مدرس اون لايندخول

عن تظلمات الثانوية العامة.. أدفع فلوس وأتظلم ولا لأ؟

09092021
عن تظلمات الثانوية العامة.. أدفع فلوس وأتظلم ولا لأ؟

عن تظلمات الثانوية العامة.. أدفع فلوس وأتظلم ولا لأ؟ 57510

الصحفي بجريدة الأهرام أحمد حافظ يكتب
______
عن تظلمات الثانوية العامة.. أدفع فلوس وأتظلم ولا لأ؟
وصلني السؤال ده من ناس كتير، بعد ما أتاحت وزارة التعليم التظلم على نتيجة الثانوية العامة وإعادة فحص أوراق الإجابة يدويا والاطلاع على نموذج الإجابة والتقديم ابتداء من السبت المقبل. والكلام اللي هقوله مجرد نصيحة لوجه الله عايز تاخد بيها تمام، مش عايز لك مطلق الحرية.
دي الوقت لو عايز تتظلم على أي مادة هتدفع 300 جنيه، يعني لو هتتظلم في الكل هتدفع أكتر من ألفين جنيه، علشان إيه؟. علشان تشوف ورقتك وتقارنها بنموذج الإجابة اللي الوزارة اعتمدته وصححت منه. طب هل الخطوة دي فيها فايدة ولا لأ؟
قبل ما أقولك آه أو لأ، لازم أقولك معلومة مؤكدة، إنه لما الوزارة صححت الامتحانات بشكل إلكتروني، كان فيه تصحيح ورقي لعدد معين بشكل عشوائي، واتقارنت نتيجة التصحيح اليدوي بالتصحيح الإلكتروني، طلعت النتيجة متطابقة، لأن الاتنين صححوا من نموذج إجابة واحد.
الخطوة دي عملوها علشان يتأكدوا إن التصحيح الإلكتروني ماشي صح. بغض النظر بقى عن الإجابات الصحيحة اللي حددتها الوزارة لكل سؤال. وكل نموذج أسئلة كان بيدخل على الكمبيوتر نموذج الإجابة الخاص بيه، وبعدها بيتراجع مرتين، هل فيه حد مشخبط، هل فيه نموذج متبدل، وهكذا.
نيجي للمهم.. لو انت كطالب هتتظلم علشان شاكك إنك مجاوب صح والكمبيوتر صحح لك غلط، فاسمح لي أقول حضرتك إنك مش هتاخد ولا نص درجة زيادة، لأن الكمبيوتر صحح بالإجابة اللي اتقاله عليها، وبالتالي فانت لو ناوي تتظلم علشان كده أنصحك متخسرش فلوسك على الفاضي، وكفاية اللي صرفته.
النقطة التانية، لو انت كطالب شاكك إن مش دي إجابتك أصلا، ولا دي درجاتك، وعايز تتظلم لإحساسك إن ورقتك اتصححت على نموذج إجابة غير النموذج اللي المفروض تتصحح بيه، اتظلم، لكن صدقني ده احتمال ضعيف، لأن طريقة تجميع البابل شيت وإدخال النماذج على الاسكانر قبل التصحيح، وتخزين الدرجات على السيستم نسبة الخطأ فيها ضعيفة. لكن لو شاكك في تبديل ورقتك مع نموذج تاني تظلم.
هشرح لك النقطة دي تاني: دي الوقت حضرتك كنت بتمتحن بنموذج أسئلة رقم (أ)، فانت ليك نموذج إجابة مخصص لنموذج الأسئلة رقم (أ)، لو انت بقى شاكك ان نموذج البابل شيت بتاعك، اتصحح بنموذج الإجابة المخصص مثلا لرقم (ب)، وقتها اتظلم وهنا يكون ليك حق. بس برضو ده احتمال ضعيف جدا.
النقطة التالتة، لو انت شاكك إن ورقتك اتبدلت مع طالب تاني فده شبه مستحيل. ليه؟. لأن ورقة البابل شيت بتتصحح بالبيانات اللي انت كاتبها بخط إيدك، مش بتتشال وترجع مكانها تاني زي ما كان بيحصل في التصحيح الورقي، ولو انت ناوي تتظلم بسبب كده، صدقني وفر فلوسك وكفاية اللي صرفته.
فات وقت الكلام عن شكل الأسئلة ونوعية الإجابات وصدمة النتيجة والتنسيق الظالم، لكن إنك تعيش على أمل مش هيتحقق، أنا بنصحك لوجه الله، بلاش تتعب نفسك وتتعشم بحاجة مش هتيجي. وكلامي مش دفاع عن التصحيح الإلكتروني، لكنه مجرد نصيحة. التظلم بفلوس والاطلاع اليدوي على ورقة الإجابة، نتيجته والعدم سواء. متدفعش في حاجة مش هتاخد مقابلها أي حاجة. اللهم قد بلغت، اللهم فاشهد.

شاهد ايضا : التعليم: إطلاع الطالب على نموذج الإجابة وكراسة البابل شيت الخاصة بالمادة المتظلم فيها أثناء الفحص
لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى