تأسيس مهم جدًا للصف الأول والثاني الابتدائي

استعرض الموضوع السابق استعرض الموضوع التالي اذهب الى الأسفل

13082019

مُساهمة 

. تأسيس مهم جدًا للصف الأول والثاني الابتدائي




تأسيس مهم جدًا للصف الأول والثاني الابتدائي  01272
#تأسيس
مهم جدًااااااااااااا للصف الأول والثاني الابتدائي
المنشور ده مهم جدًا لتأسيس ابنك في سنة أولى وأهم لابنك في سنة تانية عشان بيراجع معاه اللي أخدو في سنة أولى وبطريقة سهلة جدًا
إزاي تراجع لابنك قبل ما يدخل الصف الثاني عشان يكون مستعد لدخول السنة الجديدة...هذا البوست طويل جداااااااا بس حاولوا تكملوه للآخر...إن شاء الله ينفعكم

أساليب تأسيس الاولاد في اللغة العربية.
ملحوظة هامة هذا البوست طويل جدا ويمكن لا نحتاجه كله دلوقتي بس انا جمعت وشرحت كل اللي اخدوده الاولاد السنة للي فاتت...وهو عبارة عن 9 دروس تأسيسية

قبل الدخول في منهج الوزارة لازم ناسس اولادنا
طبعا اولادنا حاليا في برايمري تووو... عارفين كل الحروف الهجائية ....ولكن فيه اطفال كتير نسيوا. ...
وفي كتير مننا مش عارف يبدا معاهم بايه عشان نراجعلهم.......وفيه ما شاء الله اولاده عدوا المرحلة ديه
بس ايا كان مرحلتك احفظ البوست ده عندك وراجع باستمرار وشوف ابنك وصل لفين وكمل عليه 

1/ ( القراءة الصوتية)
هو قراءة الحروف الهجائية معاه بالصوت بمعني الف...باء...تاء..ثا...حتي ياء

2/ ( التفريق بين الحروف)
هو انك تشاور علي اي حرف مش بالترتيب وتخليه ينطق الحروف دون ترتيب....والهدف هو التعرف علي اصوات الحروف وليس اسمها فقط

3/(كتابة الحروف بمواضعها)⁦
بمعني ان يتدرب الطفل علي كتابة الحرف عندما يكون في اول الكلمة وفي وسطها وفي اخرها...وطبعا لازم تقوله ان فيه حروف نايمة اللي بتمسك في ايد اصحابها وفي حروف صاحية او عضاضة اللي مبتحبش حد يمسك فيها

( قراءة الحروف بالحركات القصيرة) الضمة والفتحة والكسرة...

الدرس الثانى المد والممدود...

بعد مراجعة اصوات الحروف ومواضع كتاباتها والحركات القصيرة عليها ضمة فتحة كسرة

يمكن ان نبدأ في المد والممدود

أكتر الحاجات اللى بتلخبط أولادنا فى الإملاء 

أولا .. حروف المد فى اللغة العربية ثلاثة أحرف { الألف _ الواو _ الياء } ..

والمد هو إطالة للحركة السابقة عليه .. بمعنى ..

# مد الألف هو فتحة طويلة .. إذن لاااااااااازم يكون الحرف اللى قبله مفتوح ..
# مد الواو هو ضمة طويلة .. إذن لاااااااااازم الحرف اللى قبله يكون مضموم ..
# مد الياء هو كسرة طويلة .. إذن لااااااااااااازم الحرف اللى قبله يكون مكسور ..

دى القاعدة الأولى اللى نقدر نفرق بيها إذا كان الحرف مد أو لأ عن طريق حركة الحرف اللى قبله .. لأن مش كل ألف هى مد ألف ومش كل واو مد واو ..

القاعدة التانية للمد ..
حرف المد لا يسمع نطقه أبدا ..
يعنى لو سمعنا صوت الألف فى الكلمة فهى ليست مد ألف .. زى { فأس } ..
مد الألف فى كلمة زى { ماس } الألف هنا مد لسببين ..
* إن اللى قبلها مفتوح ..
* و إننا لم ننطق الألف .. سمعناها إطالة للفتحة ..
ملاحظة ..
ـــــــــــــ يجب توافر الشرطين معا ..

فكلمة مثل كلمة { ثِياب } الثاء قبل الياء مكسورة .. لكننا ننطق الياء فليس بها مد ياء ..

ياء الملكية .. مد بالياء لأنها توافر فيها شروط المد ..
ولا يشترط فى المد أن يكون من أصل الكلمة ..

الحرف الممدود ..
الحرف الممدود هو الحرف اللى قبل حرف المد مباشرة ..
واللى بياخد الحركة الملائمة للمد ..

مد الألف ==== حرف مفتوح ..
مد الواو ==== حرف مضموم ..
مد الياء ==== حرف مكسور ..
فيديوهات لشرح المد والممدود 

الدرس الثالث السكون

الدرس الثالث....شرح السكون...لابد من حكي القصة اولا ثم سماع الفيديو ثم الاغنية ثم الشرح

يحكى أن هناك عائلة تتكون من ثلاث أخوات و أخ الأولى تدعى الفتحة وهي دائماً مبتسمة وتفتح فمها عند الكلام
فتقول : لَ هـَ صَ ، أما أختها الضمة فهي حنونة جداً وتحتضن الحروف
فتقول وهي تضم شفتاها : نُ مُ سُ ،
و أما الثالثة فهي الكسرة كسرت رجلها فهي دائما تتألم وهي تنطق الحروف وتنزل شفتاها للأسفل فتقول : هـِ تِ ،
و أما الأخ السكون فهو دائما متردد وخائف ولا يأتي إلا اذا سبقه إحدى أخواته ، كما أنه يرتجف أثناء نطق الحروف فيقول : بَرْ

اغنية السكون 
أنا دايرة مدورة انا نونو صغننه
مقدرش اقف لوحدي لازم حركة قبلي
فتحة ضمة كسرة تخليني منورة

شرح السكون
يتم شرحها على هيئة قصة حتى يفهمها الطفل
كان يا ما كان 
كان فى ام عندها
4 اطفال فتحة - كسرة -ضمة - سكون
جمعت الام اولادها وقالت لهم
يا ولاد الحروف الهجائية بتشتكى منكم انتوا عملتلها ايه
قالت الفتحة : انا فتحت الحروف يا ماما
---------جعلت الالف اه - الباء با ----------------الخ
قالت الكسرة : انا كسرت الحروف يا ماما
---------جعلت الالف اى - الباء بى -------------الخ
قالت الضمة : اناضممت الحروف يا ماما
----------جعلت الالف او -الباء بو ---------------الخ
قالت الام :⁦⁩⁦⁩ انت يا سكو⁩ن⁦ ساكت ليه ...عملت اي في الحروف
السكون : معملتش حاجة يا ماما ⁦
الام : يعنى ايه 
السكون : حاولت افتح الحرف لم اعرف - حاولت اكسره لم اعرف - حاولت اضمه لم اعرف -معملتش حاجة فى الحرف يا ماما
الام : طب الحرف حينطق معك ازاى حاول تنطق الحرف كده
السكون : ا ب ت -----------------الخ
الفتحة الكسرة الضمة: ههههههه السكون مش عرفة تنطق الحروف خالص
الام : عيب يا ولاد لايصح نسخر من بعض لازم نساعد بعض
الفتحة الكسرة الضمة : نحن اسفين يا ماما كل واحدة مننا مش حتسيب السكون ينطق الحرف لوحده لازم نمسك ايده ونتنطق احنا الاثنين معا 
هكذا
----- بت اج سم --------- الخ
الاول متحرك والثانى ساكن مثال
اقرا
-------- غصن ......الغين بعدها صاد ساكنة ......غص ثم النون غصن
الام : صح يا حبايبى لا تتركوا السكون لوحدها امسكواا فيها 
وتوتة توتة خلصت الحدوتة 

حدوته تانية للسكون

السكون دايره صغيره فوق الحرف
بنطقه ازاي بقبض علي الحرف وانيمه مش بخرجه من فمي

الدرس الرابع ....درس الشدة⁦⁩

الشدة مش هتبدوا هتفهموها للاولاد غير عند الاملاء او التقطيع للمقاطع الصوتية قبل ذلك هيكتبوه كحركة وتتشرح شرح بسيط...ولكن التطبيق العملي هيكون عند الاملاء والتقطيع الصوتي:

ليه عند الاملاء عشان انت خلاص فهمتي المقصود بالشدة ولازم يكتب الحرف للي عليه شدة مرتين او بمعني اصح هيكتب الشدة عند الاملاء .....وعند التقطيع هياخد باله منها انه هيفك الحرف باتنين وابسط مثال للشرح هو كلمة
أمي...

هتمليها ليه بصوتك علي انها اتنين ميم هيكتبها اممي ..وتقوليه ان مينفعش نكتب نفس الحرف مرتين وراء بعض يبقي ندمجهم ونحط الشدة .....

اغنية الشدة
أغنية( أنا الشدة أنا الشدة)
شد الحرف شد
شد أوعى تمد
اسمع حروفي مرتين ونطقني مرة وحدة
معايا فتح وضم وكسره آويا
شد الحرف شد
قطعتي مرتين واكتبني مقطعين
قطع قطع قطع
اغنية اخرى
الشدة دي حرفين
أكتبها مرة واحدة وانطقها مرتين
وافكها كمان باتنين
الأول ساكن زعلان والتاني متحرك بركان

اغنية ثالثة
انا الشدة الشدودة شكلى شكل السين
اول ماتشوفى انطقنى مرتين
مرة ساكن ومرة متحرك

شرح الشدة

////////// الشدة ////////////

1- تعرفها /
الضغط على الحرف بحيث ينطق مرتين
2- أشكالها ثلاثة /
شد بالفتح شد بالضم شد بالكسر
مَّ م ُّ م ِّ
3- نطقها / زي متعلمنا من الأغنية

( الشدة ببساطة حرفين مش ثلاثة الحرف الأول ساكن والثاني بحركة كمان )

4- أمثلة لكلمات بها شد بالفتح /

- هدَّ ------------ هدْ دَ
- ردَّ------------ ردْ دَ
- علَّم ----------- علْ لَم
- سلَّم ------------ سلْ لْم
-------------------------------------
هكذا من الأمثلة الحرف المشدد بحرفين ادغما ( ضغطا )في حرف واحد
الاول يكون ساكن والثاني متحرك بالفتح

5- أمثلة على الشدبالضم /

- أمُّ ---------------------- أمْ مُ
- يحبُّ-------------------- يحبْ بُ
- عدوُْ ------------------- عدوْ و ُ
----------------------------------------
6- أمثلة لشد بالكسر

- ربِِّي ------------------ ربْ بِي
-يغيِّر ------------------ يغيْ يِر
- سلِّم ------------------ سلْ لِم
-------------------------------------
7- نلاحظ ان الشدة لا تأتي في أول الكلمة

- وأن الشدة ينطق فيها الحرف مرتين الأول عليه سكون والثاني حركة ( فتحة - أو ضمة - أو كسرة )

- إذا كرر الحرف ولكن كان أوله غير ساكن والثاني حركة يكرر الحرف بدون شد
مثلا /
سلكَكُم ------ شكَكَ ----------- تَتَحمل----
----------------------------------------------
8- عند الإملاء

- يجب أن اظهر الضغط على الحرف وكأني بنطقه مرتين أول ساكن ثاني متحرك زي اللاعب لما بينطق الكرة مرتين
-------------------------------------------------------------
9- بعد اللام الشمسية الحرف مشدد على طول
الشَّمس

الدرس الخامس.....اللام الشمسية والقمرية
اغنية اللام الشمسية 

انا اللام الشمسية حروفي جميلة وشقية وهي ت ث د ذ ر ز س ش ص ض ط ظ ل ن

احنا حروف اللام الشمسية أخوات أخوات ت ث دذ ر ز س ش ص ض ط ظ وننط نجيب الام والنون ل ن

اغنية اللام قمرية
انا اللام القمرية ....في الكتابة قوية....وفي القراءة قوية....وفي قمر بينور حواليا اسمه السكون
وحروفي هي
جحا غبي فك مخه وقع

الشرح

الشمسيه زي الشمس متقدرش تفتح عينك فيها اللام بتاعتها مكتوبه بس متقدرش تقولها علشان مش شايفها والقمريه القمر نوره حلو تقدر تفتح عينك تشوفه وتقراه انا معلماها كده لابني كان بيتلغبط بعد كده خلاص

شرح اخر جميل 

حكاية اللام الشمسية واللام القمرية

قبل ما نحكي الحكاية لازم نتفق إن اللام هي *ألف ولام* ..* ألف ولام*
و*ال* كانت ماشية في حالها فشافها الشمس 
والقمر
فراحوا متخانقين عليها
الشمس قالت انا عايزاها والقمر قال انا عايزهااا
ف *ال* وقفت واحتارت وقالت " اروح لمين... اعمل ايه. "
ففكرت وقالت خلاص هروح معاكي يا شمس وهكون * شمسية* وهروح معاك يا قمر وهكون* ال* قمرية وبكدا حلت الخناقة الحمد لله
كان واقف يتفرج على الحيرة دي حروف اللغة العربية واحنا عارفين ان عندنا 28 حرف في اللغة
كانوا برضو واقفين محتارين ما بين الشمس والقمر 
وبعد ما * ال* اتقفت تيجي معاهم هما الاتنين...
الشمس قالت " عشان تفرقوني عن اللام القمرية 
فانا اللام بتاعتي لابسة نضارة
ونتفق يا اصحابي إن الحرف اللي لابس نضارة دا هو الشدة ـّ والشدة بتكون عبارة عن حرف متكرر مرتين مرة بالسكون ومرة عليه حركة ـّ ـُـَِ والحركات زي الفتحة والضمة والكسرة..
القمر قال " خلاص انا هاجي واقف علي اللام وننطقها"الـ" وحركة القمر في اللغة العربية هي ‘السكون‘

والسكون في اللغة العربية شكلين اول شكل قمر مدور 
والتاني على شكل هلال ودي سكون المصحف...

يبقي اتفقنا إن "ال" في اللغة العربية بيجي يقف عليها السكون وننطقها "ال" ...........
كان بيتفرج عليهم زي ما اتفقنا 28 حرف وقفوا واحتاروا
إلحقينا يا "ال" لو مجاش الحركات نعرفهم ازاي..
قالت صحيح احنا كدا في حيرة
قالوا خلاص احنا كدا نقسم نفسنا بالنص ما بين الشمس والقمر 
الشمس قالت ماشي هختار حرفي وهيكونوا " ت.. ث.. د.. ذ.. ر.. ز.. س.. ش.. ص.. ض.. ط.. ظ.. ل.. ن "
ونغني اغنية حروف اللام الشمسية 
".. تاء.... ثاء..........
والقمر قال حروفي هما " ا..ب.. ج.. ح... ع.. غ... ف... ق.. ك... م... و... ي. "
وتعالوا نغني حروف اللام القمرية 
..... "الف.. باء...... "
وبكدا عرفنا اللام الشمسية شكلها ايه واللام القمرية شكلها ايه...
باقي نعرف ازاي ننطق...!!
اتفقنا ان اللام الشمسية مش بننطقها والحرف اللي وراها بيكون عليه شدة وبيتكرر مرتين.... زي (الــدَّ .الدَّ...الدُّ)
والالف اللي بيجي قبل اللام بننطقه أَ والحرف اللي جاي بعده مشدد....
واللام القمرية... اللام هتنطق وفوقها سكون...

الدرس السادس....التحليل الصوتى ....التقطيع الصوتي...تقطيع الكلمات

ايا كان المسمى لازم قبل ما نشرحها للاولاد
نكون راجعنا معاها كل الدروس للي شرحاها قبل كده وخصوصا 
الحروف بالحركات
المد والممدود
السكون
الشدة
اللام الشمسية واللام القمرية

لازم الطفل يبقي متمكن من الحاجات دي جداااااا

طب نبدا الاول الاغنية
قطع قطع قطع قطع .......كل كلمة فيها مقطع
اللام الشمسية مقطع.........واللام القمرية مقطع
والمد مع الممدود .........يلا بينا نقول توت
ونفك الشدة بأتنين .........أصل الشدة دى حرفين
الساكن مع اللى قبله.......و المتحرك مقطع بعده

اولا: لازم نعرفهم الفرق بين الحروف والمقاطع
يعنى الحرف واحد بس:: أما المقطع ممكن يكون حرف او اتنين او تلاتة⁦:
ولازم يعرفوا ان الحروف بتتقسم لحروف شقية متحركة هي الحروووف اللي عليها حركات الفتحة والضمة والكسرة
وحروف هاديه غلبانه وهي الحروفة الساكنة للي لازم تمسك في ايد اخواته او مامته عشان جبان⁦⁩...راجع درس السكون

المقاطع الصوتية ....هي اللي بتتكون من اكتر من حرف
يعنى ايه بقى ؟؟؟؟؟
زي المد والممدود زي با بي بو.....تا تي تو.....ثا ثي ثووو..جا جي جو....الخ
وزي كلمات ال الشمسية وال القمرية ....وعرفنا في الدرس ده
ان ال قمرية هتقف لوحدها كمقطع
لكن ال شمسية تاخد معاها الحرف الساكن من حرفين الشدة اللى بتبقى بعدها على طووول زي مثل كلمة الشمس بتتقسم ازاي الش مقطع وش تاني مقطع والميم مقطع والسين مقطع الش/شم/س راجع الدرس الخامس

وزى الشدة 
دى عبارة عن حرفين زى بعض بس واحد ساكن والتانى متحرك وبدل ما نكتبه مرتين بنكتب شدة عليه لما نجى نحلها الساكن بيروح مع اللى قبله والمتحرك مقطع لوحده لو مش وراه مد او سكون 

الألف اللينة والحرف الساكن وألف التنوين يتعاملوا معاملة الألف المد يعنى مع الحرف اللى قبله على طول

لما ييجي سؤال حلل الكلمات إلي مقاطع صوتية هنعمل ايه :

هنقرأ الكلمة لو مش متشكلة في الورقة ونحاول نشكلها صح . مع انه المفروض تيجي الكلمة للطالب متشكلة و مضبوطة .
ونبدا نقسم بقي
1- اللام القمرية مقطع.
2- اللام الشمسية والحرف المشدد اللي بعدها ناخد منه واحد مع اللام .....ونشوف الحرف للي بعده متحرك هيبقي لوحد ولاه مد وممدود
3- الحرف المتحرك مقطع
4_ الحرف المتحرك والمد لو جه بعده مقطع
5- الحرف الساكن والحرف اللي قبله مقطع
6- الحرف المشدد يتفك مرتين .الاول بيكون ساكن والتاني متحرك . .
( أمثلة )
البحر : ال/ بح / ر
الشمس: الش / شم / س 
قمر : ق / م / ر 
خالد : خا / ل / د
هند : هن / د
الطفل : الط / طف / ل

عند التحليل الصوتى لازم نحط الفاصل ده / بين كل مقطع وما بين كل حرف متحرك

الدرس السابع
( أسماء الإشارة)

اسماء الاشارة
دووول شاطرين شطارة
هذا للمذكر
هذه للمؤنث
هذان للولدان
هاتان للبنتان
هؤلاء....لينا لينا كلنا

أسماء الاشارة :
هذا _هذه_هذان_هاتان_هؤلاء
. نشرحهم بالتدريج :أولا :هذا وهذه , ونشير له بالاشارة للشئ (هذا أبي أم هذه أبي )؟ ونجعله يُجيب .
(هذا أمي أم هذه أمي ) ونجعله يُجيب ونأتي بأمثلة كثيرة على هذا المنوال .
وبعدها بعد أيام نشرح هذان وهاتان .ونوضح له معني المثنى .(اثنان)أخره (ان ).
وبعدها نشرح (هذه _هؤلاء ) هذه لجمع غير العاقل وهؤلاء للعاقل وهذا بالأمثلة .

أسماء الإشارة خمسة »» (هذا / هذه / هذان / هاتان / هؤلاء )
تُستخدم أسماء الإشارة لما نشير إلى الأشياء .. و الحاجة اللى بنشاور عليها أسمها مُشار إليه ..

-- هذا »» تأتى مع المفرد المذكر مثل :. هذا ولد / هذا كتاب

-- هذه »» تأتى مع المفرد المؤنث مثل :. هذه بنت / هذه مدرسة

-- هذان »» تأتى مع المثنى المذكر ( إثنان من المذكر ) مثل :. هذان تلميذان / هذان طبيبان

-- هاتان »» تأتى مع المثنى المؤنت ( إثنتين من المؤنت ) مثل :. هاتان طبيبتان / هاتان تلميذتان

-- هؤلاء »» و تأتى مع الجمع ( أكثر من اثنين ) ** بس شرط يكون الجمع عاقل ** مثل :. هؤلاء تلاميذ / هؤلاء جنود

لكن لو كان الجمع ده غير عاقل ففى الحالة دى هستخدم ( هذه ). مثل :. 

-- هذه قطط
-- هذه كتب
-- هذه أقلام

وبكده ( هذه ) لها استخدامين ..

١- المفرد المؤنث  ٢- الجمع الغير عاقل 

الدرس الثامن (الضمائر)

الضمائر ياحبايبي في اللغة العربية بتنقسم الي تلاتة :
١ضمائر المتكلم
٢ضمائر المخاطب
٣ضمائر الغائب

ناخد حاجة حاجة ونشرحها
أولا ضمائر المتكلم

من جمال اللغة العربية حبايبي انها عملت ضمائر اسمها المتكلم، وقالتلنا لو عاوز تتكلم عن نفسك او تتكلمي عن نفسك انت

لو عايز تتكلم عن نفسك بتقول ايه
(أنا) وخليته يستخدم للمفرد المذكر والمؤنث كمان

وقالتلنا بقي كمان لو اتنين بقي عاوزين يتكلموا عن نفسهم سواء كانوا مذكر أو مؤنث 

أو جماعه بقي عاوزين يتكلموا عن نفسهم سواء مذكر أو مؤنث

قالتلنا عملتلكوا ضمير وسميته (نحن)

يبقي نفهم من كده بقي: 
ان ضمائر المتكلم هي:
انا للمفرد المذكر والمؤنث
مثل انا طالب مجتهد
انا طالبة مجتهدة

نحن. للمثني المذكر والمؤنث ،، وبرضه للجمع المذكر والمؤنث

مثل نحن طالبان مجتهدان
نحن طالبتان مجتهدتان
نحن طلاب مجتهدون
نحن طالبات مجتهدات

ثانيا
ضمائر المخاطب

وضمائر المتكلم ياحبايبي سهله جدا ومعناها ان لو عاوز اخاطب او اتكلم مع واحد قدامي وأوجهله كلام
اللغة العربيه خلتنا نعمل لده خمس أدوات سهلييين اوي

الأولي. أنت والضمير ده بنستخدمه بقي للمفرد المذكر المخاطب
مثل أنت طالب مجتهد 

أنتِ للمفرد المؤنث المخاطب واوع تحط ياء تحت التاء فاهم حبيبي(((ركز هنا ياض لنفخك ((

مثل. أنتِ تلميذة مجتهدة

أنتما دي بتستخدم بقي للمثني المذكر ياحبايبي والمؤنث كمان )
مثل. أنتما طالبان مجتهدان
أنتما طالبتان مجتهدتان

أنتم. دي بتستخدم بقي حبايبي للجمع المذكر المخاطب

مثل. أنتم طلاب مجتهدون

أنتنّ دي بقي بتستخدم حبايبي للجمع المؤنث، ، وأنا مسميها أنتن الدلوعة عشان بنستخدمها للبنات الدلوعه

مثل. أنتنّ طالبات مجتهدات

ثالثا ضمائر الغائب

حبايبي ضمائر الغائب دي ياحبايبي بنستخدمها لما نكون عاوزين نتكلم ع حد بس مش واقف قصادنا ولا موجود أصلا

فطبعا حبيبتنا اللغة العربية عملتلنا ضمائر نستخدمها للغرض ده برضه  تعالوا ناخدهم بقي :

هو. للمفرد المذكر الغائب. ) غائب يعني مش موجود
مثل. هو طالب مجتهد 

هي للمفرد المؤنث الغائب
مثل. هي طالبة مجتهدة

هما بقي ياحبايبي بنسخدمها للمثني المذكر والمؤنث كمان شاااطرين

مثل. هما طالبان مجتهدان
هما طالبتان مجتهدتان

هم. بنستخدمها ياحبيبايبي للجمع المذكر

مثل هم طلاب مجتهدون

هنّ : بنستخدمها بقي للجمع المؤنث وانا مسميها برضه (هنّ الدلوعة)عشان بتاعت البنات المدلعه 

مثل. هنّ طالبات مجتهدات

الدرس التاسع التنوين
اغنية التنوين

انا التنوين انا التنوين
انا التنوين ياحلوين صوتي رنين صوتي رنين
والاطفال كلها عارفين
فتحتين تنوين بالفتح
كسرتين تنوين بالكسر
ضمتين تنوين بالضم

دى قصة بسيطة لعائلة التنوين نساعد بيها أطفالنا على فهم قواعد التنوين.

تنوين الفتح عجوزٌ يحتاج إلى عصاً دائماً ليتوكأ عليه إلا إذا وجد كرسياً فيستريح عليه والكرسي هو (ة ، اء ، ى ، ا )

تنوين الضم الشاب القوي الذي لا يحتاج إلى عصا.

تنوين الكسر طفل صغير كثير اللهو يحبو تحت الأشياء.

التنوين بيجي ف اخر الكلام فقط وف التنوين بالفتح فقط بيجي ورا الحرف مد الف

تعريف التنوين :نون ساكنة زائدة تلحق باخر الاسم النكرة غير المعرف بالف ولام ولا تأتي بالفعل

تنوين الفتح هو رسم فتحتين فوق الحرف الاخير من الكلمة
تضاف الف زائدة في اخر الكلمة عند التنوين بالفتح مثل :قلم _ قلمًا حيث يرسم التنوين ع حرف الميم وليس ع الالف

_هناك مواضع لايمكن فيها اضافة الالف الى اخر الكلمة كما في الحالات التالية:
1_ عندما تنتهي الكلمة بتاء مربوطة مثل : شجرةً
2_عندما تنتهي الكلمة بهمزة قبلها (الف مد ) مثل :سماءً
3_ عندما تنتهي الكلمة بهمزة مرسومة ع الف مثل : ملجأً
4 _ عندما تنتهي الكلمة بألف لينة مثل :هدئ

تذكرة لاتجتمع ( ال) التعريف مع التنوين وتحذف من الكلمة عند التنوين

يضاف إلى ذلك أنه عند اضافة ألف قد تكون مفصولة أو موصولة بما قبلها حسب إن كان يقبل الاتصال بما بعده أم لا

قمر.... قمراً

عمل.... عملاً

وهذا ما ينطبق كذلك إن كان الاسم مهموز الأخر...
دفء.....دفئاً

جزء... جزءاً

نسأل الطفل ازاي اعرف افرق بين النون والتنوين

وبعدين نعطية بعض الامثلة التي تحتوي علي نون
( ايمان - تين - حسن .... )
اذا حذفنا النون هل الكلمة هتكمل
اكيد لا

اذن يبقي النون دي اصلية

واعطية امثلة للتنوين
( بيتَ - شجرةً ......... )
اذا حذفنا النون ستصبح ( بيت )
الكلمة صحيحة......اذا هي تنوين
أ/ نجلاء عبد الجواد شبل
واخيرا تحميل التدريبات مجمع مجموعة تدريبات عامة في هيئة ملف pdf من هناا

الرجوع الى أعلى الصفحة اذهب الى الأسفل

مُشاطرة هذه المقالة على: diggdeliciousredditstumbleuponslashdotyahoogooglelive

لا يوجد حالياً أي تعليق

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى