----------(علاج ضعف القراءة و الكتابة )------------

حبايبنا الصغار و الامهات التعبانين مع ولادهم النهاردة هنتكلم عن أول درس قراءة .
بس قبل ما نشرح حاجة من الدرس في شوية حاجات لازم نتعلمها و نعملها في كل درس جاي بعد كدة .
1- درس القراءة يتجزأ علي فقرات و الطفل ميخدش كل الدرس علي مرة .

2- الطفل ضعيف القراءة و الكتابة .حضرتك لازم تقرأي له بصوت عالي و ببطء بطريقة الاصوات.. و حاولي تظهري المدود و باقي الظواهر و راعي ضبط أواخر الكلمات .

3- الطفل اللي ضعيف بالكتابة ياخد سطرين بس من الدرس يقرأهم و يقرأ امامك بصوت عالي . يكتبهم مرتين او اكتر .

4- لازم يتملي السطرين و بعدين اعطيه الكتاب وقولي له راجع كلماتك من الكتاب والكلمة الغلط شد انت تحتها خط .

5- يتملي تاني نفس السطرين والمرة دي هيراعي انه ميغلطش نفس الغلطات . اوعي تنسي المكافأة

6- امشي علي نظام السطرين و أوعي تقولي هتأخر في المنهج . حتي ولو فضلتي في الدرس شهر عادي . احنا بنتعلم اللي يريحني باقي السنة .

7- وانت بتقرأي وتملي قولي له المعاني و العكس والجمع و المفرد في وسط الكلام . هيفتكر وقت اللزوم.

8- شايفة انه بقي بيقرأ السطور و يكتبها كويس او نص نص دي نتيجة ممتازة .

9- ابدأي معاه في الظواهر اللغوية و استراتيجيات القرائية و خلي بالك طويل جدااااااااا لانه هيتلخبط . بس عادي لانك هترتاحي بعدين .

10- ادخلي عليه بالتدريبات وهو سخن وطازة و فاهم ههههههههه سؤال ساعديه . و سؤال اتركيه يغلط . وسؤال قولي انت اجابته . متنسيش المكافأة .

11- أوعي تضغطي عليه ابدا في وقت هو مش حابب فيه يكتب او يذاكر معاك . بالعكس شجعيه انه يلعب . لان ده هيعطيه ثقة فيك اكتر .

12- بلاش من الضرب خالص او الصراخ في وشه ابدااااا. واياكي ان تصفيه بالفاشل او البليد او الغبي او مقارنته بالاخرين .

13- اذا كان في مدرس بيدرس لابنك في البيت او في مجموعة تأكدي انه بينتهج أسلوب تربوي في التدريس لان في مدرسين لا علاقة لهم بالتعليم.

14- في النهاية لازم تؤمني بان التعليم رزق من الله . يهبه لمن يشاء . فلا نقنط او نجزع من قضاء الله . لان في اطفال مهما هتحاول معاه مش هيوصل للمستوي اللي انت متخيله . يبقي تتقبله علي وضعه وعلي قدر ما تستطيع تحاول تطوره .
+++++++++++++++++++++++++++++
------------( مستر / رضا الحوتي ) ---------------