حبايبي { تانيه ثانوي }  .. الأحياء في جيبك
زي ما وعدتكم بإذن الله هنبدأ المراجعة الكتابيه إللي هتساعدك علي الحفظ والفهم ومراجعة المعلومات المهمة ..
منهجك يا جميل عبارة عن فصلين .. عمليتين حيويتين بيحصلوا داخل جسمك .
الفصل الأول بنتكلم فيه عن الإخراج في الكائنات الحية
الفصل الثاني بنتكلم فيه عن الإحساس في الكائنات الحية
قلمك ، كشكولك ، واحدة شاي بالقرنفل و يلا بينا يا كينج
 1 فصل أول :
في أول بوست هنتعرف علي جزئية مهمه جداً في فصل الإخراج
هو في البداية كده يعني ايه إخراج !؟
الإخراج : عملية حيوية يتخلص فيها الكائن الحي من الفضلات الناتجة عن العمليات الحيوية أو نواتج التمثيل الغذائي الضارة .
يعني إنت أكلت و هضمت و عملت تمثيل غذائي عشان تستفيد من الغذاء فــ تبقي شوية فضلات داخل جسمك هتوديهم فين !
جدع ( هتعملهم إخراج من جسمك )
طب يا كينج لو الفضلات دي تراكمت في الجسم و معملتش لها عملية إخراج ! إيه يحصل ؟
جده ( يحصل تسمم و ممكن يموت الشخص )
يبقي الكائن الحي لازم يعمل عملية إخراج
بعد كده عاوز أعرف إيه شرط الإخراج بالمفهوم العلمي !
إيه المادة إللي لما تطلع من جسمك أقول عليها مادة إخراجية و المادة إللي لما تطلع من جسمك أقول عليها مادة غير إخراجية
إنت طبعاً عارف إن أي خلية داخل جسمك تتركب من حاجة أساسية إسمها غشاء بلازمي ..
بص بقا ياباشا :
بالمفهوم العلمي ..
لو المادة إللي خارجة من جسمك طلعت من الغشاء البلازمي تبقي ( مادة إخراجية )
و لو المادة إللي خارجة من جسمك مطلعتش من الغشاء البلازمي تبقي ( مادة غير إخراجية )
يبقي شرط الإخراج : أن تنفذ المادة من الغشاء البلازمي
المواد غير الاخراجية و التي لا يعتبر تخلص الجسم منها إخراجاً بالمفهوم العلمي هي :
• الطعام غير المهضوم ( التبرز ) ( البراز )
طعام لم يحدث له هضم فخرج من خلال فتحة الشرج مباشرة دون أن يعبر الغشاء البلازمي بالتالي هيكون مادة غير إخراجية .
• النيتروجين .. و ده بيدخل الرئتين في الشهيق و بيخرج في الزفير دون أن يعبر الأغشية البلازمية بالتالي هيكون مادة غير إخراجية .
يبقي عندي مادتين غير إخراجيتين وهما :
* الطعام غير المهضوم أو التبرز
* النيتروجين في الهواء الجوي
المواد الإخراجية بقا و دي إللي بتعبر من الغشاء البلازمي عشان كده بقول عليها مادة إخراجية :
• ماء و ثاني أكسيد الكربون .. دول ناتجين عن تكسير وهضم الجزيئات العضويه داخل جسمك شكل الجلوكوز كده
• فضلات نيتروجينيه ( نشادر ، يوريا ، حمض اليوريك )
و دي ناتجة عن تكسير البروتينات
• أملاح
• مواد سامة
• توابل
يبقي عندك حوالي ٦ مواد إخراجية وهم :
ماء - ثاني أكسيد الكربون - الفضلات النيتروجينيه - الأملاح - المواد السامة - التوابل
طب هل المواد الإخراجية بتخرج من جسمك بواسطة أعضاء ولا بتخرج لوحدها كده !؟
أكيد لها أعضاء خاصة
طيب ما هي الأعضاء الإخراجية و المواد الذي يُخرجها كل عضو منهم
٤ أعضاء إخراجية :
( الجلد - الرئتين - الكليتين - الكبد )
* الجلد : طبعاً بيعمل إخراج عن طريق العرق
طب العرق بيتكون من إيه !
جدع ( ماء و أملاح و فضلات نيتروجينيه بنسبة صغيره)
يبقي الجلد بيقوم بـ إخراج ٣ مواد إخراجية في صورة عرق .
* الرئتين : طبعاً بيحصل عمليتي الشهيق و الزفير
بيخرج من خلالهم
( ماء ، ثاني أكسيد الكربون ، توابل متطايرة )
* الكليتين : طبعاً بيعملوا اخراج عن طريق البول ( التبول )
طب البول بيتكون من إيه !
جدع شكل العرق ..
( ماء و أملاح و فضلات نيتروجينيه ) بالإضافة إلي التوابل
يبقي الكليتين بتخرج ٤ مواد إخراجية في صورة بول .
* الكبد .. طبعاً ده إللي بيخلص جسمك من المواد السامة
طب ما هي وظائف الأعضاء الإخراجية دي !
لو إنت مركز من أول البوست هتجاوب السؤال ده بكل سهولة .. وظائف الأعضاء الإخراجية هي :
١ - التخلص من المواد التالفة و المواد السامة
( عشان لو تراكمت هتسبب تسمم ثم الموت )
٢ - تنظيم اسموزية الجسم ( الماء والاملاح داخل الجسم )

بمخطط ذهني ..
( ما هو الإخراج و المواد الإخراجية و غير الاخراجية و أعضاء الإخراج و المواد التي يُخرجها كل عضو )
بس يا كينج
م . محمد ماهر

شاهد رسومات الإخراج أحياء تانية ثانوي