= أولا: شكاوى بالجملة من المعلمين بسبب الامتحانات الشهرية.. مين يتحمل تكلفة تصوير ورق الامتحانات؟ هل المعلم؟ طب المعلم ذنبه إيه؟. هل الطالب؟ طب الطالب هيدفع تحت بند إيه والوزارة قالت ممنوع تحصيل أي مبالغ من الطلاب؟. طب المدرسة تعمل إيه وتتصرف ازاي؟. طب هل المديريات صرفت اعتمادات مالية لطباعة مئات الآلاف ويمكن ملايين من أوراق الأسئلة؟. أعتقد محصلش.. يبقى فيه مشكلة، وأعتقد الوزارة متعرفهاش.
= ثانيا: شكاوى من معلمين عن عدم جدوى الامتحانات الشهرية.. والسبب: فيه 3 طلاب في ديسك واحد، يعني بيغشوا من بعض، يعني لو الوزارة عايزة تقيم مستوى الطلبة (وده شيء محترم بالمناسبة)، يبقى التقييم هنا مش منطقي ولا واقعي وكله بيغش من بعضه، إلا لو الطالب اقتنع إنه بلاش يغش علشان يعرف مستواه.. طب هل الطالب عنده الثقافة دي ولا يهمه يجيب أعلى درجة علشان يبقى قدام أهله وزمايله شاطر ومتفوق؟. أتصور دي فعلا مشكلة لو كان الهدف تقييم مستوى الطالب فعلا.
= ثالثا: لما الوزارة تقول للمدارس طبقوا الغياب فعلا في الشهادة الإعدادية والشهادة الثانوية واللي يغيب أكتر من المعدل القانوني يتفصل. طب هل فيه معلمين هيحضروا؟ طب هل فيه معلمين بالأساس؟. لو حضرت يعني هيكون فيه شرح؟. أنا كطالب هستفيد؟. طب السنتر بيفتح الساعة 9 الصبح والمدارس شغالة.. والمدرس بيقول للطالب تعالى السنتر 9 الصبح.. طب الطالب هيروح السنتر ويغيب عن المدرسة ويتفصل.. ولا يروح المدرس وميلاقيش شرح ولا منه استفاد من السنتر ولا منه استفاد من المدرسة؟.
= رابعا: تقسيط رسوم اللغات في المدارس التجريبية لغات.. هل اتفعل القرار؟. أعتقد لأ، ومش عارف الوزارة عارفة كده ولا لأ.. طب هل عندها علم بكده؟. الله أعلم. طب ليه يلطع قرار ومينفذش؟ طب فين المتابعة؟. طب ولي الأمر ذنبه إيه؟. طب ليه أربط المصاريف الدراسية بدفع مصاريف الكتب؟ أنا حضرتك مش عايزها تجبرني عليها ليه وهي أصلا بتوصل متأخر وأنا اشتريتها من برة؟.
= خامسا: بعض المدارس الحكومية اللي لسه بتربط الكتب بالمصاريف رغم القرار الخاص بعدم ربط الكتب بالمصاريف.. الامتحانات شغالة وفيه طلبة لسه مستلمتش علشان مدير المدرسة راسه وألف سيف لازم المصاريف مع الكتب.. طب هل ده وصل للوزارة؟. طب هل فيه حد بيتابع تنفيذ ده؟.. الله أعلم.
= سادسا: مستحقات المعلمين اللي أشرفوا على امتحانات الثانوية العامة، وامتحانات الدبلومات الفنية، وامتحانات الشهادة الإعدادية السنة اللي فاتت.. ليه متصرفتش؟ ليه بنتعامل كده مع المعلمين ومع حقوق المعلمين رغم إن موازنة المديريات المفروض فيها بند خاص بمستحقات المعلمين اللي التزموا وأدوا واجبهم في الامتحانات، ونيجي نقول هم المعلمين بيعتذروا عن المشاركة في الامتحانات ليه؟.
= حاجات ممكن تكون بسيطة ومش مستاهلة لكن اللي عايز ينجح بيعالج السلبية الصغيرة قبل الكبيرة.. كتابة القرارات سهل، لكن متابعة تنفيذها أهم.. يا قيادات الوزارة تشتغل وتشوف شغلها، وكل واحد يعرف مسئولياته إيه، واللي بيقصر ويستفز الناس يتحاسب علشان نمشي صح.. يا نمشيها بالبركة واللي عايز حاجة يعملها.
= ده صوت الناس.. وصوت الناس لازم يوصل
أ/ احمد حافظ
