= سقوط سيستم امتحان الدبلومة الأمريكية المصري est، لطلاب الثانوية، وإلغاء الامتحان اليوم وإلغاء امتحان الغد، غير مبرر وغير منطقي وغير مسئول بالمرة.. لما الامتحان بينعقد في القرية الذكية والأكاديمية العربية والسيستم والإنترنت يقعوا، المفروض يتعمل فين الامتحان علشان السيستم والإنترنت ميقعوش؟!.. لما طلبة مصريين مقيمين مع أهاليهم في الخارج يحجزوا طيران رايح جاي وينزلوا مصر علشان يمتحنوا وميعرفوش يمتحنوا مين يتحمل المسئولية؟! لما طلبة تيجي القاهرة من كل المحافظات وتحجز فنادق علشان تبات وتصبح تمتحن وتسافر ساعات من الصعيد للقاهرة علشان تمتحن مين يتحمل المسئولية؟!. لما الطلبة تدفع عن كل امتحان ٢٠٠٠ جنيه وميعرفوش يمتحنوا ولا يكون ليهم سيستم قوي رغم إن أعدادهم مش كبيرة مين يتحمل المسئولية؟!.. إعادة الامتحان لطلبة ملهاش ذنب لا يمكن يحل أزمة.. ده علاج مسكن لمرض مزمن، مع إن وجود امتحان مصري للدبلومة شيء محترم ولازلت من الداعمين للفكرة، لكن يبدو إن التخريب فيه شبه متعمد.
= اللي حصل ده مش أول مرة يحصل وبنفس السيناريو، وكل مرة الطلبة والأهالي هي اللي بتدفع التمن من غير ما يكون فيه محاسبة لأي طرف، وتحديدا الجهة اللي بيتعمل فيها الامتحانات وفشلت في المهمة بامتياز.. علشان كدة استمرار سقوط السيستم هيفضل أزمة طالما بنستسهل الحل..  بإعادة الامتحان للكل.
احمد حافظ
صحفي بالاهرام