السلام عليكم ورحمه الله وبركاته

اصدقائي طلاب المرحله الثانويه
طلاب الصف الثالث الثانوي
ها قد بدأت رحلتكم مع مشوار الثانويه
مشوار سيحدد مستقبلك .. مشوار تختتم به مرحلتك الثانويه لتبدأ ف المرحله الجامعيه

نتكلم شويه بقي عاميه أفضل 

اعرفكم بنفسي سريعا ..

زميلتكم رحمه .. دفعه 2018 .. أدبي
الحمدلله ربنا كرمني بمجموع 401.5 يعني 98% تقريبا ^^
أولي مدرسه حمزه بن عبد المطلب الثانويه
ثانيه ع  مستوي الاداره - بولاق التعليميه

أطمنكم السنه سهله وجميله بإذن الله ..
سهله ؟ ازاي سهله اه بتقولي كدا عشان خلصتيها -_-
اممم اقولكم صعبه ورخمه وطويله واعقدكم ؟ واديكم طاقه سلبيه ؟ هتنبسطوا يعني ؟ لأ السنه جميله بس انت ابدئها صح ..
طيب ماشي ..

هكلمكم عن :

* طريقه مذاكره الملزمه او الدرس اللي تاخدوا وازاي تظبته وتصمه زي اسمك ..
* هقولكم ع طريقه تراجع فيها المنهج بتاعك كل اسبوع وتظبته ظبطه صح ..
*الناس المدمنه نت وفيس وواتس وانستا والهري ده اللي بيودي ف داهيه هظبتكم بردك ..
* المشاكل اللي هتواجهكم (النعس + الكسل + الملل) ..
* طريقه هسهل عليكم ازاي لو الملزمه تقيله او الدرس رخم تظبته وتخليه سهل ..

انا هتكلم ع طبيعه المواد كأدبي لأنه ده كان تخصصي ..
بس شبابنا العلمي متخرجوش من الموضوع هتستفادوا جدا وتقدروا تطبقوا ده ع موادكم طبعا ..

عندنا طبعا المواد المشتركه : لغه عربيه + انجلش + لغه تانيه
+ ( الوطنيه + تربيه دينيه + اقتصاد واحصاء-اللي هما مش بيتذاكروا غير قبل الامتحان اصلا XD  - )

تخصصنا بقي كأدبي : فلسفه ومنطق + علم نفس وأجتماع + تاريخ + جغرافيا

والله عارفين المواد ممكن تخشي ف المهم بقي عشان الموضوع طول أوي -_-
حاضر عنيا ..

هبدأ معلش اتكلم عن الكتاب المدرسي (كتب الوزاره اللي مكنتوش بتستخدموها 1 او 2 ث)
ف 3ث من اهم الكتب اللي لازم وحتما تكون معاك هي كتب الوزاره (كتب المدرسه) ليها لزمه وفايده كبيره اوي .. ايوه يعني كتب مهمه جدا اهم من الملازم والكتب الخارجيه كمان .. لازم تهتم بيها

*
تلميح بسيط :

1- لازم بعد لما تاخد اي درس وتروح قبل م تذاكره من الملزمه او الكتاب الخارجي او غيره لازم تفتح كتاب المدرسه وتتأكد ان اللي ف الملزمه او الكتاب الخارجي نفس اللي مكتوب ف كتاب الوزاره
2- لو لقيت اي جزئيه ف كتاب المدرسه مش موجوده ف ملزمتك اللي مدرسك مديهالك او ف الكتاب الخارجي تنقلها وتحفظها وتحمد ربنا عشن ف ناس بتضيع بسبب الحكايه دي
3- في مدرسين بيلخصوا كتاب المدرسه وبيسيبوا جزئيات انتم مهمتكم تراجعوا من كتاب المدرسه وتحفظوها وده اللي بيميز طالب عن طالب
4- دفعه 2018 ف العربي جه سوال ف النثر كان موجود ف كتاب المدرسه ف الاخر ومكنش موجود ف الكتاب الخارجي (الأضواء وغيره) ومدرسين كتير مهتموش بيه اصلا الجزئيه دي فطبعا ناس كتير شالت السوال ..
5- الأنجلش دفعه 2018 جه اسئله كتير من كتاب المدرسه  نفس الصيغه او القاعده بس الاسماء المعني متغير
وكذلك ف باقي المواد ف أكيد كتاب المدرسه مهم جدا ..
6- مسائل الفيزيا والكميا بشهاده اصدقائي طلاب العلمي جت معظمها ان لم يكن كلها من كتاب المدرسه
شفتم هو مهم أزاي .. متستهونوش بيه من فضلكم

* الدراسه لسه مبدأتش ي أستاذه هنجيب الكتاب منين ؟
سوال جميل .. الكتب نازله ع النت pdf تقدر تحملها وتشتخدم فونك حاليا لغايه لما تجبهم من المدرسه وأسال مدرسك ايه الدروس اللي اتغيرت لأن الكتب اللي ع النت مش الجديده لأن الجديده لسه منزلتش ..

- (إزاي اذاكر الملزمه او الدرس اللي انا اخدته؟) شويه نقاط المفروض نمشي عليها :
1- تركز ف الشرح تركز ف الشرح تركز ف الشرح .. حلو كده ؟ تحاول تسمع من استاذك وتفهم ع قد م تقدر جميل ..
2- الحصه خلصت والمستر اداكم ملزمه حلوه كده 7 او 8 صفح ياريت مش لازم تقف مع اصحابك نص ساعه تروح علطول انت أولي بالنص ساعه دي تنام فيها -_- تروح ع بيتكم ..
3- مش هقول بقي اول لما تروح تمسك الملزمه تفرمها .. حضرتك مش الرجل الاخضر يعني .. هتروح تستريح خمسه تقوم تصلي اللي فاتك .. تتغدي كده .. ريحت ساعه حلو نقوم بقي للشغل
4- تعملك كوبايه شاي (نسكافيه اي زفت يتشرب مش هنختلف ..) تخش اول حاجه بقي تجيب كتاب المدرسه اه تجيبه تفتح الدرس من كتاب المدرسه تفتح ملزمتك تتأكد ان كل اللي مكتوب ف كتاب المدرسه هو هو اللي ف الملزمه بمعني لو لقيت المستر كاتب تعريف مثلا وفي جمله او كلميتن المستر مش كاتبهم وهما ف كتاب المدرسه لأ حضرتك هتتعب وتنقلهم ف ملزمتك وتحفظهم(زي م اتكلمنا فوق عن اهميه كتاب المدرسه لو عديت الجزئيه دي معلش هنتعب سيادتك تقرئها تاني -_- )
5- ظبطت حالك وكلو تمام .. نجيب ورقه وقلم تسميع البوق ده منغير كتابه ملوش لزمه .. تبدأ تحفظ جزئيه جزئيه تكررها ببوئك مرتين تلاته لما تلاقي نفسك بتقولها ببوئك صح منغير م تبص او تغلط اكتبها ف ورقه فاضيه كده مريتن و انتقل للجزئيه اللي بعدها .. وهكذا لغايه لما تخلص الملزمه
6- الملزمه خلصت ف 4 ساعات حلو جدا رضا من عند ربنا الحاجه ف أولها بتاخد وقت فعادي جدا خد وقتك وادي الملزمه حقها .. خلصت حفظ ننتقل للمرحله التانيه انك هتسمع الملزمه من اولها ل اخرها ببوئك كدا شفوي والجزئيه اللي تقع منك احفظها تاني ورقه وقلم ..
7- ربنا كرمك وخلصت الملزمه وسمعتها شفوي ولميت الاجزاء اللي وقعت منك تخش ع الواجب بقي .. الواجب ي شباب يتحل ف نفس اليوم وبعد م تذاكر وتسمع الملزمه عشان تأكد حفظك ..
8- الواجب لقيت اسئله مش فاكر الاجابه كامله ارجع وبص عليها تاني واحفظها وبعدين  حل السوال كامل بقي .. الواجب اخد منك ساعتين .. يالهوي !! لأ مش يالهوي ولا حاجه حلو جدا كدا انت بعون الله ظبطت الملزمه
9- خلصت الملزمه حفظ وتسميع + خلصت الواجب .. تقوم تحرك جسمك شويه أكيد نملت من القعده و ضهرك قفش يعني XD معاك ي عم ربع ساعه قوم اتمشي ف الشقه اعمل ساندويتش خفيف لو جوعت ولا حاجه ..

بص أحنا كأدبي فيه نسبه فهم ونسبه حفظ أكيد بس أحب أقولك الحفظ نسبته اعلي واعلي يعني 20%فهم 80% حفظ واللي يقولك غير كدا يبقي مبيفهمش معلش  .. معظمكم بدأ من نص شهر 8 ومعظمكم مأخدش كل الدروس يعني في ناس بدأت مثلا فلسلفه وتاريخ ف نص 8 والباقي بعد العيد وكدا

تاني نقطه :
إزاي اراجع المنهج كلو كل اسبوع !!انا مش الرجل الأخضر يعني ؟
لأ مش الرجل الأخضر انت احسن منو XD

انا (وأعوذبالله من كلمه انا بس سامحوني انا بتكلم عن تجربتي ) كنت الحمد لله براجع المنهج كلو كامل كل اسبوع
ف الأول كانت سهله ..
هو ايه اللي سهله قولي كنتي بتعمليها ازاي الاول !!
حاضر نهدي شويه بس XD

ف اول لما بدأت دروس طبعا مبدأتش كل المواد كنت بدأت شويه ف نص 8 والباقي بعد العيد
كنت اخد الملزمه احفظها واظبتها واحل الواجب وبعدين اصبح تاني يوم اسمعها افوت يومين واسمعها تاني وقبل الدرس اسمعها مره كده انت سمعت الملزمه المعينه دي 4 مرات كده المفروض لزقت ف دماغ حضرتك ..
بعد 4 اسابيع بقي عندي من كل ماده 4 ملازم تمام ؟
كنت مفضيه يومين عندي اجازه مفيهمش دروس خالص
كانوا جمعه وسبت كنت باجي يوم الجمعه اسمع ملزمتين قدام من كل ماده والسبت اسمع الملزمتين التانين (وطبعا دي ملازم قديمه وبكده اكون سمعت المنهج لغايه م اخدت مع المستر بتاعي فكان علطول المنهج ف دماغي )
عدت اسابيه والملازم بتزيد طبعا وبقيت اكثف بدل م اخد يوم الجمعه ملزمتين قدام لأ اخد 4 قدام ف الجمعه و4 الباقيين ف السبت (طبعا مستغرب حضرتك لأ متستغربش احنا شرحنا اننا بنذاكر الملزمه ف يومها وبنسمعها 4 مرات فلما تيجي تراجع المنهج سبت وجمعه هتلاقي نفسك مش بتاخد وقت ومع التكرار هتحفظم صم)
عدت اسابيع واسابيع تاني وال4 ملازم بقو8 ثم 12 ثم 16 ثم 20 !! اه 20 ملزمه
ها دول بردك كانوا ف يومين بيتراجعوا ؟
لأ طبعا ي أذكي اخواتك -_- هتخليهم 4أييام
يمعني زي م قولت هتحاول تخلي عندك يومين فاضيين وليكن الجمعه والسبت
انتي بقي هتزود عندك يومين كمان دول هيكونوا بتاخد دروس فيهم عادي
وليكن الاربع والخميس والجمعه والسبت
هتسمع ف كل يوم منهم 4 ملازم من كل ماده تمام .. وزي م قولت دي عن تجربه مش هتكون صعبه هيجي عليك ملازم هتخلص تسمعيها ف 5 دقايق ايوه 8 صفحه هتخلص تسميعهم ف 5 دقايق من كتر م انت بتكررهم كل أسبوع ..
كده هتكون راجعت المنهج كتير أوي أوي يعني لدرجه انك ممكن تسمع الملزمه منغير م تبص ع راس السوال او الحته اللي انت هتسمعها ..

* تلميح بسيط قبل م نكمل :

* الثانويه مصاريفها كتير ايوه كتير ده غير مصاريف سيادتك الشخصيه فلو حضرتك داخل تدلع وتحضر دروس وكأنك مبتحضرش ف حرام اتقي الله ف اهلك لو داخل عشان تعدي لأ ي حبيب ماماي خليك ف بيت اهلك وذاكر ف بيتك وبلاش فلوس دروس احسن
فرحه نجاح الثانوي دي متتوصفش .. حاجه خيال والمصحف فرحه غير كل فرحه .. ابوك ولا امك ولا اهلك لما يشوفك عديت 95 او 90 بيكونوا طايرين بيك والفرحه جواهم متتوصفش متحرمهمش من فرحه زي دي بالله عليك.. اتعب هتلاقي وربنا هيكرمك والله ..ذاكر بضمير والامتحان سهل صعب هتلاقي نفسك بتحله حلو اوي ..

* ألتزم ف الصلاه .. التزم ف الصلاااااااه .. خلي علاقتك بربك حلوه ادعي كتيرمش عيب انك تلجأ لربنا حتي لو كنت مش منتظم انتظم السنه دي يمكن ربنا يكرمك وتنتظم بقيه حياتك انا كان في عليا ايام كانت الدروس بتبقي صعبه كنت ادعي لربنا وعمره م خيب ظني كنت بلاقي نفسي بحفظ والملزمه بقت سهله ..

1- متغيرش المدرسين كتير ف اول السنه جرب مع واحد حصتين مفهمتش وانا أشك ف الموضوع ده غيره وبس متغيرش تاني لو سمحت اتكل ع الله وربنا هيكرمك ..
2- مدرسك بيكون زي الفل وشرحه جميل وبتفهم منو يجي واحد زميلك عاق يقولك لأ ي عم ده وحش شوف انا باخد مع المدرس الفلاني استاذ ويروح رزعك كام سؤال المدرس بتاعه مألفهم عشان يحبطك ويخليك تاخد مع المدرس بتاعه وف الاخر بتسمع كلامه وانتم الاتنين بتتسوحوا وترجعوا زي البط للمدرس الأولاني -_-
3- الملزمه تتذاكر ف يومها ..  الملزمه تتذاكر ف يومها  ..  الملزمه تتذاكر ف يومها  .. الملزمه تتذاكر ف يومها  .. كفايه ولا أقولها تاني ؟
4- البنات الحلوين اصحابي وصديقاتي الأفاضل مش لازم كل حصه طقم كل حصه يكون وشك سوبر لوكس يعني كل ولاد الدروس معفنين مفيهمش حد عدل ف ريحي دماغك وانتي مش نانسي يعني -_-
5- البنات تاني بعد الدرس فضلا وليس امرا مش لازم ساعتين بترغي مع صحبتك خلصي وع البيت علطول  ..
6- الولاد والبنات اقولكم اقطعوا علاقتكم بصاحبكم اه معلش .. طبعا ف ناس كويسه بس صدقني هيبقي فيه غل وحقد وواحد يكون فارم الكتاب يقولك والله بقالي اسبوع مبمسكش كتاب وبنت تقولك ي بنتي كبري دماغك تعالي نروح نتمشي ونبقي نصور الملزمه دي تخلعي اللي ف رجلك وترزعيها بيه
7- مش لازم لو جزئيه صعبه مع حضرتك تتصل بصاحبك تقوله الحته دي وحشه صعبه مبتتحفظش بلاش الطاقه السلبيه احتفظ بيها لنفسك فلتقل خيرا او لتصمت .. تبا لك ..
8- ي سلام بقي لو اتصاحبت ع واحد شاطر يحمسك ع المذاكره ويكون بينكم تنافس .. تنافس شريف بدون غل وحققققققققد والنبي ..
9- داري ع شمعتك تقيد ..

النقطه التالته الناس المدمنه نت

حبايب قلبي الحلوين مضطرين انكم تضحوا شويه معلش
اه معلش ي جميل مش هتعرف تكلم الأكس .. ارحم نفسك شويه كفايه مرقعه 1 و 2 ث .. السنه دي محتاجه تركيز ومجهود والنت بيضيع كل ده

انا بصراحه مش من مدمني النت فمكنش فارق معايا وكان عندي وايفاي كمان والله مكنتش بفتح (ممكن بليل افتح اسأل صحبتي هنتقابل الساعه كام درس بكره وشكرا بقفل)

موبيلك الغالي تقفله تاخد خطك تحطه ف موبايل يدوبك بتصل بس .. ايون يتصل بس ..
اولا النت ليه اضرار جامده هتلاقي نفسك مثا فتحت فيس ودخلت ع جروب من الجروبات التعليميه هتلاقي امه لا اله الا الله بتقولك مش عارفين نذاكر الملزمه صعبه المنهج غبي وبيفضلو طاقه سلبيه لحد م يقفلوك من المواد والسنه ..

- الكسل الكسل الكسل -_-

بكون زي الفل ف الدرس برجع البيت نعسان
اول لما افتح الملزمه مش طايق ابوها
اول لما ابتدي اذاكر احس اني نعسان وجسمي مكسر

اقولك انا بقي كلام سليم .. حاول تظبط نفسك انك تنام ف اليوم كلو 7 او 8 ساعات بس حلو .. نمت زياده عن كدا هتحس انك نعسان باقي اليوم .. نفترض كان عندك درس الساعه 8 راجع تعبان ونعسان خالص خلاص عادي ي عم خش اتخمد ساعه وقوم عادي جدا
لما تقوم اعلمك كوبايه شاي واستعين بالله وأبدأ .. سااعه نوم بس دي قليله لأ مش قليله انت كده اشبعت رغبه النوم اللي عندك حتي لو نمت ربع ساعه هتصحي مكسل شويه لكن بعد 5 دقايق هتلاقي نفسك فوقت وبقيت زي الفل عن تجربه والله ..

- الملل الملل الملل

ف أول السنه بيبقي في طاقه فظيعه تحس انك متحمس بقي وهاكل المنهج ومين اوائل جمهوريه ناوو والجو ده
ودي حاجه حلوه استغلها واستغل الحماس واظبط اول المنهج صح
هتيجي ف النص كدا عندك ملل زهقان شويه .. هتحاول بقي ف الحاله دي انك تحمس نفسك ايوه تحمس نفسك يعني قول هذاكر الملزمه دي واخد نص ساعه راحه اعمل فيها اي حاجه .. هخلص الملزمه دي واقوم اسلي نفسي نصايه كدا وارجع اكمل  .. كنت بعمل حجه هبله كدا بس بتخليني متحمسه ع المذاكره اوي .. كنت اجيب ورقه وعندي علبه الوان بقالها قرن  ف الدرج كنت قبل م انام اكتب الحاجات اللي المفروض اذاكرها تاني يوم كل ماده بلون مختلف ولما اخلص منهم حاجه اعمل  جمبها علامه صح الحركه دي كانت بتخليني متحمسه اكمل الجدول اللي عملته وكنت احيانا مبقدرش اكمله كلو كنت احس بالذنب واقول بكره هخلص الجدول واعمل واحد جديد لمواد بكره وهكذا بقي ..

اخر نقطه هتكلم عنها ف الموضوع ده :
هتيجي عليك شويه ملازم حقيره ! ايوه حقييييره مش عارف تحفظها كل م تحفظ جزئيه تنسي التانيه .. هيسيطر عليك شعور انا فاشل انا غبي انا هسقط .. فكك من كل دا
مثال : اخدت ملزمه تاريخ 8 صفح طويله ورخمه بصراحه كل اما تحفظ حته حته تانيه تبوظ اتخنقت وزهقت .. هتروح ي عم الناس تقسم الملزمه يعني الملزمه 8 صفحه هاخد نصها النهارده والباقي بكره يعني اخد 4 انهارده اظبتهم وبكره اسمعهم واخد الباقي


سامحوني طولت عليكم اسفه جدا جدا جدا بس حبيت نستفيد كلنا والله
وخليك واثق انك ع قد م هتذاكر ع قد م هتجيب انا اتظلمت ف درجه العربي بس ف نفس الوقت جبت مجموع عالي ودخلت اعلي كليه ف ادبي كمان فمتقلقش ربنا مش هيضيع تعبك وحاجه بتعوض حاجه ذاكر واتعب وطلع افضل م عندك عشان ف الاخر تلاقي افضل حاجه ربنا يكرمكم ي رب ويسهل عليكم موادكم وييسر حالكم ي رب

لو الموضوع عجبكم مع اني اشك ان في حد يقرأ الكم الكبير ده قولولي اكمل
لو كملت هتكلم المره الجايه عن :
1- المواد الأدبيه وكل ماده بتتذاكر ازاي وازاي تقدر تقفل كل ماده
2- العربي ازاي تذاكره ازاي تسيطر ع الادب وتقدر تحفظ النصوص وتسيطر ع النحو والبلاغه
3- هنتكلم عن الانجلش والمذاكره الصحيحه ليه
4- هقولكم المواد اللي زي الدين والوطنيه والاحصاوالاقتصاد هقولكم تعملوا فيها ايه
(لو عندكم حاجه عايزيني اني اتكلم عنها قولوا ف التعليقات)

بالتوفيق ..


الأكونت الخاص بي ف الفيس لو حد عنده اي استفسار :
Rahma Khaled