محور الأرض معصلج معاك وبتتغلبط بينه وبينه خط جرينتش ومش عارفهم من بعض ..عندك حق يابني والله
.طب ارمي محور الأرض وخط جرينتش والأرض ذات نفسها على جنب وهاتلنا بطيخة
ايوووة هاتلنا بطيخة وسكينة وقلم ماركر وتعالى ورايا .

محور البطيخة هو السكينة
والسكينة دي غزت البطيخة من فوقها لتحتها من قطب البطيخة اللي فوق(الشمالي) وغزتها   وعدت على مركز البطيخة من جوه لحد ما وصلت للقطب اللي تحت(الجنوبي) وخرجت من الناحية التانية،، وانت بتغز البطيخة كنت مميلها عليك شوية وانت عشان تافه وفاضي جيبت برجل عشان تقيس انت مميل البطيخة قد إيه ولاقيتها 23,5 درجة ووهي على وضعها المايل كده مسكت السكينة من فوق وقعدت تلف السكينة والبطيخة تلف معاك  من الشمال لليمين زي الصورة اللي تحت كده ماسك المحور من فوق وبتلف وأبوك دخل عليك وقال عوضي عليك يارب عوض الصابرين مش مهم هو مش عارف أهمية التجربة الخطيرة اللي بتعملها
اركن بقى البطيخة على جنب وتخيل نفسك بتعمل نفس الكلام مع الكرة الأرضية ماهي بطيخة بردو والمحور موصل القطب الشمالي بتاعها لحد القطب الجنوبي وفي النص مر بالمركز وزاوية ميله 23ونص درجة عن الخط العمودي.(هتلاقي صورتها في اول تعليق)
بعد ما خلصت لف قررت تكمل لعب روحت جايب قلم الماركر اللي قولتلك عليه وروحت راسم في نص البطيخة من برة خط موصل القطب الشمالي بالقطب الجنوبي بتاع البطيخة بتبص لاقيتك عملت نص دايرة أهو النص دايرة دي بقى هي ((خط جرينتش)).
ماتنساش تاكل البطيخة بعد ماتخلص
جغرافيا_أولى_إعدادي
دراسات_إجتماعية

مس سارة محمود

للمزيد  +  درس شكل الأرض وأبعادها س و ج دراسات اولى إعدادي ترم ١