كتب/ عصام معروف
والله عمرى ما اديت درس خصوصى
بس هو الأفضل لكرامة المعلم إنه يشتغل دروس خصوصية والا إنه يشتغل فى الفاعل أو سواق توكتوك أو ماسح أحذية فى بعض البلدان الريفية ؟ الأفضل للمعلم إنه يمد إيده آخر الشهر عشان مرتبه مش مكفيه والا إنه يدى درس خصوصى يفيد بيه الناس اللى عاوزة تستفيد فعلا وتحفظ المنهج العقيم بأى طريقة
طب لو الدولة منعت الدروس الخصوصية من المدرسين ياترى هتقدر تمنع العيادات الخارجية للأطباء ؟
بلاش دى ، طب لو منعنا الدروس الخصوصية على الناس الغلابة ، ياترى أولاد البهوات اللى قاعدين فى التكييف هيبطلوا والا ليهم واسطة تمنع عنهم عيون الضبطية القضائية اللى هتلاحق المدرسين بتوعهم ؟
كمان بلاش دى ، ياترى أولاد جميع الوزراء بيدخلوا التعليم الحكومى لأنه ممتاز والا بيودوا أولادهم مدارس دولية ؟
قبل ما نفكر نلغى الدروس الخصوصية ياريت نصلح المنهح القائم على الحفظ والتلقين ، وندى المدرس مرتب يكفيه لأخر الشهر