مدرس اون لايندخول

إزاي نفرق بين ترعة بحر يوسف وترعة الإبراهيمية على الخريطة ؟

20122019
إزاي نفرق بين ترعة بحر يوسف وترعة الإبراهيمية على الخريطة ؟

إزاي نفرق بين ترعة بحر يوسف وترعة الإبراهيمية على الخريطة ؟
إزاي نفرق بين ترعة بحر يوسف وترعة الإبراهيمية على الخريطة ؟ 80961210

شايفين الخط الأزرق الغامق اللي ماشي بمحاذاة وادي النيل .. بيرمز لإيه؟؟
الإجابة: ترعة الإبراهيمية ، وديه كلنا عارفينها كويس وإتكلمنا عنها قبل كده مع بعض في الخريطة اللي فاتت وقولنا إن في 3 ترع ورد ذكرهم في درس خصائص البيئة الزراعية كجزء من المشروعات التي تستخدم لتوصيل مياه النيل للأراضي الزراعية وهم كالآتي : (ترعة الإسماعيلية - ترعة النوبارية - ترعة الإبراهيمية)

طيب هنميز مكانها إزاي على الخريطة؟
قولنا إنها موجودة في (غرب الوادي) يعني نبص كويس على وادي النيل هنلاقيها شماله وبتكون خارجة تحديداً من عند أسيوط

تمام لحد كده .. صحصحوا بقى في اللي جاي وأوعووووا حد يتوه مني

شايفين الخط الأحمر اللي ماشي جنب ترعة الإبراهيمية ده .. ده بيرمز لترعة ثانية إسمها (ترعة بحر يوسف) وديه وردت برضوه في الدرس الأول : خصائص البيئة الزراعية بس في الحديث عن منخفض الفيوم

ترعة بحر يوسف بتتفرع من (ترعة الإبراهيمية) وبتكون خارجة منها تحديداً من عند ديروط - وكلمة ديروط مش عليكم في المنهج ماشي - وتفضل ماشية جنبها وفجأة بتحود وتدخل ناحية إيه يا شطار ؟؟؟؟
برافوووو .. ناحية منخفض الفيوم عشان تروي أراضيه ويصبح منخفض زراعي بالرغم من وقوعه في الصحراء .. تمام كده

الخلاصة :
مين الأساس معانا واللي خارج من النيل مباشرة .. ترعة الإبراهيمية اللي ماشية غرب وادي النيل
طب مين الفرع اللي خارج من ترعة الإبراهيمية .. ترعة بحر يوسف اللي أكثر حاجة بتميزها إنها داخلة منخفض الفيوم

يعني أي ترعة في غرب الوادي يا مستر .. نكتبها إيه ؟؟ الإبراهيمية يا حبايبي
طب أمتى نكتبها بحر يوسف .. لما نلاقيها داخلة جوه المنخفض

أتمنى تكونوا فهمتوا خريطة النهارده وعلى وعد بمزيد من المراجعات المتميزة والحصرية فقط مع مستر / محمود ناصف

إعداد علا وتحت إشراف الأستاذ / محمود ناصف
remove_circleمواضيع مماثلة
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى