مدرس اون لايندخول

نموذج امتحانات الشهادة الإعدادية 2022 الإلكترونية

24052022
نموذج امتحانات الشهادة الإعدادية 2022 الإلكترونية

عن نموذج امتحانات الشهادة الإعدادية - الإلكترونية:
وسط اللي بيحصل في امتحانات الشهادة الإعدادية، فيه نموذج كده بيطبق لأول مرة في تاريخ امتحانات الإعدادية، وهو نموذج محافظة بورسعيد.
إيه اللي بيحصل في بورسعيد في الشهادة الإعدادية؟
= باختصار شديد، امتحانات الشهادة الإعدادية في بورسعيد بنظام البابل شيت، والتصحيح إلكتروني، سواء لأسئلة الاختيار من متعدد، أو الأسئلة المقالية.
= في كل لجنة 3 نماذج للامتحان.. نفس الأسئلة لكن ترتيبها مختلف، يعني كل طالب يركز في ورقته بس، لو حاول يغش من زميله مش هيعرف، لأن السؤال الأول هنا، ترتيبه عند اللي قدامه رقم 10، وترتيبه مع اللي وراه رقم 22، وهكذا.
= كل ورقة أسئلة عليها باركود سري خاص بالطالب، يعني لو هتصور وتنشر، هنعرفك ونعرف رقم جلوسك واسمك ولجنتك وهتتمسك وانت قاعد جوه اللجنة.
= نيجي للتصحيح، فيه أجهزة بتصحح إلكتروني، لأن الأسئلة 70% منها اختيار من متعدد و30% مقالي، طب ازاي بيحصل التصحيح الإلكتروني هنا؟
= أول حاجة الجهاز بيدي تقرير مفصل عن الامتحان، كام طالب أجاب على السؤال رقم كذا صح، وكام طالب جاوب غلط، ولو نسبة اللي جاوبوا غلط أكبر بكتير، يبقى السؤال ده فيه مشكلة، وهنا يتاخد قرار لصالح الكل، إن درجته تتوزع أو تبقى قليلة، وهكذا.
= الطالب بيتسلم ورقة الأسئلة، وورقة الإجابة.. الورقة الأولى بها أسئلة اختيار من متعدد وأسئلة أخرى مقالية، والورقة الثانية يحدد فيها الطالب الاختيار لكل سؤال،
بنظام البابل شيت.
= الطالب بيختار الإجابة من ورقة الأسئلة، ويعلم عليها في نفس ورقة الأسئلة، وبعدين يروح يظلل رقمها في ورقة البابل شيت، وبالتالي تكون للطالب إجابتين موثقتين، وبيتم اعتماد إجابة البابل شيت فقط، إلا في حالتين بيرجعوا لإجابة الطالب اللي في ورقة الأسئلة:
= الحالة الأولى إن الطالب يكون نسى كتابة رقم النموذج الخاص بورقة أسئلته (كل لجنة بها 3 نماذج) وهنا بيرجعوا لورقة الأسئلة لكتابة النموذج الصحيح، وبالتالي لا يُظلم الطالب.
= الحالة الثانية إن الطالب يكون نسى الإجابة على سؤال بعينه في "البابل شيت"، لكنه أجاب عليه في ورقة الأسئلة، هنا يتم تصحيح السؤال من ورقة الأسئلة ويحصل على الدرجة، يعني هياخد حقه سواء من خلال ورقة الأسئلة أو من ورقة الإجابة.
= الأسئلة المقالية بتتصحح إلكتروني إزاي بقى؟.
= بيكون لكل سؤال إجابات قريبة منه، يعني لو الطالب كتب بطريقة قريبة من الحتة دي أو المستود ده ياخد واحد، ولو كتب بطريقة قريبة من دي ياخد 2، ولو كتب بطريقة قريبة من دي ياخد الدرجة النهائية للسؤال، والمعلم هو اللي بيصحح السؤالي المقالي، بس إلكتروني، يعني هو اللي قاعد على الجهاز، لكن بيصحح من نموذج متحدد له مش من وجهة نظره الشخصية.
= الخطوة الأخيرة، الماسح الضوئي بيجمع درجة الطالب في المقالي والاختيار من متعدد، ويطلع درجة المادة، وبعد كل ده، برنامج التصحيح الإلكتروني بيطلع بعد كل امتحان تقرير تحليلي مفصل، عن كل سؤال، لكل نموذج.. كم طالب أجاب على السؤال بشكل صحيح، وكم نسبة الإجابة الصحيحة ونسبة الإجابة الخطأ، وكم طالب لم يستطع الإجابة، وكم طالب تشابهت إجاباتهم في الصواب والخطأ علشان يقدروا يكشفوا حالات الغش الجماعي لو موجودة.
= الميزة الأهم إن أي سؤال تعجيزي برنامج التصحيح الإلكتروني بيكشفه حسب نسبة اللي أخفقوا في الإجابة عليه وهنا بيكون من السهل على مديرية التربية والتعليم توزيع درجات السؤال التعجيزي أو منحها لكل الطلاب بالتساوي، وهنا مفيش عينة عشوائية لكشف صدق أو كذب ادعاءات الطلاب بصعوبة السؤال، لأن البرنامج يتيح معرفة ذلك بمنتهى البساطة، والسرعة.
= هل هيبقى فيه تظلمات رغم التصحيح الإلكتروني؟
= أيوة هيبقى فيه تظلمات، وأي طالب هيقدم تظلم هيراجع ورقة إجابة البابل شيت، مع نموذج التصحيح الخاص به، وورقة الأسئلة الخاصة به، يعني الطالب معاه 3 وسائل مختلفة لإثبات حقه.
= أعترف إني كنت من أوائل الناس اللي هاجمت الفكرة، لكن بعتذر عن كدة دي الوقت، بعدما كشفت لي من خلال متابعة كل تفاصيلها إنها خطوة محترمة لامتحانات الشهادة الإعدادية بلا تسريب، بلا غش جماعي، بلا ظُلم لأي طالب.
أحمد حافظ
صحفي بالاهرام
remove_circleمواضيع مماثلة
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى