الي السيد وزير التربية والتعليم ... نقووووول كمااااان

لو حضرتك مش حاسس بالمصيبة اللي احنا فيها ده مشكلة والكارثة لو انت اساسا مش عارف ...
سيادتك عمال تقول التعليم الممتع ... ممتع مين يا سيدي الفاضل هو سيادتك فاكر اننا
في الجامعة الامريكية .. ده الفصل في المدرسة الابتدائي فيه 80 طفل والحصة 45 دقيقة مطلوب من المدرس يشرح ويفهم وياخد غياب ويحل انشطة ويصحح الكراسات وسيادتك جاي تقولي تعليم ممتع ... من اي ناحية سيادتك بالظبط علشان نفهم ...
طيب الاستاذ اللى لسة متعين من سنين وبياخد 1200ج واكيد هيشتغل شغلانة تانية علشان يقدر يفتح بيت ماهو بشر واحد بيشتغل 16 ساعة علي الاقل بذمتك المتعة الوحيدة ليه هيكون ان بس يرمي دماغه علي المخدة وينام هيروح الفصل يمتع العيال بالتعليم ده اساسا لو قدر يضحك وهو بيقول صباح الخير يباه كتر خيره ....
ولاه الاستاذ اللي شغال بأله 20 سنة ومرتبه 1950ج وعياله كبروا وعنده التزامات اضعاف مرتبه يعمل ايه لاما يدي درس خصوصي ويضطر يهمل في شغله اللي في المدرسة ووقتها يطلع الحرامية الكبار ويقعدوا يغنوا علي التعليم رسالة سامية والمدرسين ماصين دمنا و... و... او ياعيني يروح يشتغل علي توكتوك وييجي عيل من دور عياله انبي ياسطي ودينا وسط البلد وهو استاذ فاضل تربي علي يده اجيال ...
لا والمصيبة كل يوم تقول زيادة رواتب والمدرسين مافيش حد زاد من 2014 ولا مليم وللاسف من 2016 وكل يوم خصومااات علي ايه مانعرفش مرة اجور متغيرة ومرة نقابة ومرة تأمين
بالله عليك بص علي الاستاذ اللي شايل 24 حصة وريادة واحتياطي واشراف وآمن وانشطة وجماعات وتصحيح ومراقبات وكنترول واشي قرائية واشي حسابية واشي تعلم نشط واشي موهوبين ودفاتر من كل لون يا باتستا ..
@@ طب أعطيك تعليم ممتع ازاى ياسيادة الوزير ؟!
تعالى نتكلم بالعقل