سؤال و جواب كل ما يخص الابحاث ؟
-------------------------------------
الخطوة الأولى ( مرحلة الكود ) :
1- كل طالب هيفتح موقع دا :http://studea.emis.gov.eg
تسجل بالرقم القومي الخاص بك ( الرقم القومي بتاعك موجود فى شهادة ميلادك )

2- بعد التسجيل هتلاقي كود تسجله فى ورقة او مذكرة او صوره بالموبايل سكرين شوت

احتفظ بالكود ده لانه هو الكود اللى الوزارة هتبعتلك الاختبارات عليه بعد يوم 2 ابريل

-------------------------------------
-------------------------------------
الخطوة الثانية ( مرحلة البحث ) :
1- يوم 2 ابريل ان شاء الله كل طالب هيفتح نفس الموقع :http://studea.emis.gov.eg
بالرقم القومي الخاص بك ( و بنكررها تانى الرقم القومي بتاعك موجود فى شهادة ميلادك )

2- هاتشوف الابحاث المطلوبة منك فى كل مادة اسئلتها ايه وتحاول تجاوبها
فى ورق عادى او مطبوع زى ما تحب بس بشرط عدم النقل من الاخرين و مايكونش جاهز من المكتبات

و بعد ما تخلص بحثك تروح للخطوة اللى بعد كده
-------------------------------------
-------------------------------------
الخطوة الثالثة ( مرحلة رفع البحث على المنصة ) :
** بعد ما تنتهى من عمل ابحاثك .. ركز معايا

هتكتب البحث على الكمبيوتر عادى كانك بتكتب اى ورقة وهتعملها حفظ على سطح المكتب
مثلا باسم اختبار رياضيات بصيغة ورد WORD او بى دى افPDF

ازاى ترفع ابحاثك على المنصة ؟
هتدخل على موقع المنصة : https://edmodo.org
و دا موقع مختلف عن موقع الكود اللى فى الخطوتين السابقين
هتدخل بالرقم القومي الخاص بك ( و بنكررها تانى الرقم القومي بتاعك موجود فى شهادة ميلادك )

وبعد ما تفتح الموقع هتلاقى فى رمز او ايكونة عليها كلمة رفع الملفات هتضغط عليها
هيفتح معاك نافذة علشان تشوف مكان حفظ ملفك انت حافظه فين واول ما تلاقيه هتضغط عليه
ثم تضغط على كلمة موافق
هيترفع معاك الملف ويقولك تم التاكيد
( لاحظ انك كده رفعت بحث واحد و باقى الابحاث هتعمل نفس الكلام مع كل بحث)
-------------------------------------
-------------------------------------
س : هل هتظهر لى نتيجتى مباشرة بعد رفع الابحاث ؟
ج: لا طبعا لسه المعلمين هيدخلوا على المنصة الالكترونية ويشوفوا كل بحث من ابحاث الطلبة بتوعه
-------------------------------------
س طيب مثلا انا ماعنديش نت ومش بفهم فيه وامكانياتى المادية ماتسمحليش اروح سيبر او كافيه نت اعمل ايه
ج: الوزارة بتسهل عليك الموضوع وبتقولك مدام كتبت البحث وطبعته وماعندكش امكانية ترفعه ممكن تسلمه باليد الى ادارة المدرسة اللى انت فيها
-------------------------------------
س : طيب افترض مثلا انا كبرت ادماغى وماعملتش البحث ده ايه اللى هيحصل يعنى
ج: هتضطر تيجى قبل زمايلك السنة الجاية باسبوعين قبل الموعد الرسمى للدراسة وبرضه لازم تقدم بحث والا الوزارة هتعتبرك راسب وتعيد السنة
-------------------------------------
س : والكلام ده لحد امتى ؟
ج : معاك شهر ونصف يعنى لحد 15/5/2020 م
-------------------------------------
س : طيب الاختبار ده فى المنهج كله ؟
ج : طبعا لا الوزارة قالت الاختبارات فى المنهج لحد 2020/3/15 م بس يعنى اللى بعد كدة مالكش دعوة بيه
-------------------------------------
س : طيب الاسئلة ايه نوعها ؟
ج : اسئلة سهلة وبسيطة تعتبر زى الواجب المنزلى اللى بتحله فى البيت
-------------------------------------
بالتوفيق للجميع