هام.. لطلاب وأولياء الأمور في شهادة الثانوية العامة:
= دي إجابات بعض الأسئلة اللي وصلتني الأسبوع اللي فات من طلاب وأولياء أمور ومعلمين:
= لا نية لإلغاء الأسئلة المقالية من امتحان أي مادة أساسية.. المواد غير المضافة للمجموع فقط ستكون بدون أسئلة مقالية.
= عدد الأسئلة في كل مادة .. هتلاقيها تحت
= يعني إيه أربع نماذج امتحانات لكل مادة؟.. يعني هيكون فيه نموذج (أ) ونموذج (ب) ونموذج (ج) ونموذج (د).. الأربع نماذج نفس الأسئلة ولكن مع اختلاف ترتيب الأسئلة.. يعني السؤال الأول في نموذج (أ) هتلاقيه مثلا يعني رقم ١٣ في نموذج (ب)، وهكذا.. يعني ترتيب الأسئلة في النموذج بتاعك غير ترتيب الأسئلة مع اللي قدامك غير ترتيب الأسئلة مع اللي قاعد وراك.. متحاولش تغش علشان غالبا هتنقل إجابة غلط.
= النماذج الاسترشادية - حسب كلام ٢ مسئولين كبار - هتكون الثلاثاء على موقع الوزارة وهيكون متاح مع كل نموذج أسئلة.. نموذج الإجابة بتاعه، سواء اختيار من متعدد أو مقالي.
= كتيب المفاهيم بتاع السنة اللي فاتت هو نفس كتيب المفاهيم بتاع السنادي ولو فيه أي ورق مقطوع من السنة اللي فاتت من كتيب مفاهيم هيتم طباعة عدد زيادة يتوزع على اللجان اللي مفيهاش كفاية ولو فيه فعلا معلومات خاطئة هتتعدل ولكن بعد المراجعة.
= مفيش تعديل في جدول امتحانات الثانوية العامة لأي شعبة.
= تصحيح الأسئلة المقالية هيكون (بشري) ولكن من خلال شاشة كمبيوتر.. السؤال الواحد هيتعرض على ٢ مصححين متخصصين في المادة ولو اختلفوا على تقدير الدرجة اللي يستحقها الطالب السؤال هيروح لمصحح تالت يفصل بينهم ويدي الدرجة للطالب.
= أسئلة كل مادة (٣٠٪؜ أسئلة بسيط + ٤٠٪؜ أسئلة متوسطة المستوى + ٣٠٪؜ أسئلة مهارات تفكير) يعني لو مستواك نص نص معاك بإذن الله ٧٠٪؜.
= مفيش سؤال واحد في أسئلة الاختيار من متعدد هيكون له إجابتين متشابهتين.. الإجابة الصح هتبقى واضحة ملهاش شبه لا في المعنى ولا المضمون.
= أكتر من ٨٠٪؜ من أسئلة كل مادة عليها درجة واحدة لكل سؤال (هنشر في الآخر عدد الأسئلة ودرجاتها في كل مادة).
= علشان مطولش عليكم هعمل بوست تاني بمعلومات تانية ردا على باقي الأسئلة اللي وصلتني.
= ودي عدد أسئلة كل مادة ودرجاتها
الفيزياء والكيمياء والأحياء والجيولوجيا
عدد أسئلة الاختيار من متعدد (46 سؤالا)، منها 40 سؤالا بدرجة واحدة و6 أسئلة بدرجتين، وعدد الأسئلة المقالية 4 فقط، وكل سؤال منها عليه درجتان.
التاريخ والجغرافيا وعلم النفس والفلسفة.
عدد أسئلة الاختيار من متعدد (46 سؤالا) منها 40 سؤالا بدرجة واحدة و6 أسئلة بدرجتين، وعدد الأسئلة المقالية 4 فقط، وكل سؤال منها عليه درجتان.
الرياضيات (الجبر والهندسة، والاستاتيكا، والتفاضل والتكامل، والديناميكا)
عدد أسئلة الاختيار من متعدد (18 سؤالا) منها 11 سؤالا بدرجة واحدة و7 أسئلة بدرجتين، وعدد الأسئلة المقالية 2 فقط، منها سؤال بدرجتين وسؤال بـ 3 درجات.
اللغة العربية
عدد أسئلة الاختيار من متعدد 56 سؤالا، منها 44 سؤالا بدرجة واحدة، و12 سؤالا بدرجتين، أما الأسئلة المقالية فعددها 4 أسئلة، منها 3 أسئلة بدرجتين، وسؤال واحد (التعبير) وسيكون عليه 6 درجات.
اللغة الأجنبية الأولى (الإنجليزي والفرنساوي والألماني)
عدد أسئلة الاختيار من متعدد 38 سؤالا، منها 32 سؤالا بدرجة واحدة، و5 أسئلة بدرجتين، أما الأسئلة المقالية فعددها 3 أسئلة، منها سؤالان (كل سؤال بدرجتين) وسؤال واحد عليه 4 درجات (التعبير).
اللغة الأجنبية الثانية (الإنجليزية، الفرنسية، الألمانية، الإيطالية)
عدد أسئلة الاختيار من متعدد 31 سؤالا (28 بدرجة واحدة و3 بدرجتين)، والأسئلة المقالية 2 فقط، كل واحد منهما عليه 3 درجات.
= بإذن الله.. إجابات باقي الأسئلة خلال ساعات وأتمنى أكون قدرت أفيد اللي بعتولي الأسئلة
= قريبا.. هيكون فيه بوست (أو فيديو) هعمله وأنشره هيطمن كل طلاب الثانوية عن (مضمون الأسئلة السنادي وطريقة التصحيح والتظلمات).. معاكم يا أبطال
احمد حافظ
صحفي بالاهرام