ارجوكم كفوا أيديكم عن المدرسين

استعرض الموضوع السابق استعرض الموضوع التالي اذهب الى الأسفل

26092018

مُساهمة 

. ارجوكم كفوا أيديكم عن المدرسين




لأول مرة حبة اتكلم عن مجال عملى كمدرسة مرحلة ابتدائية ...
ارجوووووكم
كفوا أيديكم عن المدرسين وبالأخص مدرسين المرحلة الابتدائية اللى انا واحدة منهم .. احنا زي اى حد فيكم احنا أولياء أمور و مدرسين .. أبناءنا فى المدارس زيكم بالظبط و بنعانى زيكم بالظبط و عندنا نفس المشاكل اللى بتعانوا منها... المنظومة كلهااااااا فاشلة .. يعنى ايه المدرس يدخل فصل فيه ٥٠ طالب لو كل واحد اخد دقيقة من وقته الحصة خلصت ....
و تقولوا المدرس مش بيشرح
يعنى ايه يبقى نصاب المعلم ٢٤ حصة والمعلم خبير يعنى اكبر رأس ف المدرسة ١٨ حصة و هو عنده فوق ال ٥٥ سنة اى صحة تتحمل هذا الجهد ..
بالإضافة حضرتك للأنشطة و الاحتياطى و جدول الأمن و الإشراف.. و الله لو ينفع كنت نشرت لكم جدول مدرسين المدرسة عشان تشفقوا عليهم .. اليوم الواحد شغالين حوالى ٦ حصص من ٨ .. يعنى يدوب الحصتين اللى فاضى فيهم يحضر دروسه لتانى يوم ....
تعالى بقى لتنظيم الجدول نفسه ف مدرسة فيها ٣ مبانى منهم مبنى ٥ ادوار .. تخيل بقى يبقى المدرس عنده حصة ف الدور التالت مبنى وسط ووراها حصة ف الدور الخامس مبنى جديد ووراها ينزل حصة للدور التالت مبنى قديم ... يعنى كعب داير.. و يقف طابورين صباحى و فسحة ..مع العلم مفيش تعيينات جديدة المدرسين بمعنى أن اصغر مدرس سنا ف المدرسة دخل ع الأربعين سنة .. يعنى مفيش حتى شباب يتحمل كل الجهد دة ... اى عمر و اى صحة تتحمل المجهود دة مع كثافة فصول عالية و بيئة مناخية صعبة جدااا حتى مفيش مروحة ف فصل يحتوى على ٥٠ طالب مع كتمة النفس وريحة العرق ...
و قلة عدد مدرسين و ضغط فى المناهج و تقليل الخطة الزمنية ..
مع ضغط مستمر من أولياء الأمور و إحساسهم اننا دايما مقصرين و دايما بيهاجمونا و منهم طبعا اللى بيتطاول على المدرسين ...و منهم اللى بيقولوا كفاية انهم بيدوا دروس ... طيب تعالوا بقى لنقطة الدروس .... اللى الناس هتسيب الموضوع كله و تمسك فيها...
مين اللى بيجبر طالب على درس مع الوعى الزائد لأولياء الأمور و معرفتهم بحقوقهم ...
أولياء الأمور نفسهم بيجروا ورا المدرسين عشان يسجلوا اسماء عيالهم ... تفتكر المدرس لو حسن دخله بالدروس هيكسب كام ؟؟؟
تعالوا نحسبها ...
٥٠ جنيه للمادة ف مجموعة ١٠ عيال ب ٥٠٠ جنيه ف اربع مجموعات على الأكثر ب ٢٠٠٠ جنيه ... انا طبعا بتكلم عن محافظة السويس .. اللى هى أغلى المحافظات ف كل حاجة ألا الدروس و طبعا برضو كلامى عن المرحلة الابتدائية
انت عارف حضرتك مرتبه كام ؟؟؟
معلم خبير ٢٤٠٠ جنيه .. فاتح بيت و عنده ولاد كبار زيه زيك ف مراحل تعليم مختلفة ومنهم وصلوا للجامعة ..دة أعلى راتب للمعلم ... لا هو سرق و لا نصب .. دة اشتغل ف مجاله و أفاد بعلمه ..
طب ما الدكتور بيشتغل الصبح ف مستشفى و بالليل فاتح عيادة الكشف الواحد وصل ٣٠٠ جنيه يعنى بيعمل ف اليوم الواحد مش اقل من ٥٠٠٠ جنيه .. طب ماتتشطروا ع الدكاترة و تقفلوا العيادات زى مابتقفلوا السناتر ... المحامى بيشتغل الصبح ف المحكمة و بالليل ف مكتب و يلسعك ف قضية واحدة ب ال ٥٠٠٠ جنيه .. طب ماتتشطروا ع المحامين .. و لا بس انتوا بتتشطروا ع اللى منكم ع اللى مالوش ضهر .. لان فعلا احنا مدرسين مالناش ضهر ... انا عارفة ان كل وظيفة و ليها متاعبهاو مشاكلها .. بس صدقونى احنا اكتر لانها مشكلة كل بيت ... مفيش بيت مافيهوش عيال ف مدارس ف مراحل مختلفة..
ارجوكم ارحمونا بقى احنا بنتعامل كل يوم مع أولياء أمور على كل شكل و لون ... عندنا المحترم و البلطجى.. عندنا المتعلم و الجاهل عندنا الارزقى و البيه عندنا الباشا و عامل النضافة عندنا ستات البيوت على كل شكل و لون .. المحترمة و الشمال ..المثقفة و الجاهلة العايقة و المدهولة..المتسطلة و الغلبانة ..الهانم و الشغالة .. الليدى و الجربوعة... كله جى يتحكم فينا لمجرد ان ابنهم عندنا ف المدرسة .. راجعوا نفسكم هتعرفوا انها منظومة مالناش ذنب فيها .. مالناش ذنب ف كثافة سكنية و قلة عدد مدارس و قلة ميزانية و قلة عدد مدرسين مفيش تعيينات يعنى المدرس اللى بيطلع معاش مابيجيش مكانه و يتوزع حصصه..المدرس اللى بيموت مابيجيش مكانه و يتوزع حصصه .. المدرس اللى ياخد اجازة تعاقد او إعارة مابيجيش مكانه و يتوزع جدول .. النصاب بقى اوووفر و الناس مش متفهمة .. احنا ف مطحنة مش مدرسة .. ياريت صوتى يوصل للجميع و تحياتى لكم
عبير شاكر

الرجوع الى أعلى الصفحة اذهب الى الأسفل

مُشاطرة هذه المقالة على: diggdeliciousredditstumbleuponslashdotyahoogooglelive

لا يوجد حالياً أي تعليق

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى