مهزلة تعليمية بامتياز.. عن تسريب امتحان شهادة الإعدادية بالجيزة:
= النهاردة تم تسريب امتحان مادة الجبر في محافظة الجيزة، قبل معاده – على الأقل- بساعتين، ولما بقول تسريب يعني الامتحان خرج قبل معاده الرسمي للطلبة.. فكان الامتحان على الفيسبوك وتليجرام وواتس آب، ومش عايز أقول كان بيتباع في مكتبات قدام مدارس.
= الإجراء الوحيد هنا، إن الامتحان يتأجل ساعة على الأقل ويتم طباعة الامتحان البديل
ويتلغي الامتحان اللي اتسرب، أو إن الامتحان بتاع الجبر يتأجل ليوم تاني، واللي عمل الجريمة دي يتحاسب ويتحاكم ويكون عِبرة بنص قانون مكافحة الإخلال بالامتحانات.
= طب فين المهزلة التعليمية؟.. المهزلة إن مديرية التربية والتعليم في الجيزة تمسكت بعقد الامتحان اللي اتسرب في نفس معاده، وبنفس أسئلة الامتحان، اللي معظم الطلبة معاها إجابتها أصلا من قبل الامتحان ما يبدأ بساعتين، ودي في نظري "مشاركة صريحة في تسريب الامتحان"، وخطأ يتحاسب عليه كل مسؤول وافق على المهزلة دي ومتدخلش إنه يوقفها ويلغي أو يعيد الامتحان.
= مش مقبول في شهادة إعدادية (شهادة عامة)، يتعمل امتحان متسرب قبل معاده بوقت كبير، وطلبة تاخد الدرجة الكاملة وطلبة تحس بقهر، وفي الآخر يتساوي الكل، اللي غش واللي اجتهد، علشان كده بقول اللي حصل في الشهادة الإعدادية ده مهزلة.
= الحل حضرتك، إن الامتحان ده يتعاد تاني، ومن حق المحافظ يعيده تاني، حتى لو خلص والطلبة روحت بيوتها، ويتعمل معاد تاني بأسئلة تانية، طالما ناس كان معاها الامتحان بإجاباته النموذجية وناس وهيتاخد حقها في شهادة عامة.. يا تعملوا كده يا تبقوا شركاء في المهزلة.

احمد حافظ 
صحفي بالاهرام