= قبل وضع الضوابط المنظمة للعام الدراسي الجديد، أتمنى من وزارة التعليم منع دخول الهواتف مع الطلاب، خاصة في المرحلتين الابتدائية والإعدادية بشكل صارم ودون استثناءات.. ولما بنتكلم عن منع الموبايل في المدارس مع الطلاب احنا مش بنقول هنعمل حاجة شاذة، ولا غريبة.. يكفي إن أهم الدول الأكثر تقدما عندها حظر شامل لوجود الموبايل مع الطالب في المدرسة: الصين، اليابان، ولايات أمريكية، ألمانيا، بريطانيا، سويسرا.
= منع الهواتف في المدرسة بداية لوقف إدمان ولادنا لاستخدام المحمول.. بداية إنهم يركزوا الكام ساعة اللي رايحين فيهم يدرسوا ويتعلموا ويستفيدوا ويقعدوا مع زمايلهم ويتكلموا مع المعلمين.. مش يكون المدرس بيشرح والطالب قاعد على الموبايل.
= عارف إن فيه ناس بتطمن على ولادها من خلال المحمول، لكن في نفس الوقت كلنا عارفين التليفونات عملت إيه في ولادنا.. لو عايز تطمن على ابن حضرتك فممكن يكون معاه موبايل (عادي) بيقول (ألو) وبس، لكن موبايل لعب وإنترنت ومنصات وفيديوهات وتصوير وتضييع وقت، صدقني غلط.. غلط تربويا ونفسيا وذهنيا.. وأكيد الدول المتقدمة عننا كتير كان عندها مبررات علمية علشان تمنع الموبايل في المدارس.. علشان كدة بقول (امنعوا) الهواتف الحديثة بالمدارس
احمد حافظ
صحفي بالاهرام
