ازاي تجيب ١٠٠ في الميه في الثانويه العامة

استعرض الموضوع السابق استعرض الموضوع التالي اذهب الى الأسفل

22052020

مُساهمة 

. ازاي تجيب ١٠٠ في الميه في الثانويه العامة




ازاي تجيب ١٠٠ في الميه في الثانويه العامة 0874
ازاي تجيب ١٠٠ في الميه في الثانويه العامة
 هيفيدكم جدا.
انا اخوكم في تانيه طب سوهاج ..هكتبلكم تجربتي كامله في ٣ث ان شاء الله و حاولت الم كل مشكلات الثانويه و طرق المذاكره في٢٣ نقطه ..

بسم الله
١.. اول حاجه عشان تدخل طب اللي هوا من ٩٨ فالميه (اكتر او اقل) لازم تحط أملك انك تجيب مجموع اكبر منه يعني لازم تحط فأملك انك تجيب ١٠٠ فالميه إن ربنا كرمك بيها يبقى تمام قوي قوي (اول جمهوريه)  و ان مجاتش هتجيب اقل منها بحاجه بسيطه و هتبقى الكليه في جيبك برضو ان شاء الله

٢..سيبك من فكرة المنافسه لإنها ممكن تخلي قلبك مش صافي و بتخليك دايما تقارن نفسك بالناس و زي مقولتلك خلي المنافسه و التحدي انك تجيب ١٠٠ فالميه دا هيكون داعم اكبر ليك و طبعا دا هيفرق معاك فالمذاكره فأكيد انتا عشان أملك تقفل دا هيخليك مش هتسيب حته من المنهج إلا و عاوز تتقنها

٣..تنظيم الوقت.. من وجهه نظري افضل حاجه ممكن تنظم وقتك هي الجداول اليوميه (جدول يومي ازاي؟) يعني قبل متنام كل يوم تكتب جدول اليوم اللي بعده دا هيخليك صاحي و انتا عارف ناوي تعمل ايه و هيخلي أقصى طموحك انك تخلص الجدول اللي انتا كاتبه و انا قولت جدول يومي عشان غالبا الجداول بتلخبط مع الناس فميزة الجدول اليومي انك لو اتلخبط معاك الجدول هيلخبط معاك يوم واحد بس بدون تأثير على الايام اللي بعد كدا اللي هتكون ليها جدول خاص بيها و ياريت الجدول دا يكون فيه ٣ مواد فاليوم (او ٢ على الاقل)
مثال.. من الساعه ٨ الي الساعه ١٢ الضهر مذاكرة درس فيزياء و من الضهر (بعد الصلاه) لحد ٢ حل واجب الفيزياء نوم حتى العصر
من العصر للعشا مذاكرة درس عربي و من العشا للساعه ١١ فرنساوي بعد كدا نص ساعه فيسبوك و نوم (دا مثال)

٤..ياريت طبعا تحافظ على الصلوات و تخلي علاقتك بربك طيبه
و قبل المذاكرة ياريت تقرأ صفحه او صفحتين من القرآن و بكدا ربنا هيباركلك في يومك و في مذاكرتك إن شاء الله

٥.. ياريت تساعد صحابك و تصفي نيتك يعني مثلا لو معاك ورق كويس او امتحانات على المواد توريها لاصحابك و اوعي فكرة انهم ممكن يجيبوا اكتر منك انها تمنعك من مساعدتك ليهم لا انتا ساعد و انتظر الثواب من الله

٦..ياريت قبل متروح لأستاذ عشان يشرحلك درس معين انك تقرا الدرس قراءة سريعه.. دا هياخد منك بتاع ربع ساعه او اقل لكن هيفرق معاك جدا و هيخليك مركز جدا و فاهم شرح الاستاذ بطريقة جميله و متقلقش ممكن انتا و بتقرأ تحس نفسك مش فاهم حاجه دا طبيعي لإن الدرس متشرحلكش لكن هيفرق معاك أثناء شرح الأستاذ

٧..حاول تنظم دروسك بحيث تخلي فيه يومين فراغ عندك (مفيهمش دروس) لإنهم هيفيدوك و هيخلوك تلم و تحل اي تراكم عليك

٨..حاول تفهم كل حاجه فالمنهج الفهم هيسهل عليك الحفظ جدا و كمان هيخليك تحل اي سؤال غريب او لافف (الفهم مع الحفظ طبعا)

٩..فيه حاجات فالمنهج بتبقى حفظ فقط مفيهاش فهم لكن دي قليله جدا
و بالنسبه للأجذاء اللي حفظها صعب دي ممكن تحطها في جمل مضحكه كدا أو تحفظها بأي حاجه مشابهه مثال
كان فيه جدول العصور فالجيولوجيا دا حفظه كان صعب جدا
فكان فيه عصر اسمه الجوراسي دا من خواصه انتشار الطيور و سيادة الزواحف العملاقه و انتشار الثديات صغيرة الحجم
فأنا كنت حافظه كدا كلمة الجوراسي اولها (جو) و الطيور بتطير فالجو  يبقى انتشار الطيور
(راسي) كنت حافظها ااااه يا راسي دا الثعبان الكبير أكل الفار الصغير  
ثعبان كبير يساوي زواحف عملاقه فأر صغير يساوي ثديات صغيرة الحجم
و هكذا مثال تاني جين البصمة كان على الكروموسوم ٨ (أحياء) فقمت رسمت الرقم ٨ على البصمه بتاعت صباعي (و المنظر محفور فدماغي لحد دلوك) و جين فصائل الدم كان علي الكروموسوم ٩ قمت كتبت ٩ بقلم احمر (لون الدم) و اديني لسا فاكرها لحد دلوك   (يعني من الاخر اخترع حاجات تسهل عليك الحفظ)

١٠.. عاهد نفسك و عاهد الله عز وجل إنك مش هتغش ابدا مهما كانت الظروف و حتى لو امتحانات دروس برضو متغشش و استنى و شوف هدية ربنا ليك (اكيد مش هيخذلك ابدا)

١١.. ادعي لنفسك و لاصحابك في كل صلاه ان ربنا يحقق آمالكم

١٢.. اعمل اللي يقلك عليه الاستاذ و حاول تذاكر معاه اول بأول و تحل الواجب كله

١٣.. بالنسبه للدروس الخصوصيه من وجهه نظري ان مفيش ماده تستاهل اكتر من درس يعني درس واحد يكفي ..درس واحد يكفي.. لكل ماده دا حفاظا على وقتك و لو كنت عاوز تزود معلوماتك ممكن تحضر على اليوتيوب
و بالنسبه للملخصات برضو ياريت ملخص واحد للماده (للمذاكره) و مثلا ممكن تضيف واحد تاني عشان تحل اكتر.. يعني فكرة انك تجيب خمس ملخصات في الماده دا مش كويس (من رأيي) و ببساطه ممكن متجيبش غير اللي يقلك عليه المدرس في الدرس

١٤..ياريت فالمذاكره متقعدش ساعات كتير ورا بعض فوق الكتاب لا
مثلا ذاكر ساعه و ريح ٥ دقايق و هكذا و كل ٤ ساعات مثلا خدلك ريست ربع او نص ساعه

١٥.. طريقة المذاكره (دي طبعا بتختلف من شخص للتاني) لكن انا هقول طريقتي جايز تكون مفيده لحد
كنت امسك الصفحه و أحاول اقراها بصوت و أفهمها كويس بعد كدا اقفل الصفحه و أشرحها لنفسي و طبعا بحرك ايدي و بصوت كإني بشرح لحد تاني
و ساعات اسمعها لنفسي بالورقه و القلم و أحاول استرجع الصفحه كلها و اعصر دماغي في إني أفتكرها كلها (مش مجرد متلاقي نفسك ناسي معلومه تطير و تفتح الكتاب و تقرأها دا غلط) و ساعات بذاكر و انا بتمشي  دا لما ببقى مخنوق من المذاكره

١٦..لو صاحي ولاقي نفسك كاره المذاكره و مخنوق احسن حل لكدا هوا المذاكره بص لما انتا هتذاكر ساعه و انتا مخنوق هتلاقي الموضوع يفك معاك و هتفرح لما هتلاقي نفسك بتنجز.. يعني احسن طريقه تحل بيها مشكله الخنقه من المذاكره هيا الإنجاز فالمذاكره (مش الهرب منها زي مالناس فاكره)
و طبعا لو حاسس انك مخنوق جدا جدا و مش قادر تذاكر ممكن تقري قرايه فأي درس او تحل او تحضر يوتيوب و هكذا (اهم حاجه وقتك يبقى بتستغله في حاجه مفيده)
١٧.. استعين بالرسم في المذاكره.. يعني فالكيمياء مثلا و انتا بتذاكر الأكسده و الأختزال ياريت ترسم الذرات و الالكترونات دا هيساعدك (و هكذا في باقي المواد)

١٨..المذاكره في رمضان (ان شاء الله) انا كنت بذاكر من الصبح لحد المغرب 
والله بجد المذاكره فالصيام جميله مش متعبه زي مالناس متخيله و بتنجز فيها عشان مفيش تضييع وقت فالأكل صح بعد العصر ساعات تفصل و بتفقد تركيزك فالحاله دي ممكن تفتح اليوتيوب و تحضر حلقه فيزيا (محمد عبدالمعبود) مثلا او كيميا او اي حاجه اهم حاجه وقتك ميضيعش

١٩.. هل سنه ٣ المفروض نجتهد من اولها لآخرها؟ و هل لو اجتهدت فالأول ممكن انام أخر السنه؟
بصو المفروض الواحد يذاكر من اول السنه اول بأول بحيث يخلص مذاكرة الدروس اللي خدها و يحل واجبها اللي طلبه منه أستاذه...فطبعا اول السنه بتبقى الدروس اقل و بالتالي المذاكره اقل شويه
لكن فكره انك لو ذاكرت اول السنه بجديه هتتعب اخر السنه دي من وجهه نظري مش صح

٢٠.. في فترة الامتحانات ذاكر و اجتهد برضو لكن حط فمخك ان اي نتيجه هترضي بيها و ان كل اللي يجيبه ربنا كويس (دا هيطمنك) و فنفس الوقت ادعي ربنا ان ربنا يكرمك انتا و صحابك و تحققوا حلمكم

٢١..في الفتره اللي قبل الامتحان حاول تعدي عينك على المنهج كله (تراجع المنهج كله من مصدر المذاكره بتاعك) دا مفيد جدا جدا جدا
و من وجهه نظري ان فكره انك تقعد تحل امتحانات من غير مراجعه المنهج دي غلط

٢٢.. بعد متيجي من اي امتحان اقنع نفسك انك ان شاء الله هتقفله(حتى لو عارف نفسك ناقص درجات) و ادعي انك ان شاء الله هتقفل كل الامتحانات اللي جايه دا هيديك طمأنينه كبيره و هيخليك متتأثرش بالامتحانات اللي عدت لو مش حالل فيها كويس

٢٣.. المهم.. في اي وقت لو حد سألك عن حالك في المذاكره او ذاكرت ايه ياريت تجاوب عليه بكل مصداقيه و متداريش عنه حاجه بحجه الحسد لإنك كدا بترتكب ذنب و هو الكذب
ومسك الختام.. لو كنت هتاخد قدوه في حياتك و في مذاكرتك فمفيش افضل من انك تقتدي بالرسول (عليه الصلاة والسلام) اتخذه قدوه في مذاكرتك و في معاملاتك و في كل حاجه... بجد لو انا حققت نجاح في ٣ث فالموضوع ده كان ليه فضل كبير 
و بس 
يارب اكون اتكلمت عن اغلب المشكلات و يارب يكون كلامي مفيد ليكم
و دعواتكم...

الرجوع الى أعلى الصفحة اذهب الى الأسفل

مُشاطرة هذه المقالة على: redditgoogle

لا يوجد حالياً أي تعليق

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى