مدرس اون لايندخول

لطلاب الثانوية العامة.. كلية الحاسبات والمعلومات "تفاصيل"

لطلاب الثانوية العامة.. كلية الحاسبات والمعلومات "تفاصيل" Oaoa-o10

كلية حاسبات ومعلومات.. تعتبر كلية حاسبات ومعلومات واحدة من اكثر الكليات التي تشغل بال الكثر من طلاب الثانوية العامة شعبة علمي رياضة لانها تتميز بوجود عدة تخصوصات.


كلية حاسبات ومعلومات هي كلية دراستها بتقوم على دراسة كل ما له علاقة بالـsoftware وبرمجة الكمبيوتر من أول برنامج «الويندوز» حتى برامج الـoffice والألعاب، ودراستها بتختلف إلى حد ما من قسم للتاني.

-الدراسة كلها  بتبقي باللغة الإنجليزية، ولو أنت مكنتش لغات متقلقش بالتعود هتعرف تعدي المشكلة دي.

-كليات حاسبات معلومات في الأصل بتاخد من علمي رياضة، لكن في قسم فقط في جامعة عين شمس اسمه «Bioinformatics» هو الوحيد اللي ممكن تدخله من علمي علوم  وده هنتكلم عنه بالتفصيل في الكلام عن الأقسام.

- بيختلف المسمي الوظيفي ليك على حسب القسم اللي هتخصص فيه، بيبقي بين مبرمج أو مطور، ورسمياً اسمك اخصائي حاسب، وبرة مصر مهندس برمجيات، وشغلك بيكون في شركات الكمبيوتر اللي في مصر وبرة مصر إلخ. ولو طلعت من العشرة الاوائل في الكلية فيه شركات زي مايكروسوفت وأوراكل بتاخدك تشغلك.

-أقسام الكلية: 
قسم علوم الحاسب Computer Sciences Department = CS
وده قسم هتدرس  فيه معظم لغات البرمجة الموجودة في الكمبيوتر يعني مثلاً زي: السي، والسي بلس، والسي بلس بلس، والجافا، والاسيمبلي، والسي شارب.. إلخ.

والمواد بتاعته بتختلف من جامعة لجامعة، لكن عموماً المواد باختصار بتعلمك إزاي تترجم لغات البرامج وإزاي تدرس البنية التحتية للبرمجيات، وكمان بتاخد مقتطفات عن برمجة الشبكات، ومواقع الانترنت، لكن دراستك في هذا القسم بتنصب على برمجة الحاسب.

والتخصص في القسم ده من سنة تالتة في بعض #الجامعات زي حلوان، وفي سنة رابعة زي عين شمس، وفي حاسبات بنها مفيش غير القسم ده وبس.

قسم نظم المعلومات Information Systems Department = IS
وده بتدرس فيه برمجة قواعد المعلومات وبعض من شبكات الإنترنت والاتصالات وبعض من مواد التسويق وإدارة الاعمال، وبرضه بتاخد بعض لغات البرمجة، بس مش كلها، لكن دراسته تنصب على قواعد البيانات، وهتتعلم فيه إزاي تصمم برامج إدارة الشركات والبنوك، وإزاي تخزن بيانات الشركة كلها على برنامج واحد أو على موقع انترنت واحد.

قسم نظم المعلومات الحيوية Bioinformatics Department
وه قسم خاص  ومصاريفه بتختلف من سنة لسنة بس السنة اللي فاتت وصلت لـ 17 ألف جنيه، وهو قسم  بيدخله علمي علوم, بس لازم بتاخد رياضة 2 في أول سنة لأنك هتدرس فيه مواد من صيدلة، ومن علوم أحياء طول السنوات الدراسية، وعادي ممكن علمي رياضة برضه يدخله والتخصص في القسم ده من سنة أولى.

وهنا في القسم ده بتدرس إزاي تبرمج الشرايح الالكترونية اللي بتعالج الناس من أشد الأمراض وإزاي بتدرسها وإزاي بتجربها.

وطبعاً الشرايح أنواع والمواد كتيير في القسم ده. وشغلك هنا بيتوقف على المستشفيات والمستشفيات الخاصة بالذات.
​​​​​​​
طب إيه الفرق بين القسم ده والهندسة الطبية؟
في إختلاف كبير بينهم لإن  الهندسة الطبية بتركز على صيانة المعدات الطبية لكن القسم ده أنت بتتعلم إزاي تبرمج المعدات دي للتشغيل يعني ربط البرمجة بالطب أو تقدر تسميها البرمجة الطبية.

قسم تكنولوجيا المعلومات Information Technology Department = IT

وهنا بقى هتتعلم إزاي تبرمج شبكات الإنترنت وتعرف إيه هو الإنترنت اساساً وليه اتعمل ومين اللي عمله وتتعلم برضه إزاي تبرمج مواقع الإنترنت الكبيرة وتاخد لغات برمجة خاصة بالمجال ده زي الفي بي سكريبت، والروبي، والبايثون، والجافا. القسم ده موجود في أغلبية كليات الحاسبات والمعلومات بس مش كلها.

قسم الحسابات العلمية Scientific Computing Department = SC

والقسم ده بيركز على الرياضيات أكتر لإنك هتتعلم فيه رسم الأشكال الهندسية المعقدة بالبرمجة وفيه بعض مواد نظري.

المواد باختصار بتتكلم عن نظرية الحسابات، وكيفية الرسم بالحاسب، ودراسة الإحصاء والإحتمالات والقسم موجود في جامعة عين شمس فقط.

قسم العلوم الأساسية Basic Sciences Department = BS
والقسم ده بقى  هتدرس فيه أساسيات الكمبيوتر، وأساسيات الكمبيوتر من ناحية العلم يعني رياضة وفيزيا. بجانب المواد النظرية. والقسم ده برضو موجود في جامعة عين شمس بس.

قسم نظم المعلومات الجغرافية Geographic Information Systems = GIS
وده بقى قسم حلو لمحبي الاتصالات.

طب إيه الفرق بين القسم ده وهندسة الإتصالات؟
بمنتهي البساطة هندسة الأتصالات بتركز على الكهرباء، أما أنت بتركز على الكمبيوتر، بتتعلم دراسة الرادار و شاشات المراقبة والأقمار الصناعية.

والقسم موجود في قلة قليلة من كليات الحاسبات والمعلومات، لكن عموماً أنت هتاخده كمادة في سنة رابعة ضمن قسم نظم المعلومات.

قسم هندسة البرمجيات Software Engineering Department = SE
واضح من الاسم إن لقبك رسمياً جوة مصر أو برة مصر هو «مهندس برمجيات». قسم هندسة البرمجيات موجود في جامعة حلوان بس، ومصاريف القسم أخفّ من مصاريف قسم عين شمس الجديد, والسنة تعمل لها 7500 جنيه والتخصص فيه من سنة  أولى.

وهتاخد فيه كل لغات البرمجة فهي خليط من مواد علوم حاسب على نظم معلومات على بعض من تكنولوجيا المعلومات على مواد من هندسة البرمجيات اللي نازله جديد على مواد دعم و اتخاذ قرار.

طبعاً رغم إنك هتاخد كل لغات البرمجة اللي في الدنيا, إلا أنك مش هتاخدها بكمية كبيرة،  لأن اهتمامك هنا هينصب فقط على البرمجيات ثقيلة المعيار أو البرامج الكبيرة.

قسم بحوث العمليات ودعم اتخاذ القرار Decision Support And Progresses Researches = DS-PR = DS
في القسم ده بتاخد مواد رياضية كتير ومواد فيها حفظ وبرمجة مش كتيرة.

وهتدرس فيه إزاي تتخذ القرار في أي عملية الكترونية، وإزاي تناقشها بأسلوب علمي بحت، وشغلك يبقى في مراكز حساسة زي رئاسة الجمهورية ومجلس الوزراء ومراكز دعم اتخاذ القرار الحكومية التابعة للرئاسة. فلو عاوز القسم ده, يبقى لازم تجهتد كويس أوي والقسم موجود في جامعة القاهرة والمنصورة.

قسم نظم الحاسبات Computer Systems Department = CS
إيه الفرق بين القسم ده وقسم هندسة الحاسبات اللي في كلية هندسة؟
في تشابه كبير بينه وبين قسم هندسة الحاسبات اللي في كلية هندسة، لأنك هتدرس إزاي تربط البرمجة بالهاردوير، وإزاي تبرمج البروسيسور و إزاي تبرمج الهارد، والكلام ده بيتاخد في قسم هندسة حاسبات إلا أن قسم هندسة حاسبات نشاطه أكتر على الهاردوير، والسوفتوير فيه قليل.

في قسم نظم الحاسبات هتاخد البرمجة بشكل مكثف عن السوفتير لكن الهاردوير قليل والقسم موجود في جامعة عين شمس وفقط.
شروط الالتحاق لطلاب الثانوية العامة بكلية الحاسبات والمعلومات بجامعة سوهاج، حيث إن الكلية تشترط عدد من القواعد المنظمة لقبول الطلاب بأقسامها.

اقسام كلية حاسبات ومعلومات التي تتوافر في بعض الجامعات:
1-قسم علوم الحاسب( حلوان،عين شمس).
2-قسم نظم المعلومات.
3-قسم تكنولوجيا المعلومات( القاهرة، وحلوان، والمنصورة، والزقازيق والمنوفية، وأسيوط، وبني سويف، والمنيا).
4-قسم نظم الحاسبات(عين شمس وبنها).
5-قسم الحسابات العلمية(عين شمس، وبنها، والمنيا).
6-قسم العلوم الأساسية( عين شمس، والفيوم، وقناة السويس).
7-قسم نظم المعلومات الحيوية(عين شمس).
8-قسم نظم المعلومات الجغرافية(القاهرة).
9-قسم هندسة البرمجيات(حلوان وعين شمس).
10-قسم بحوث العمليات ودعم اتخاذ القرار(القاهرة، والزقازيق، والمنوفية).
11-قسم الوسائط المتعددة(أسيوط وبني سويف).

كليات الحاسبات والمعلومات 

حاسبات ومعلومات الزقازيق.
حاسبات ومعلومات سوهاج.
حاسبات وذكاء اصطناعي حلوان.
حاسبات وذكاء اصطناعي بنها.
حاسبات ومعلومات الفيوم.
حاسبات ومعلومات قناة السويس بالإسماعيلية.
حاسبات ومعلومات كفر الشيخ.
حاسبات ومعلومات بني سويف.
حاسبات ومعلومات دمنهور بالنوبارية.
حاسبات ومعلومات أسيوط.
حاسبات ومعلومات المنوفية بشبين الكوم.
حاسبات ومعلومات المنصورة.
حاسبات ومعلومات طنطا.
حاسبات ومعلومات المنيا.
حاسبات ومعلومات عين شمس.
حاسبات وذكاء اصطناعي القاهرة.
remove_circleمواضيع مماثلة
Mr.Riad
مؤشرات تنسيق القبول بـ كلية الحاسبات والمعلومات :

– حاسبات و ذكاء إصطناعي القاهرة  381.5 درجة.

– حاسبات ومعلومات طنطا 381.5 درجة.

– حاسبات ومعلومات دمنهور بالنوبارية  380.5 درجة.

– حاسبات ومعلومات المنصورة   379.5 درجة.

– حاسبات ومعلومات كفر الشيخ 379.5 درجة.

– حاسبات ومعلومات عين شمس   379.5 درجة.

– الذكاء الاصطناعى كفر الشيخ   378.5 درجة.

– حاسبات ومعلومات الزقازيق  377.5 درجة.

– حاسبات و ذكاء إصطناعي بنها   376.5 درجة.

– حاسبات و ذكاء إصطناعي حلوان    375.5 درجة.

– حاسبات ومعلومات الأقصر 375.5 درجة.

– حاسبات ومعلومات المنوفية بشبين الكوم   375.5 درجة.

– حاسبات ومعلومات السويس  375 درجة.

– حاسبات ومعلومات قناة السويس بالإسماعيلية  375 درجة.

– حاسبات ومعلومات الفيوم  374 درجة.

– حاسبات ومعلومات بني سويف 373 درجة.

– حاسبات ومعلومات المنيا  373 درجة.

– حاسبات ومعلومات أسيوط 372.5 درجة.

– حاسبات ومعلومات سوهاج  372 درجة.
Mr.Riad
٨  نقاط مهمة بخصوص كليه حاسبات 
١. هل في تخصصات معينه لعلمي علوم؟
من السنه اللي فاتت ٢٠٢٠ و نزل قرار من المجلس الأعلى للجامعات ان علمي علوم يقدروا يدخلوا كليه الحاسبات او الذكاء الاصطناعي و يكون مفتوح لهم جميع التخصصات. بمعنى ان مغيش فرق بين علمي رياضه و علمي علوم الا ان علمي علوم هيدرس ماده زياده في الترم الاول الا وهي رياضه صفر و هي تعادل منهج الجبر و منهج التفاضل والتكامل في رياضه ٢.

٢ هل في امتحان قدرات لعلمي علوم (اختبار رياضه ٢)؟
لا مفيش امتحان قبول لعلمي علوم و اه انا عارف انه مكتوب ان الطالب لازم يجتاز رياضة ٢ في موقع التنسيق. بس الكلام ده مش صح و كل الكليات بتقبل طلبه علمي علوم بتنسيق منفصل عن علمي رياضه بنسبه ١:٢  تقريبا بمعني لو الكليه هتاخد ٣٠٠ طالب يبقى ٢٠٠ طالب علمي رياضه و ١٠٠ علمي علوم

٣ هل لو الطالب سقط في رياضه ٠ هيتفصل من الكليه؟
لا مش هيتفصل و هيفضل يعيد فيها لحد ما ينجح

٤ هل في فرق بين كليه حاسبات   كليه ذكاء اصطناعي؟
لا مفيش الاتنين نفس الكليه و بيدرسوا نفس المنهج اول سنتين ونص  الاختلاق بس في اخر سنه اللي هي سنه التخصص يعني كأنك دخلت كليه حاسبات و تخصصت في الذكاء الاصطناعي
من الأخر خريج كليه حاسبات يقدر يشتغل في الذكاء الاصطناعي  و العكس صحيح لان الاتنين بيدرسوا نفس المنهج تقريبا، من الاخر الاثنين وجهين لعمله واحده

٥ ده سؤال من عندي. هل في فرق بين التخصصات؟
مفيش فرق ضخم بين التخصصات و ان كل التخصصات بتسمع في بعض. بمعني لازم تاخد نبذه عن باقي التخصصات علشان تعرف تتخصص في التخصص بتاعك و بالمناسبه كل الاقسام و التخصصات بتدرس ذكاء اصطناعي.  الفرق انك هتتعمق في جزئيه معينه في القسم بس علشان تتخصص بجد فيها لازم تحضر ماجستير و تشتغل عملي. الموضوع مختلف عن كليه هندسه بحيث ان هناك فروقات ضخمه بين الأقسام و مهندس ميكانيكا ما يعرفش اي حاجه عن اقسام مدني  

