مدرس اون لايندخول

كل ما تريد معرفته عن كلية الطب.. سلسلة الجامعة

06082020
كل ما تريد معرفته عن كلية الطب.. سلسلة الجامعة

كل ما تريد معرفته عن كلية الطب.. سلسلة الجامعة 11975
#سلسلة_الجامعة
#كلية_الطب

مقالنا النهاردة هيتكلم عن .. "كلية الطب"

طبعًا أغلبكم هيكسل يقرا ويكمل للاخر بس كويس , عشان فعلًا المقال ده للمهتمين فقط...عشان مينفعش تدخل الكلية دي من غير شغف , من غير إهتمام , مينفعش تضيع سنين و مجهود من عمرك و إنت أصلًا داخل عشان ماما و بابا عايزين كده و إنت مش أحسن من ابن خالتك الدكتور .. إطلاقًا.

مبدأيًا خلينا نتفق إن تقريبًا تنسيق طب عمره ما قل عن 97,5% أيًا كانت الجامعة و ده بشكل عام , وأقل مجموع بيبقى للقاهرة واسكندرية عشان مساحتهم اكبر وبيستوعبوا عدد طلبة اكبر وكل ما بقت الكلية اصغر زي المنصورة وطنطا المجموع زاد المهم اللي بيفرق الحد الادني أياً كان لجامعة ايه
فطبعا مش محتاجين نقر ونعترف إن طب محتاجة مجهود قبل و بعد و أثناء , لذلك تلاقي طلبة طب من أكتر الناس اللي مستحيل يقتنعوا بجملة " اتعب دلوقتي عشان ترتاح بعدين"..

يلا نبدأ وحده وحده ..:

1. طب إيه هو نظام الكلية و دراستها عاملة إزاي؟
الكلية في مصر 7 سنين : 6 دراسة , وسنة امتياز .. يعني ايه سنة امتياز؟
دية سنة تدريب عملي إجباري بتطبق فيها كل اللي درسته ال6 سنين اللي فاتوا في مستشفيات الجامعة كنوع من الاطمئنان إن إنت جاهز تكون في المنصب و المجال ده فعلًا و تقدر تتحمل مسئوليته ..

أما عن ال6 سنين دراسة فابيتقسموا علي مرحلتين :
* المرحلة الأكاديمية .
*المرحلة الإكلنيكية.

1. المرحلة الأولى بتبقى أول 3 سنين وبتبقى دراسة أكاديمية بتدرس فيهم مواد نظري زي الأناتومي ( اللي هوعلم التشريح) , فسيولوجي (اللي هوعلم وظائف الأعضاء) , هستولوجي (علم الأنسجة) , فارماكولوجي (علم الأدوية) , بيوكيمستري (كيمياء عضوية) , جينتكيس (علم الوراثة) , باثولوجي (علم الامراض) , باراسيتولوجي (علم الطفيليات) , ميكروبيولوجي (علم الكائنات الدقيقة) .
والمواد في ال٣ سنين دول مبتبقاش أقل من 4 وفي بعض الجامعات بيبقوا 6 ..

2. المرحلة الثانية وبتبقى ال 3 سنين اللي بعد كده وبتبقى دراسة إكلينيكية .. بتتعامل فيهم مع العيان بنفسك وإنت بتدرسهم و بتدرس فيهم المواد اللي هتتخصص فيها بعد الكلية زي الأطفال و الباطنة والجراحة والرمد و ونسا وتوليد وطب المجتمع وكده ..

*طب عموما مبتتخصصش فيها غير بعد ما تخلص دراسة و امتياز وتكليف*

وبعديهم بيقى فيه نيابات اللي هي مرحلة التخصص الفعلي بقي بتخصص من خلال إنك تحضر ماجيستير في التخصص اللي إنت عايزه ..

بالنسبة لنظام الامتحانات..فا معظم الجامعات في مصر ماشية بنظام اسنة الواحدة يعني مفيش امتحانات فاينال بعد نهاية الترم الاول لا المنهج بيكمل معاك وبتمتحن مرة واحدة آخر السنة زي القصر العيني والمنصورة وطنطا وشبين الكوم، لكن في جامعات ودي عددها أقل بتمتحن فاينال بعد كل ترم زي بنها...أما جامعة اسكندرية فاماشية بنظام (الموديول).. يعني إيه؟
يعني بناخد جهاز في جسم الانسان وبندرس كل مواده مرة واحدة و تمتحن ترم علي كل جهاز..
مثال لما هتيجي تدرس القلب هتدرس المواد النظري كلها مرة واحدة للجزء اللي يخص القلب و بعدين تمتحن على المواد دي في آخر الترم .

خلصتوا إمتحانات سنة سادسة على خير؟ بعدها بكام شهر تعلن نتيجتها وتتاح التظلمات ..
وبعدها هتطلع نتيجة المجموع التراكمي (مجموع درجاتك في ال6 سنين كلهم) والترتيب العام
وبيترتب بقى من الأول لغاية آخر واحد في الدفعة بالمجموع التراكمي ده .
والتقدير العام بيقي بناء على المجموع التراكمي سواء ممتاز ، جيد جدًا ، أو جيد أو مقبول وبيكون فيه حاجة كمان اسمها مرتبة الشرف، مثلًا تقدير امتياز مع مرتبة الشرف معناه إن مفيش ولا سنة من ال6 قل تقديرك عن امتياز، تقدير جيد جدًا مع مرتبة الشرف معناه إن مفيش ولا سنة من ال6 قل تقديرك عن جيد جدًا وهكذا .
المجموع والترتيب ده بقى هيفرق معاك في كل حاجة تقريبا جاية في طريقك بعد كده .. مش ببالغ لما أقول لعشرات السنين قدام ما ذاكرتش من الأول ليه

نيجي للامتياز بقي: بتبقي زي ما قلنا سنة تدريب إجبارية لكل الي اتخرجوا من كلية الطب
وبتبقي مطلوبة في الداخل والخارج عشان يبقي اسمك معاك شهادة معتمدة .. بمعنى انك دلوقتي لو عاوز شهادة من الكلية هتاخد "شهادة تخرج مـــؤقـــتة" لحد ما تاخد الامتياز بتاعك ويبقي معاك شهاده رسميه
سنة الامتياز بتبقي 12 شهر بالتمام والكمال بتبدأ غالب في 1 مارس بعد النتيجه ما تظهر .. وبتشتغل طبيب إمتياز في مستشفيات الجامعة الرئيسي و بتتعامل مع المرضى في العنابر والعيادات وبتكون مسؤل عنهم وعن متابعت علاجهم ونباطشيات نهار وليل وكده

ممكن تقضي جزء من الامتياز في مستشفيات جامعة تانية أو في مستشفيات وزارة الصحة في أي محافظة تانيه عادي زي ما تحب .. وممكن تقضي كذا شهر منه في دولة تانية خالص بس بتتدرب على تخصص معين على حسابك
كل ده له شروط وإجراءات وقواعد بتعرفها بعد كده

بعد ما خلصت الامتياز علي خير مبروك انت اخيرا معاك بكالريوس الطب و الجراحة و فعليا اتخرجت و بيعملولك حفلة التخرج الرسمية, وهتنضم بعدها لنقابة الأطباء وتعمل "ترخيص مزاولة المهنة" ومهنتك "طبيب بشري - ممارس عام"

لا البوست مخلصتش لا  لسه التكليف و النيابات.. وافتكر ان انت اللي دست "قراءة المزيد" و انت اللي اخترت تكمل اوكيه؟

نيجي للتكليف:-
هو فترة عمل إجبارية لأي طبيب عاوز يشتغل ويكمل في وزارة الصحة. بتتوزع فيها على الوحدات الصحية ومراكز طب الأسرة ومكاتب الصحة.
وفيه نوعين رئيسيين .. إما بتتوزع على وحدة داخل المدينة او اما بتتوزع (ودية غالبا بتبقي باختيارك) على المناطق النائية زي المحافظات الحدودية (مطروح وسيناء والبحر الأحمرواسوان الي اخره) اوبعض المناطق الصحراوية.
طيب ليه واحد هيروح باختياره الأماكن دي؟ باختصار بيقي ليها مزايا مالية وإدارية ومزايا ليها علاقه بالنيابات هتعرفها
بعدين.

في آخر شهرين في الامتياز (الي هما يناير وفبراير) الدكاترة اللي اتخرجوا من نفس الدفعة على مستوى الجمهورية كلهم بيسجلوا رغبات التكليف على النت في مكان وموقع واحد. والرغبات ليها قيود في ترتيبها بالأقاليم .. بالظبط زي رغبات الكليات في الثانوية العامة كده ..
بالإضافة لرغبات إختيارية بتكتبها لو حابب اسمها "جهات خارجية" بتشتغل فيها طبيب تكليف في مستشفيات التأمين الصحي وبنوك الدم وشركات حكومية زي النقل والطيران والكهربا وغيرها,
وبعد ما تكتب الرغبات بشهر بتطلع النتيجة وكل واحد اتوزع علي ادارة ايه و معظم الناس بتتوزع علي اللي بيختاروه فعلا.

طيب في حاجة حلوة اوي للبنات.. الطبيبة الي متجوزه حتي لو جوزها مش طبيب بتاخد اي ادارة تختارها في اي مكان مهما كان مجموعها و في الوحدة الاقرب ليها

بعد ما بيعلنوا عن النتيجة بتبدأ إجراءات الاستلام .. لغاية ما تستلم الشغل فعليا في واحدة من الوحدات الصحية تبع للإدارة اللي طلعت لك… كدة انت بقيت طبيب بشرى في وزارة الصحة أخيرا
شغلك "ممارس عام" بتعالج الحالات المرضية الشائعة وتحول الحالات الأكبر منك لأخصائيين
ومسئول عن مهام أخرى تبع طب الأسرة وصحة المجتمع خليها لوقتها

نيجي للنيابات:-
النيابات سواء في الجامعة أو الصحة هي بداية طريق التخصص.
كل قسم بيقي فيه استشاريين وأخصائيين ومعاهم نواب من 4 أو 5 دفعات متتالية.
انت مثلا هتبقى نائب جراحة عامة في مستشفى رأس التين أو نائب باطنة في نفس المستشفى, انت لسة رسميا مش أخصائي لكن هنا بتبدأ تتعلم التخصص اللي عايزه وتحضر الماجستير .. يعني انتو لغاية استلام التكليف كل الناس ماشية في نفس السكة والخطوات ..ماعدا اللي سافر برة مصر وهيكمل هناك
ومن اول ما يعلنوا علي معاد قعده النيابات فبتبدأ مت هنا تتفرقوا وبتخشوا في طريقين كبار

نيجي لجلسة النيابات الي بيبقي لأوائل الدفعه في الكلية الواحدة بتبقي حسب إعلان الكلية
الجامعة بتعلن انها محتاجة مثلا 200 وشوية طبيب مقيم في الأقسام المختلفة.
مثلا الجراحة 20 والباطنة 20 والأطفال كذا والنسا كذا وأنف وأذن كذا وأشعة كذا ورمد كذا ...... إلخ لكل الأقسام.
بالإضافة للنيابات الي ممكن تاخدها في معهد البحوث الطبية والمعهد العالي للصحة
وال20 الي محتاجنهم في جراجه دول مثلا فيهم 4 بـ post الباقي من غير بوست… والأطفال 5 منهم لهم بوست والباقي لأ... اللي لهم بوست معناها إنه هيكمل في الكلية معيد ويتدرج بقى في ال staff لغاية ما يبقى أستاذ دكتور.

أما الباقيين اللي من غير بوست معناها إنهم بعد ما يخلصوا نيابة الجامعة "" 5 سنين "" بيرجعوا وزارة الصحة ويكملوا باقي حياتهم فيها كمساعد أخصائي ثم أخصائي ثم استشاري

وعموما في قعدة النيابات ديه هتقعدوا كلكم في قاعة واحدة معروض قدامكم على شاشة كبيرة التخصصات المتاحة ببوست ومن غير بوست
وهتطلعوا بالترتيب العام واحد واحد، هيقف الأول على الدفعة يقول مثلا "رمد" فيتشطب على مكان من المتوفرين في الرمد
يطلع الثاني بعده يقول "قلب" فيتشطب على مكان من المتوفرين في القلب
يطلع الثاني بعده يقول "أطفال" وهكذا بالترتيب
لغاية ما نوصل لواحد هو عاوز أطفال مثلا لكن في 5 قبله أخدوا أطفال وبالتالي ماعادش "أطفال ببوست" فهنا عنده الإختيار بقى إما ياخد أطفال من غير بوست يتعلم التخصص اللي عايزه في الجامعة بعدين يرجع الصحة .. أو قدامه انه يشوف نيابة تانية ببوست مش أطفال عشان يكمل في الجامعة حتى لو تخصص تاني..
أحيانا في ناس بتسيب جراحة وباطنة وأطفال وتاخد تخصص أكاديمي بحت لأنه مش عايز يسيب الجامعة وفيه بيبقوا العكس قدامه تخصص حلو جدا زي اطفال ببوست وهيتعين بعدها معيد ورغم ده بيسيبه لأنه عاوز تخصص معين تاني فبيسيب ده رغم كل مميزاته عشان شغفه فتخصص تاني … أو حتى فيه ناس مايبيخدوش نيابة أصلا ويبدأ النيابة في وزارة الصحة على طول

وصلنا لغاية ما كل النيابات خلصت واتوزعت .. وغالبا وببتوزع على أول 300 في الدفعة والاستلام الفعلي بيكون بعدها بشوية
طبعا اللي تروح عليه نومة يومها يبقى يستاهل الي يحصله Very Happy راحت عليه كدة

نيجي لباقي الدفعة
ترتيبك ميجيبش نيابة جامعة أو رحت قعدة النيابات وما أخدتش نيابة
هتكمل في التكليف لغاية ما تنزل نيابات الصحة
يعني بعد ما تقضي سنة تقريبا في التكليف بتنزل حركة نيابات مايو بالنيابات المتاحة في مستشفيات مصر كلها
نفس اللي عملته في التكليف .. فكل الدفعة في مصر كلها هتسجل رغبات النيابة على موقع الوزارة، مثلا انت في الوقت ده كنت قررت عاوز جراحة عامة خلاص فهتسجل رغباتك

يعني بتسجل أي تخصص في أي مكان من النيابات المتاحة مش مقيد بأي حاجة..الحاجة الوحيدة اللي هتفرق معاك هي مجموعك لأنه هيحكمك مقارنة بكل زمايلك على مستوى الجمهورية، يعني لو واحد من أسوان عاوز جراحة عامة في مستشفي جمال عبد الناصر ومجموعة أعلى منك يبقى هو اللي ياخدها وهكذا
...وممكن تكتب أي عدد من الرغبات مثلا 5 رغبات بس بمعني لو ماجاتش النيابة من ال5 دول هتستنى حركة النيابات اللي بعدها

بعد ما تسجل الرغبات والنتيجة تظهر بتبدأ تستلم النيابة على طول وتبدأ بقى طريق التخصص ربنا يعينك
نيابة الصحة 4 سنين المفروض بنهايتها تكون أخدت ماجستير وبتكمل بقى في طريق الأخصائي و تفتح عيادة لو عايز..

نيابات نوفمبر
في بقى حركة نيابات تانية في شهر نوفمبر قبل الحركة الأساسية ب 6 شهور
وفي الحركة دي مش بتكون كل الأماكن متاحة وبتكون الاماكن المتاحه فيها أقل من حركة مايو لكن بيكون فيها أماكن كويسة كتير برضو
الدكاترة اللي تكليفهم في المناطق النائية بيقدموا على أي نيابة في الحركة دي، ودي أحد مزايا التكليف النائي
الدكاترة اللي تكليفهم مش نائي من حقهم يقدموا بس على "التخصصات الملحة".. يعني اللي هما محتاجنها و فيها نقص..

كل اللي فات ده للي ملهمش جيش اما اللي ليهم جيش:-
فلغاية ما تستلم التكليف ..فالكلية بتأجل تجنيدك, بعد ما تستلم بتستني دورك بقي,
الأطباء اللي مكملين في الصحة: الغالبية العظمى بيدخلوا ظباط يعني 3 سنين خدمة عسكرية (بس بتبقي كوقت فعلي تقريبا سنتين ونص) ولو دخلوا قبل ما يكملوا سنة في التكليف بتعهم .. بيعتبرالجيش بالنسبالهم استكمال للتكليف.. وبيقدموا على حركة النيابات مع زمايلهم .. لكن بيجمدوا النيابة وبيبدأوها بعد الجيش ولو اشتغل في الجيش طبيب في نفس التخصص اللي جاتله فيه النيابة ممكن يتحسب له الفترة دي من نيابته عشان يوفر وقت وممكن يقدم على الماجستير كمان

كل الأطباء اللي بدأوا نيابات جامعة بيدخلوا عسكري يعني بيقضوا تقريبا سنة بس.. لكنها محسوبة من ال5 سنين نيابة مش بتتأجل نيابته..

ولو عايز تكمل طول حياتك كظابط جيش أو شرطة
بعد الامتياز ممكن تغير طريقك المعتاد كله وتمشي في سكة الظباط المتخصصين
يعني تكمل طول حياتك بقى ظابط طبيب
فبعد الامتياز تقدم في الجيش (يعني في الأكاديمية الطبية العسكرية) أو الشرطة (في أكاديمية الشرطة) وبتدخل اختبارات قبول مختلفة
لو اتقبلت بتدرس في الأكاديمية 6 شهور وتتخرج برتبة ملازم أول طبيب وبعد 6 شهور تبقى نقيب وتترقى بقى كل فترة محددة
الموضوع ده فيه مزايا كتير جدا خصوصا من ناحية التعليم والفلوس وإمكانيات البيئة الشغل بتوفرهالك ..لكن فيه عيوب برضو معظم الناس مش هتقبلها خصوصا ان الجانب العسكري وطبيعة حياتك كظابط مش كل الناس بتقضلها

نتكلم اخر حاجه عن المرتب والجانب المادي
الأول لازم ننبه للجانب الكويس في الموضوع وهو إنك -كطبيب- من الفئة الوحيدة (من كل خريجي الكليات الطبية) اللي الحكومة ملزمة بتعيينهم في مؤسساتها بالقانون .. يعني تتخرج وتشتغل في الحكومة على طول. ودي ميزة عن كل الكليات العالية مش هيعرف قيمتها إلا اللي اتخرج من "كلية قمة" وقعد على القهوة مش لاقي شغل.. عشان كدة في محاولات جدية من الوزارة لإلغاء التكليف بقانون جديد ويخلوا نفسهم من الالتزام ده

طيب كام بقى مرتب الحكومة؟
طبيب الامتياز بيقبض "مكافأة تدريب" شهرية 254 في أول 4 شهور و 275 جنيه باقي السنة
وطبيب التكليف في معظم المحافظات بيقبض في الشهر من 2000 لـ 2300 جنيه. وده مقابل شغل 6 ساعات يوميا.
وفي المحافظات الحدودية (مطروح وشمال وجنوب سيناء والبحر الأحمر والوادي الجديد وأسوان) هيقبض حوالي 3500 جنيه في الشهر على نفس ساعات العمل.
وبيتضاف لأي طبيب لو اشتغل زيادة (الي هيا النباطشيات) بعد الساعة 2 أو بالليل بتختلف حسب مكان العمل ودي لها فلوس زيادة على المرتب الأصلي.
ونائب الصحة بيقبض تقريبا في نفس حدود طبيب التكليف لكن عشان نباطشياته كتير ممكن يزيد عنه من 300 لـ 600 جنيه
والمرتب عامة كل سنة في شهر 7 بيزيد حاجة بسيطة. ومع كل درجة علمية جديدة ومع كل ترقية..

ده الجانب الحكومي. إنما طبعا معظم الأطباء محتاجين يزيدوا دخلهم فبيبدأ يشتغل خاص private بجانب شغله الحكومي وبيزوده عندك من الشغل في المستوصفات والمراكز الطبية لغاية ما يفتح عيادته الخاصة أو يشتغل في مستشفى خاص هو وشطارته وعلاقاته
والجانب الخاص هو الجانب اللي بيجيب الفلوس اللي الناس فاكراها كتير Very Happy

آخر حاجه هنيجي نحيتها وهيا المعادلة و الزمالة:-
المعادلة : ببساطه ان شهادتك اللي بتاخدها من اي جامعة في مصر غير معترف بيها دوليا غير لما تعادلها بشهادة من شهادات بعض الدول الاجنبية
يعني تتعامل معاملة خريج أجنبى
لكن برضه لازم تاخد تكمل المعادله بالزمالة كأنك بتكمل بنفس النظام الأجنبى وهو ده الشائع
وبينى و بينكم الزمالة ملهاش فايدة كبيرة الا لو كان معاك فلوس و مستعد تدفع
وانت لما بتاخد معادلة البريطانية بيسيبوك تشوف أنت شغل لنفسك (وده كان بالنسبة للنظام القديم)
أما الأمريكية مثلا بيتم تعيينك بمعرفتهم (لو أنت عايز طبعا)

اما الزمالة : فهى ما يساوي درجة الماجيستير عندنا
و لو حضرتك خلصتها بالامتحانين بتوعها
بتتعامل معاملة استشارى فى تخصصك و أنت عندك يا دوب 28 - 29 سنة أو أكتر شوية

يعنى لو عايز تشتغل فى مصر أوالخليج
الزمالة فقط مش هتحتاج معاها معادلة
و المعادلات انواعها كتير في الانجليزية و الامريكية و الفرنسية و الاسترالية و الكندية.. وبانسبة للمعادلة الامريكية و اسمها Usmel *بتتنطق يوزمل* وهي الاشهر والافضل بتحتاج حوالي عشرين الف و بتعملها عن طريق 3 امتحانات و هم:-

الأول هو امتحان USMLE part 1
التاني هو امتحان USMLE Part 2 CK: Clinical Knowledge
التالت هو امتحان USMLE Part 2 CS: Clinical Skills
الامتحانين الأول و الثاني ممكن تاخدهم في المركز الثقافي الأمريكي الموجود في بلدك أما التالت ففي امريكا وبس.
اقصي وقت تخلص فيه اجزاء ال Usmel
٧ سنين و مش شرط يبقي معاك Toefl بس اكيد بيتأكدوا من ان مستواك مناسب في الانجليزي و ده بيبقي عن طريق امتحان الكلينيكال و الانترفيو.

هحححح..اخيرا اقدر اقولكوا بكل ثقة .. وبكدا تكون كليتنا خلصت النهاردة .. ونأسف عل اطالة بس افتكر اني قلتلك بلاش
.. وافتكر ان الكليه ديه قبل ما تبقي كليه قمه والكلام الحلو الي بيتقال ده .. فهيا مسؤليه وامانه .. وتعب وسهر ليالي .. ولو حد مش حاببها وناوي يدخلها كده وخلاص فياريت يشد الرِحال عنها من الاول لانها مش هتكون مكانه .. واكيد لو دخلت وانت حاببها وعندك مسؤليه ناحيه الي داخل عليه فده هيهون عليك طولها وضغطها وتعبها
وحط في دماغك لو ربنا قسمهالك ودخلتها انه"ومن أحياها فكأنما أحيا الناس جميعا"
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى