مدرس اون لايندخول

ازاى تذاكر صح فى الثانوية العامة النظام الجديد

10082020
ازاى تذاكر صح فى الثانوية العامة النظام الجديد

ازاى تذاكر صح فى الثانوية العامة النظام الجديد 21662
ازاى تذاكر صح فى الثانوية العامة النظام الجديد
فى البداية يجب أن تراعى النقاط الأتية :
1- انت جربت وشفت اسئلة النظام الجديد فى سنة أولى وسنة تانية وعلشان كدة متسمعش كلام حد مجربش النظام دا يعنى لو حد من النظام القديم قالك ذاكر بطريقة معينة قوله ان الطريقة دى متنفعش فى النظام الجديد
2- فى النظام الجديد ممكن تذاكر كتير لكن متعرفش تحل الأسئلة لأنك ذاكرت غلط
3- لما حد يقولك افهم متحفظش ممكن يكون ردك الطبيعى " يعنى اعمل ايه بالظبط " أنا عايز طريقة المذاكرة بالخطوات
4- ممكن يكون فى الكتاب المدرسى تعريف مثلا للجغرافيا السياسية وانت تقول ده حفظ مش فهم وأنا بقولك ان دا فهم مش حفظ فيكون ردك برضو ازاى
وعلشان كدة لازم تحدد مشكلتك فى النظام الجديد فى انك مش بتذاكر صح وانك محتاج تعرف ازاى تذاكر
وكمان لازم تبعد وتخلص نفسك من المعتقدات السلبية والخاطئة مثل :
1- انك مهما ذاكرت مش هتعرف تحل لأن أسئلة النظام الجديد معقدة وتعجيزية " وده مش صحيح "
2- ان النظام الجديد ممكن يتلغى " لا خلاص انت بقيت فيه فلازم تتعايش وتعود نفسك عليه "
3- انك طلعت من سنة أولى وسنة تانية متعرفش حاجة علشان كدة مش هتعرف حاجة فى سنة تالتة " لا برضو ده غلط ممكن تركز فى سنة تالتة بالطريقة الصح للمذاكرة "
والان اعرض عليكم ازاى تذاكروا بالطريقة الصحيحة وبنواتج التعلم الحقيقية :
1- شوف كل مادة وافهم المادة دى عايزة منك ايه لأن لكل مادة طريقة مذاكرة مختلفة فمثلا مذاكرة الجغرافيا والتاريخ تختلف عن الفيزياء والرياضيات
2- اقرأ الموضوع كويس وحاول انك تفهمه " طب ازاى " لو مثلا فى تعريف مكتوب فى التاريخ قوله انت باسلوبك العامى واديله أمثلة من الحياة واستنتج منه معلومات تانية
مثال : تعريف الجغرافيا السياسية هى فرع من فروع الجغرافيا البشرية يهتم بدراسة المقومات الطبيعية والبشرية للدولة وتأثير ذلك فى قوتها وعلاقاتها الدولية
نستنتج من هذا التعريف أن الجغرافيا السياسية :
- تتشابه مع فروع الجغرافيا البشرية وتختلف عن فروع الجغرافيا الطبيعية
- محور دراستها هو الدولة
- تركز فى الدولة على قوتها أو ضعفها
- لها علاقة بالعلوم الأخرى لأنها لن تستطيع تحديد قوة أو ضعف الدولة إلا بالاستعانة بالعلوم الأخرى التى تعطيها صورة كاملة عن الدولة
3- متذكرش بالورقة والقلم زى النظام القديم لكن ممكن تكتب ملاحظاتك – أو ملخص للدرس – أو معلومات اضافية بجانب معلومات الكتاب المدرسى
4- متحلش أسئلة على الدرس بالنظام القديم ومتسمعش أى شرح بالنظام القديم لأنه تعطيل لوقتك
5- حل أسئلة كتير للدرس على النظام الجديد وكل شوية ارجع لمعلومات الكتاب وضيف ليها كل ما تتوصل إليه من معلومات جديدة
6- قسم السؤال إلى أجزاء – واستنتج معلوماتك عن كل جزء – ثم اربط بينهما
7- لما تختار اختيار واجابة معينة لازم تقول انت اخترت الاجابة دى ليه ويا ريت كمان تدى أمثلة علشان تكون متأكد من اجابتك بالدليل " وده برضو هيزود معرفتك وفهمك للدرس "
8- لازم تكون عندك معلومات عن محتوى المادة نفسها ومصطلحاتها
مثال فى الجغرافيا : لازم تبقى فاهم يعنى ايه تضاريس – حدود – مناخ – نبات طبيعى – قارة – نشاط اقتصادى – وسائل نقل – وسائل اتصال – نهر دولى – أقلية .... وغيرها , وتكون عندك معلومات عن دول العالم وقاراتها
9- لازم تعمل باستمرار ربط بين معلومات الدروس كلها , وتستنتج معلومات جديدة وممكن تساعدك الأسئلة الجديدة فى دا عن طريق انك تجاوب عن سؤال واحد بمعلومات من دروس مختلفة
10- ناقش معلميك باستمرار وجادلهم فى المعلومات , واتكلم مع اصحابك عن معلوماتك الاضافية عن الدرس
وفى النهاية لا تقرأ هذا الكلام وتقول دا كلام صعب لأنه بالعكس أسهل كتير من الحفظ أنا عايزك تشوف الأسئلة الجديدة وتبحث وتناقش وتجادل فى الاجابات علشان فى الاخر تكون مقتنع بالاجابة , وكل ما تحل أسئلة أكتر وتناقشها معلومات هتزيد بالتدريج وهتلاقى أسئلة كتير ( مش هقول كلها ) أصبحت سهلة بالنسبة ليك
أما بالنسبة لسؤال " اعمل واذاكر ازاى فى ليلة الامتحان " دا سؤال سابق لأوانه وباذن الله لما تذاكروا وتفهموا السنة كلها ابقى اقولكم ان شاء الله تعملوا ايه فى ليلة الامتحان
والمهم انك تكون عارف ان النظام الجديد أصبح هو أساس التعليم فلو معرفتش تتعامل معاه بالطريقة بتاعه هتكون بتضيع وقتك ومجهودك على الفاضى
" ذاكر صح هتوفر مجهود , ذاكر صح هتعرف تحل الأسئلة الجديدة , ذاكر صح هتتفوق وتجيب درجات عالية باذن الله "
وتأكد أن لكل مجتهد نصيب , وأن الله لا يضيع أجر من أحسن عملا
مع أطيب تمنياتى لكم بالتوفيق
Mohamed Said
remove_circleمواضيع مماثلة
الاستاذ
ازاي تذاكر العربي في النظام الجديد
نصيحه من طالب بكليه الطب دفعه العام الماضي
https://youtu.be/6KkFVqdKySc

Professor
أعرف إزاي تذاكر صح في النظام الجديد
كلام مهم عن المذاكرة في النظام الجديد للصف الاول والثاني وخصوصا الثالث_الثانوي
_______
  أولا طبعا خلينا متفقين أنه أهم حاجة في النظام الجديد هي الفهم ثم الفهم طيب عشان تفهم منهجك كويس تعمل إيه ؟ طبعاً لازم قدر الإمكان تحل كتير وتحل من كذا مصدر حلك الكتير هيخليك تكتشف نقاط ضعف كتير وحاجات مكنتش فاهمها أو مش واخد بالك منها فالحل الكتير مهم جدا وأهم حاجه في الحل أنك تحاول تحل أسئلة المستويات العليا متفضلش تحل أسئله سهله وتخدع نفسك انك بتحل  خليك مقتنع أنه مهما كانت صعوبة السؤال فطالما ليه أساس علمي ليه في منهجك متقلش عليه ده مش سؤال امتحان !!
 ثانيا
 لازم تكون مقتنع تماماً أنه الأسئلة إلي بتحلها هتدخل الامتحان بنسبة 99% مستحيل تلاقي سؤال منهم يعني حتى لو حليت من 100 مصدر فكره انك تدخل تلاقي نفس الأسئلة ده مش هيحصل أبدأ أبدا الكلام ده كان في النظام القديم انما في النظام الجديد أشبه  بالمستحيل طيب هتسالني كده ايه فائده الحل الكتير ؟؟
 ما أنا قولتلك يا غالي أنت بتحل كتير عشان تقدر تفهم المنهج وتتعمق فيه وصدقني طول ما انت حليت كتير وحليت مستويات عالية كمان هتدخل الامتحان مهما كانت صعوبته صدقني هتقدر تحل .
 ثالثا  
الرسول صلى الله عليه وسلم قال " ان الله يحب إذا عمل أحدكم عملا أن يتقنه " يعني لازم تتقن عملك كويس بمعني أنك حتى لو بتتعب فوارد جدا تدخل الامتحان متعرفش تحل رغم انك تعبت وسهرت لكن ممكن تكون كنت بتتعب بغباء يعني بتحفظ من غير ما تفهم مثلاً أو كنت بتحل اسئله عاديه مفيهاش تفكير عالي بمعني آخر فيه نوعين من التعب تعب بذكاء ،  وتعب بغباء
_التعب بذكاء / انك تجتهد في فهم المنهج والحل الكتير عليه .
_أما التعب بغباء / أنك تفضل نضيع من وقتك في الحفظ بدون فهم ورغم أنك تعبت لكن في النهاية في ظل النظام الجديد مستحيل يتساوى الي حافظ بالي فاهم .
 رابعا
وحاجه كمان بالإضافة إلى الحل / انك تحاول تسمع فيديوهات مراجعات على اليوتيوب أو المنصات صدقني كل مدرس ييضيف معلومات جديده ممكن يكون المدرس بتاعك مقالهاش خصوصاً المدرسين الي بيكونوا شغالين مستويات عالية مثلا زي الاستاذ أحمد بركه في الفيزياء مستوى أسئلته عالي جدا ويساعدك انك تتعمق في المنهج وفيه كتير من المدرسين مش حابب اذكر حد علشان ما نساش حد فالخلاصه أنك لازم تتعمق في المنهج سواء بالحل الكتير أو بالفيديوهات.
 خامساً
امتحانات الدروس ليست مقياساً لمستواك الحقيقي / جزء كبير من مدرسين الدروس بيجيبوا أسئله من الأفكار إلي شرحوها وممكن تقفل الامتحان وتفرح وتيجي تتصدم آخر السنه لانه طبيعي جدا آخر السنه يكون فيه أفكار جديدة متشرحتش ليك فمتخليش امتحان الدرس يخدعك وكمان متزعلش من المدرس الي بيجيبلك امتحان صعب لأنه هو ببعودك علي امتحان آخر السنه .
 أخيراً
في ظل النظام الجديد لازم تتخلص من مقوله " أهم حاجة الكم مش الكيف والهبل الي زي كده. " يعني نلاقي طالب بقولك مذاكره تلت ساعات أفضل من مذاكره عشر ساعات .
الكلام ده كان في النظام القديم الي كنت مجرد بتحفظ وتدخل الامتحان تكتبهم اما في النظام الجديد فأنت محتاج تحل وتتعب والحل الكتير محتاج وقت اكيد .
Mr.Riad
ازاي تذاكر صح في النظام الجديد للثانوية العامة نظام ال ( open Book)
1/ لازم تفهم الدرس فهم عالي من خلال تكرار شرح الدرس علي الاقل مرتين
* 1) سماع الفيديو أول مره كامل ( المرة الاولي )
*2) اسمع الفيديو ثاني عشر دقايق ووقف الفيديو وروح ذاكر العشر دقائق الا سمعتهم وراجعهم لغايه ما تخلص الفيديو ونفس النظام في اي درس او اي ماده ( المرة الثانيه )
-------------
2) ذاكر الدرس أول مرة ( لازم بالورقة والقلم) يعني لازم تذاكر الدرس اول مرة بالورقة والقلم علشان تثبت المعلومه
------------
3) حل مجموعه من الاسئلة علي الدرس بالنظام الجديد
يعني كل درس هتحل عليه اسئله كتير علي الدرس ( تطبيق )
---------------
4) لازم نمتحن كل اسبوع امتحان مشفتش اسئلته قبل كده علشان نتعود علي الاسئلة المختلفه
------------
5) انقل المعلومات من الذاكره المؤقته إلي الذاكرة الدائمه عن طريق المراجعه المستمره للمراجعات الفيديوهات
يعني اراجع فيديوهات الدروس علي الاقل 3 مرات كل شهر علشان اثبت المعلومات اكتر ملحوظة :- قبل مذاكرة الدرس الجديد لازم مراجعه علي الدروس القديمه وبعد كده ذاكر الجديد
-----------
« ذاكر حاجه وراجع حاجه تكسب كل حاجه »
----------
اتمني اي حد عنده مشكله في المذاكرة ينفذ الخطوات دي ان شاء الله ومشكلته تتحل والطريقه دي تنفع علي اي مادة مش ماده معينة
privacy_tip صلاحيات هذا المنتدى:
لاتستطيع الرد على المواضيع في هذا المنتدى