٦ انهي افضل حاسبات ولا هندسه؟
لو انت عايز تشتغل مهندس مدني او ميكانيكا او كهرباء او طيران او اي من تخصصات الهندسه يبقى ادخل هندسه
لو انت عايز تتخصص في البرمجيات يبقى ادخل حاسبات افضل لك
لو انو عايز تتخصص شبكات يبقى ادخل هندسه افضل من حاسبات بس في جميع الحالات هتشتغل سواء من حاسبات او من هندسه
لو بتتكلم على الفلوس يبقى خريج كليه حاسبات هيقبض اكثر من خريج هندسه
و لو عايز تسافر سفرك من حاسبات لامريكا و اوربا اسهل من هندسه بس بشرط انك تكون شاطر جدا في البرمجه

٧ هل خريج حاسبات بيشتغل؟
اه بيشتغل و فرصه في السوق افضل بكثير من خريج هندسه . انا معرفش حد اتخرج من عندنا و مش لاقي شغل و هو بيعرف يكتب برامج لوحده

 ٨ هل لو انا علمي علوم همشي في حاسبات ؟
الصراحه معرفش اجاوب علي سؤالك . لو انت مش حابب المجال او دماغك مش عارغه تفهم الكود يبقي مش هتعرف تمشي فيها حتى لو انت علمي رياضه و لو انت دماغك كلها كمبيوتر و شاطر يبقي هتقدر تمشي فيها ولو كنت ادبي

بالتوفيق للجميع
 زميلكم جرجس طالب بكليه حاسبات سوهاج
الاستاذ
كلية_حاسبات_ومعلومات
حاسبات ومعلومات بتختص أكتر بالفرع الإلكتروني من حياتنا ولازم عشان تدخلها تبقى متأكد 100% إنك بتحب التصميم والبرمجة
لازم تبقى مهتم بالمواقع وال platforms المختلفة زي فيس بوك وانستجرام وجوجل مثلا
- طب ليه لازم تبقى مهتم؟
- ببساطة لأنك مستقبلاً أنت ال هتصمم مواقع زي دي فلازم تعرف المواقع دي بتتعمل إزاي وبتُستخدم إزاي
كلية بتخدم المجتمع بشكل كبير وبتسهل حياتنا جدا بشكل يومي ومش بس كده دي بتساعدك توصل لمرحلة من الرفاهية زي إنك تبقى قاعد في البيت وعارف أخبار العالم كله مجرد ما تفتح موقع أو أبليكيشن
نيجي بقى لطبيعة الكلية و دراستها..
الكلية أربع سنين ، بتدرس فيها مباديء البرمجة والكمبيوتر و بتتعرف على ال Algorithm أو الخوارزميات وهي طريقة الحل
الكلية زي أي كلية في مصر لو اعتمدت عليها لوحدها مش هتعرف تواجه الحياة العملية بعد كده لازم تجتهد مع نفسك وتسعى إنك تتطور بما يعادل سوق العمل ومتعتمدش على أساسيات الكلية وبس
والمجال ده في كورسات مجانية كتير أشهرهم هيبقوا موجودين على يوديمي وكورسيرا لأنه واسع وممكن تتعلم لغات جديدة وتتقنها زي الjava و الp.h.p و غيره.
نبدأ نتكلم عن اقسام الكلية
اولا فى اقسام بتكون موجوده فى كل الجامعات الموجوده فيها الكليه فى مصر زى مثلا :    
《أ 》- اول حاجه قسم Computer Sciences الي معروف ب CS :
القسم ده من اجمل الاقسام في كلية حاسبات و معلومات
و ده لأنك هتاخد فيه لغات برمجة كتير من الموجودة في الكمبيوتر يعني مثلاً زي《 السي و السي بلس و السي بلس بلس و الاسيمبلي و السي شارب وغيره 》
- القسم ده علم الرياضة فيه مهم جدا فلو انت شاطر في الرياضة ادخل من غير تردد واعمل حسابك هتغرق في الأكواد "))
- المواد بتاعته بتختلف من جامعة لجامعة , لكن عموماً المواد  بتعلمك ازاي تترجم لغات البرامج و ازاي تدرس البنية التحتية للبرمجيات , لانك هتبقى مصمم برمجيات
- كذلك بتاخد مقتطفات عن برمجة الشبكات ومواقع الانترنت
- لكن دراستك في القسم ده بتنصب على برمجة اكتر
وطبعاً لقبك في مصر بيبقى مبرمج او مطور و رسمياً اسمك اخصائي برمجة
بره مصر : مهندس برمجيات
المستقبل في القسم ده مشرق جداً , و بره المجال ده بيبقى له اهتمام اكبر و مجالات شغله اكتر بكتير من مصر ومحتاجة واحد ذكي وقادر يطور نفسه أول بأول
《ب》- تاني قسم هو نظم المعلومات Information Systems Department = IS :
قسم نظم المعلومات قسم كويس جدا وطبعاً نظم المعلومات بتدرس برمجة و شوية من شبكات الانترنت و الاتصالات و شوية من مواد التسويق وادارة الاعمال وده أكيد هيفيدك لو حبيت تشتغل في حاجة بعيداً عن البرمجة شوية
- طبعاً البرمجة هنا نقصد بيها برمجة قواعد البيانات S.Q.L
- إلا انه برضه بتاخد شوية لغات من البرمجة مش كلها
- بس دراسته بتقوم على قواعد البيانات
- المواد باختصار بتتكلم عن التجارة الالكترونية , وبرمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي
-  فيما معناه ازاي تتعلم تصمم برامج لإدارة الشركات و البنوك  و ازاي تخزن بيانات الشركة كلها على برنامج واحد او على موقع انترنت واحد
لقبك جوه مصر بيبقي : اخصائي نظم او مطور او مبرمج
بره مصر بقي: مهندس معلومات , او مهندس معلوماتية
كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر من غيره, لان الشغل هنا بيبقى احسن كمان ومعظم بيانات العملاء في اي شركة القسم ده هو الي بينظمها.
وشغله كله بيانات يعني حاجة كدة زي السجل المدني اعوذ بالله ايه التشبيه السيء ده ما علينا ندخل في اخر قسم :'D
《ت》- تالت وهو قسم تكنولوجيا المعلومات Information Technology Department = IT :
قسم موجود في اغلب الجامعات و هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين عمله و تتعلم بردو ازاي تبرمج مواقع الانترنت الكبيرة و هتاخد لغات برمجة خاصة بالمجال ده زي《 الفي بي سكريبت و الروبي و البايثون و الجافا طبعاً 》
- دراسته ممتعة جداً و بتتعلم فيها ازاي تبرمج الشبكات وازاي تبرمج مواقع الانترنت الكبيرة , و فيها مواد اتصالات بردو وبيقي اسمك في مصر : مبرمج او مطور وبره مصر : بيبقي اسمك مهندس شبكات
اقسام بقى موجوده فى بعض الكليات زى :
1-قسم نظم الحاسبات
2-قسم الحسابات العلمية
3-قسم العلوم الأساسية
4-قسم نظم المعلومات الحيوية 《 بايو انفورماتيكس》 " هنقولك شوية معلومات عنه في الكومنتس شوفه "
5-قسم نظم المعلومات الجغرافية
6-قسم هندسة البرمجيات
7-قسم بحوث العمليات ودعم اتخاذ القرار
8_قسم الوسائط المتعددة
في النهاية عايزين نقولك شوية حاجات ممكن تساعدك :
1 -اعتمد على نفسك مش على الجامعة وفقط عليك في الكلية انك تجتهد وتبحث عن مصادر لنفسك بنفسك وتدور على كورسات تفيدك في مجالك وده هيساعدك أكتر توصل لأهدافك
2- شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها المسابقة دي عبارة عن انهم بيختاروا افضل مشروع تخرج و اسمها Imagine Cup
والفايز فيها بيضمن شغله في الشركة نفسها
3 - في مسابقة عالمية اسمها ACM لو كسبت وطلعت من اول 3 مراكز في المسابقة مع فريقك فأنت وفريقك هتتخطفوا من شركة جوجل لأنهم بيحبوا الناس المتميزة وغالبا هم ال بيكسبو المسابقة دي
《اختار تيمك كويس بقى》
4- ممكن طالب الحاسبات ياخد كورسات هاردوير , بس طبعاً مش بقوة مهندس الحاسبات
محمد الجمل
مصاريف كليات الحاسبات والذكاء الاصطناعي في الجامعات الأهلية

توجد كلية الحاسبات في 8 جامعات أهلية حكومية، وتم تحديد مصاريف كليات الحاسبات والذكاء الاصطناعي والمعلومات في الجامعات الأهلية الحكومية بالأسعار التالية:
  •    مصاريف كلية هندسة الذكاء الاصطناعي جامعة المنصورة الأهلية: 50 ألف جنيه.
  •    مصاريف كلية الحاسبات والذكاء الاصطناعي جامعة أسيوط الأهلية: 40 ألف جنيه.
  •    مصاريف كلية علوم الحاسب والبيانات جامعة الإسكندرية الأهلية: 45 ألف جنيه.
  •    مصاريف كلية الحاسبات والمعلومات الجامعة المصرية للتعلم الإلكتروني الأهلية: 16,275 جنيه.
  •    مصاريف كلية علوم الحاسب جامعة بنها الأهلية: 45 ألف جنيه.
  •    مصاريف كلية الحاسبات والمعلومات جامعة المنوفية الأهلية: 40 ألأف جنيه.
  •    مصاريف كلية الحاسبات والذكاء الاصطناعي جامعة بني سويف الأهلية: 35 ألف جنيه.
  •    مصاريف كلية الحاسبات والمعلومات جامعة الزقازيق الأهلية الجديدة: 40 ألف جنيه سنويًا.
محمد الجمل
مصاريف كلية حاسبات ومعلومات 2023 - 2024 جامعة الإسكندرية
  • مصاريف كلية حاسبات ومعلومات جامعة الإسكندرية 2023 القسم العام .. 2300 جنيه مصري في العام الدراسي.
  • مصاريف كلية حاسبات ومعلومات جامعة الإسكندرية 2023 بالبرامج الخاصة .. تتراوح ما بين 32 إلى 36 ألف جنيه مصري في العام الدراسي الواحد.


وتختلف مصاريف كلية حاسبات ومعلومات جامعة الإسكندرية 2023 بالبرامج الخاصة بحسب عدد الساعات المسجلة لكل فصل دراسي.

وتقوم الكلية بعمل خصومات في البرامج الخاصة للطلاب الأوائل.

حيث يحصل الطالب الأول على القسم على تخفيض 75%، بينما الثاني على القسم 50% أما الثالث على القسم: تخفيض 30%.
الأزهرى
تنسيق حاسبات ومعلومات علمي علوم 2023

• حاسبات ومعلومات كفر الشيخ علوم 361.5

• حاسبات ومعلومات الأقصر علوم 361.5

• حاسبات ومعلومات الزقازيق علوم 361

• حاسبات ومعلومات دمياط علوم 361

• حاسبات ومعلومات بني سويف علوم 360.5

• حاسبات ومعلومات قناة السويس بالإسماعيلية علوم 360

• حاسبات ومعلومات طنطا علوم 360

• حاسبات وعلوم البيانات الإسكندرية علوم 360

• حاسبات ومعلومات عين شمس علوم 359

• حاسبات ومعلومات الفيوم علوم 358.5

• حاسبات ومعلومات السويس علوم 358

• حاسبات ومعلومات المنوفية بشبين الكوم علوم 358

• حاسبات ومعلومات العريش علوم 357.1
privacy_tip صلاحيات هذا المنتدى:
لاتستطيع الرد على المواضيع في هذا المنتدى