافة إلى مجموعة أخرى من المواد في الدعوة ومناهجها، يتعلم فيها الطالب كيف يحاور الآخر بالمنهج الذي رسمه الإسلام كما يدرس الطالب ترجمات القرآن الكريم إلى هذه اللغة، ليتعرف اتجاهات المترجمين غير المسلمين نحو الإسلام.

ويتكون القسم من ست شعب وهي: «شعبة اللغة الإنجليزية- شعبة اللغة الفرنسية- شعبة اللغة الألمانية- شعبة اللغة الصينية- شعبة اللغات الأفريقية- شعبة اللغة الأردية».
​​​​​​​اللغات والترجمة للبنات

هناك أربع كليات فقط للطالبات على مستوى الجمهورية بجامعة الأزهر يحتوين على شعب اللغات والترجمة بمختلف أقسامها، وهي:كلية الدراسات الإنسانية للبنات بالقاهرة، وكلية الدراسات الإنسانية للبنات بتفهنا الأشراف بمحافظة الدقهلية، وكلية البنات الأزهرية بالعاشر من رمضان، وكلية البنات الأزهرية بطيبة الجديدة بالأقصر.
مجال العمل بعد التخرج

يعمل خريجو كلية اللغات والترجمة في مجال الترجمة الفورية، وتدريس اللغات الأجنبية، وغيرها من مجالات استخدام اللغات الأجنبية، وينتشر خريجوها في معظم دوائر العمل الرسمية في مصر وخارجها، فلا تجد مكانا إلا وبه خريج من خريجي كلية اللغات والترجمة، سواء في وزارة الخارجية، أو هيئة الاستعلامات، أو الإذاعة والتليفزيون، أو ترجمة المؤتمرات، أو الأمم المتحدة، وغيرها من الأماكن البارزة، كما ينتشر خريجو قسم الدراسات الإسلامية في معظم المراكز الإسلامية في العالمين الإسلامي والغربي، بل إن وزارة الأوقاف أصبحت تستعين بهم  في إيفادهم إلى دول العالم المختلفة سفراء للإسلام والمسلمين ناطقين بلغات تلك الدول، يحملون إليهم دعوة الإسلام.
تنسيق الكلية

حسب معطيات التنسيق لعام 2018/2019 فإن شعبة الترجمة الفورية تقبل بحد أدنى 562 درجة للقسم الأدبي، و585 درجة للقسم العلمي، ويتراوح الحد الأدنى للقبول بالأقسام الأخرى بين 524 و556 للقسم العلمي، و يتراوح بين 463 و554 درجة للقسم الأدبي.

الرجوع الى أعلى الصفحة اذهب الى الأسفل

مُشاطرة هذه المقالة على: redditgoogle

لا يوجد حالياً أي تعليق

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى