مدرس اون لايندخول

رجع التعليم للمدرسه وللسبورة.. رساله معلم ٣٥ سنه خبره للدكتور رضا حجازى

رجع التعليم للمدرسه وللسبورة.. رساله معلم  ٣٥ سنه خبره للدكتور رضا حجازى  161

رساله من مدير مدرسه سابق ومعلم فيزياء ثانوي  سابق واشتغلت بالتعليم  لمده ٣٥ سنه ورئيس لجنه في ثانويه عامه سابق  ووكيل ومشرف وكل شغلانه في التعليم اشتغلتها
للدكتور رضا حجازى
****************
١- رجع التعليم للمدرسه و للسبورة كل الدول المتقدمة الشرح عالسبورة والتفاعل بين الطالب والمعلم لامفر منه ولابديل له  وتبقي المنصات وسيله تكميليه فقط وليس الاعتماد عليها دون غيرها.
٢ - اسمح بالنتيجه الحقيقيه  للطلاب في الامتحانات من غير خوف لمديري المدارس لان  المدرسة اللي طلابها نسبه الرسوب بها عاليه بيتم التحقيق مع العاملين بها ف  بيخافوا يسقطوا العيال وبيغششوهم لا يتحاسبوا حساب عسير . التعليم منهار والجميع يعلم ذلك  والطلاب  بتعمل عصابات علي المعلمين والأهالي أيام الامتحانات بيدخلوا داخل  اللجان من جوه يغششوا العيال اللي مش بتعرف تكتب اسمها اصلا علي ورقة الاجابة والملاحظ واقف لاحول له ولاقوة خايف يخرج يضرب ومالوش ديه ومن غير حماية علي المدرسين اللي جايين في بلاد مش بلادهم وطبيعي الخوف من القبليات لان حتي الشرطة اللي واقفة عارفة الوضع وسايباه واقسم بالله طلبت الشرطه مرة وانا بلجنه ث.ع رائد اخبرني انه مالوش دعوة احموا نفسكم انتم جايين اسبوعين فقط احنا هنا مع الاهالي طول السنه ..طيب سيارة شرطه تمشي مع الملاحظين لموقف السيارات بالمدينه يروحوا بسلام رفض التعاون معانا بالرغم انه مكلف بحمايه اللجنه وبياخد اجر وبيكتب اسمه في كشوف المكافئة الخاصه ب ث.ع  ..
٤-اعمل قوانين رادعة للطالب اللي معندهوش اي مبالاة باي حاجة هو واهله... عشان الطالب المتفوق ياخد حقه وتبقي هناك عداله  في النتائج
.
٥-اسمع للمعلمين اللي بتصرخ واقعد معاهم ولاتجعل حاجز بينك وبينهم خصوصا ان حضرتك كنت معلم وتعلم ما يعانيه المعلم وماتبعدش اذانك عنهم اغلبنا بيشتغل بعد الضهر عشان يحسن دخله وكتير شغل لا يليق بكوننا معلمين لان مش كلنا مواد اساسية عشان ندي دروس فا بنشتغل اي حاجةفيه معلمين بيسوقوا تاكسي وبيقفوا في محلات او اي شغلانه عشان يقدر يفتح بيته لانه تعبان ماديا ونفسيا وطول ماهو كده اكيد هيأثر علي شرحه واداؤه في الفصل .
٦- رجع للتعليم هيبته وكيانه اللي راح اقسم بالله انا اول مرة طلعت  ثانوية عامة فيها  انا مطلع لوحدي ادوات غش من العيال بحوالي من ٥٠ - ٧٥ الف جنيه من موبايلات ونضارات بلوتوث واجهزة vip وسمعات خفية في الاذن ..
مجاميع ثانوية عامة فشنك في ناس كتير عدت من غير تعب وبالغش عن طريق الاجهزة دي غير اللي تعب وذاكر واجتهد
٧- رجع نظام الامتحانات المقالي لان ال بابل شيت ده وسيله سهله جدا للغش للطالب المستهتر واعطي للطالب درجه علي خطوات الحل في الفيزياء والرياضيات  والتعبير و رسم الخراىط والاجهزه في الاحياء وتقدر تفرق بين الطالب المجتهد والغشاش
٨-لجان كنترول الثانويه العامه وايضا لجان الادارة  بكل القطاعات للثانويه العامه المنوط بها توزيع الملاحظين والطلاب ورؤساء اللجان يجب ان تتغير كل سنتين لان هناك مافيا بتظبط اللجان لصالح ناس معينه اكابر بالدوله عشان يجيبوا مجاميع بالغش لايستحقونها وبياخدوا اماكن طلاب فقراء مجتهدين في كليات القمه
اطلب من د مدبولي والرئيس ميزانيه اكبر لتعيين معلمين وخريجي التربيه لسد العجز في المعلمين واللي وصل الي ٣٥٠ الف معلم وبيخرج للمعاش كل سنه من ٢٠ الف الي ٢٥ الف ولابديل لهمو واظن هناك ٣٦ الف معلم تم اختيارهم من ٤٥٠ الف معلم ودفعوا مبالغ لتجهيز اوراق تعيينهم من فيش وتشبيه وشهادات وبرامج وشهادات كمبيوتر هم اولي للتعيين من غيرهم لسد العجز   ولذلك المدارس فاضيه من المعلمين والطلبه بتروح تقعد طول اليوم حصص احتياط في الحوش بدون تعليم وبالتالي هيروح ليه يضيع وقته فبيبطل يروح المدرسه وياريت تعمل درجه ولو ٢%فقط علي حضور الطلبه للمدارس خصوصا الشهادات هتجبر الطلاب يروحوا المدرسه ويخاف يضيع منه درجه المواظبه والحضور وامنع التلاعب بشهادات مرضيه مضروبه بتيجي ب١٠ جنيه من اي مستشفي ويبقي الشهادات المرضيه عن طريق قومسون طبي للطلبه وبدون تلاعب
٩- اخر حاجة اغلب المدارس مفيهاش عمال تنضف المدرسة هو المدرسين ناقصين خصومات عشان يجيبوا عمال علي حسابهم تنضف عشان لما تيجي اي زيارات يعاقبوا المدير والوكيل وغيره
١٠- رجع للمعلم هيبته امام المجتمع معنويا قبل ماديا معنويا واجتماعيا ليه موظف من المحليات يدخل المدارس ويتابع مدير المدرسه والمعلمين وهو ممكن يكون دبلوم تجارة مع كامل الاحترام للجميع وليه تسمح بموظف من وزارة تنميه محليه سواء وحده محليه او غيرة يشرف ويتابع ويكتب تقرير عن موظف بوزارة التربيه والتعليم  وده المفروض يتابع الصيانه والمياه والكهرباء ومشاكل تخص الوحدات المحليه ويساعد في حلها وليس من حقه ان يطلب يوميه غياب معلمين او الاطلاع علي دفتر الحضور والانصراف او جداول او اشراف ليس من حقه ذلك ولكن للاسف ده بيحصل
وماديا  وده حق وليس هبه من احد حقوقنا المالية اللي خصوماتنا كل سنة علي ٢٠٢٢ والاحدث مع العلم  ان استحقاقتنا علي سنه ٢٠١٤ لما بعد كده هيتساووا ويبقي المرتب صفر .
وربنا يوفقكم فى ال جاى معالى الوزير
واخيرا هناك اقتراح يمكن تنفيذه
ممكن سيادتك د رضا حجازي تعمل ورشه عمل تحت  اي مسمي  لاصلاح وعلاج بعض المشاكل للعمليه التعليميه في اكتوبر او اي مكان وتدعوا لتلك الورشه او الافنت ده
مديرو المديريات بالجمهوريه وبعض مدراء الادارات التعليميه وبعض مديري المدارس في جميع المراحل ب.ع.ث وبعض المعلمين لمختلف المواد وليكن المعلم المثالي في كل محافظه وبعض الطلاب الاوائل  في الشهادات  النهائيه وبعض اولياء الامور ورؤساء مجالس الاباء والمعلمين بالمديريات   ونقيب المعلمين في كل مديريه وممثلين عن كل فئات المجتمع وبعض نواب مجلس النواب ومجلس الشيوخ المهتمين بالتعليم وبعض اساتذة ودكاترة وعمداء كليات التربيه في بعض الجامعات ولمده اسبوع ويخرج الاجتماع بتوصيات وترفع للسيد رئيس الجمهوريه لان المشاكل اكبر من اي وزير لتداخل بعض الوزارات في حل المشاكل اهمها وزارة الماليه ووزارة التنميه المحليه ومجلس المحافظين والداخليه ....  ويكون هناك دعم وتوجه للجميع بان يكون عام التعليم بمصر تحت قيادة رئاسه الجمهوريه  وليكن الجميع مسخر لخدمه التعليم بمصر ويكون هدف قومي لاصلاح التعليم ولن ترتقي مصر وتنهض بين الامم وتصبح الجمهوريه الجديدة بجد الا برفع واصلاح التعليم بمصر وربنا يحفظ بلدنا ويوفق الجميع لهذا الهدف القومي العظيم
فتحي محمد ونيس
remove_circleمواضيع مماثلة
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى