بناء على تعليمات مديرية التربية والتعليم بالقاهرة تم تعديل موعد انتهاء اليوم الدراسي والانصراف الساعة الثالثة بدلا من الثانية وسيتم تطبيقه من يوم الثلاثاء القادم.

بينما نشرت صفحتى ثورة أمهات مصر ومنهجكم باطل هذه المواعيد، حيث جاءت التعليق كالتالى:
يعني الولاد من الساعة ٧ صباحا ده اللي ساكن بجوار المدرسة بخلاف اللي سكنه بعيد اكيد بيصحى من ٦صباحا وهيخرجو الساعه 3 يعني يا متعلمين يا افاضل عدد لا يقل عن ٨ ساعات متواصلة بينهم بريك ١٠ دقايق على ما ينزلوا الحوش يكون الجرس ضرب وعلي ما يوصلو البيت بقت 4 ولو في مجموعه يرجعو 6 بقي والشتاء ع الابواب ده خلاف لو كان بيأخد درس خارجي هيرجع بيته الساعة ١٠م يعني الطفل هيموت بالبطيء.

فين الوقت اللي باقي في اليوم للمذاكره وعمل كميه الواجيات اللي بياخدوها، وفين الطاقة اللي باقي عند الاولاد علشان يذكر ويحفظ ويركز
والله حرام انتم ليه مصممين بدل ما تحدثوا وتطوروا التعليم تطلعو اجيال مشوهه كارهه كلمة مدرسة وتعليم ومهدود حيلها من صغرها ليه بتعملوا كده في الاطفال انتو بتقتلوا طفولتهم
ارجوا بأسمي واسم جميع اولياء الامور النظر لصغارنا بنظرة فيها رحمة احترموا ادميتهم
يا وزارة التعليم
يا معالي الوزير
يا سادة يا أفاضل القائمين بالتعديل بمديرية التعليم
يا سيادة المتحدث الرسمي لوزارة التعليم.

ارجوا ان تصل استغاثت ٱلاف الامهات وأن يلغى هذا القرار، وإلا سنضطر لعمل وقفة احتجاجية بالوزارة والتصعيد.