مدرس اون لايندخول

أحمد حافظ: هي إيه مشكلة الثانوية العامة بالظبط؟!

11072021
أحمد حافظ: هي إيه مشكلة الثانوية العامة بالظبط؟!

الصحفي أحمد حافظ يكتب
____
هي إيه مشكلة الثانوية العامة بالظبط؟!
مشكلة الثانوية العامة السنادي، تتلخص في إن وزارة التعليم عايزة جيل فاهم مش حافظ، لأن امتحانات الحفظ مبقاش ليها مستقبل، ولا ينفع تكون موجودة في العصر الحالي، في ظل تطور أنظمة التعليم عالميا.
مبدئيا، إنك تلغي أسئلة الحفظ وتخليها فهم، دي حاجة أنا عن نفسي بدعمها جدا، ولكن:
حضرتك كوزارة، عملت إيه علشان تطبق الفكرة؟.. الإجابة: أفعالك لا تتناسب مع حجم الهدف اللي انت شغال عليه.. وهشرح لحضرتك ليه الطلبة دي مظلومة والمفروض نقدر غضبها وغضب أهلها.
قبل أي شيء.. الطلبة دي جاية منين؟.. جاية من الإعدادية.. طب الإعدادية دي بتمتحن إزاي؟.. بتمتحن حفظ مش فهم، يعني طول حياتهم من الابتدائي حتى نهاية الإعدادية بيذاكروا حفظ، وبيمتحنوا حفظ، والتدريس في المدارس نفسه حفظ.
لما دخلوا على الثانوية، فوجئوا بواقع جديد تماما..
فوجئوا بمنهج ملوش أي علاقة بالامتحان، فوجئوا بأسئلة كلها محتاجة فهم وتحليل، وفوجئوا بمعلمين بيشرحوا بنفس طريقة الحفظ القديمة، وفوجئوا بكورونا اللي قعدتهم في البيت، وفوجئوا بالوزارة تقولهم ياللا علشان نمتحن فهم.
عدت أول سنة زي ما عدت، وعدت تاني سنة زي ما عدت، وجينا على تالت سنة (الثانوية العامة).. فضلت نفس المشكلة.. مشكلة منهج بيعتمد على الحفظ.. مشكلة معلمين بيشرحوا بالحفظ.. مشكلة كورونا.. مشكلة ورقي وإلكتروني وتابلت وبابل شيت.
هنا بقى نتكلم على أزمة الأسئلة.. طب هي أزمة الأسئلة؟
أزمة الأسئلة إن الطالب محدش دربه صح وبشكل سليم ومباشر، إنه يتحول من ثقافة الحفظ لثقافة الفهم، وفي إيده كتب الوزارة اللي كلها بتعتمد على الحفظ، وحضرتك بتقوله همتحنك فهم.. طب هو فهم منين؟.. هو ذاكر المنهج بالطريقة القديمة، لأن محدش قاله يذاكر ازاي بالطريقة الجديدة.
كان مطلوب تطور مناهج الثانوية من الحفظ للفهم، وتمتحن الطالب في الفهم.. مش تجيب لي منهج زي العربي قائم على الحفظ، والامتحان أغلبه بطريقة أسئلة فهم ومش موجودة في أي مكان بالكتاب.. طب معلش إيه لازمة كتاب الوزارة في الحالة دي؟.
كان أولى يكون عندك خطة واستراتيجية شاملة لتدريب المعلمين على الشرح بطريقة الفهم، ويكون عندك مناهج فهم، علشان لما تعمل أسئلة فهم محدش يقولك إيه اللي انت بتعمله ده.. وقتها فعلا محدش هيكون عنده حجة، لأنك فعلا هتبقى ماشي صح.
المشكلة إن الوزارة فاهمة إن أغلب الناس ضد التطوير، وده مش حقيقي، مفيش ولي أمر عايز ابنه يتعلم بنظام تعليم عقيم وقديم ومتخلف عن كل أنظمة التعليم في العالم، بدليل إن كتير بيدخلوا ولادهم مدارس دولية علشان نظام التعليم الحديث.
حقك تطور الأسئلة من الحفظ للفهم وأنا عن نفسي معاك جدا جدا جدا.. لكن الأول تأسس الطالب على كده، وتديله منهج تعليمي بكده، وتديله معلم بكده، وياخد فرصته كاملة لحد ما يكون على دراية كاملة إنه يفرق بين الحفظ والفهم.. مش تديله منهج ملوش علاقة بالواقع ولا الامتحانات، وتقوله روح ذاكر من المنصات والقنوات علشان تفهم، وفي الآخر لا الامتحان من الكتاب ولا المنصة ولا القناة.
أنا بكتب الكلام ده ليه؟.
علشان تتعاملوا مع شكاوى الامتحان على إنها مقبولة ومشروعة، وتعرفوا إن الناس مش بتحاول تاخد حق مش حقها، بقدر ما بتحاول تقول لكم احنا عايزين تطوير بس يطبق صح، ويكون عندم تغيير في الأسئلة من الحفظ للفهم لكن بالتدريج مش بأسئلة تعجيزية.
عارف ليه يافندم الناس ماسكة في كلمة تعجيزية؟
أنا هقول لحضرتك.. لأنك قلت مفيش طالب هيقفل الامتحان، وده تصريح لا يصح يخرج من أعلى مسئول عن التعليم، لأنه بيدي إيحاء إنك ناوي على التعجيز، وناوي يكون فيه أسئلة محدش يعرف يحلها لا المجتهد ولا غير المجتهد، حتى لو مكنتش بتخطط لكده أصلا.
لأنك كمان، مقدمتش للطالب كل اللي محتاجة منك علشان يكون مؤهل للتعامل مع طبيعة الأسئلة الجديدة، ولا قدّرت ظروفه إنه طول سنوات تعليمه قبل الثانوية بيتشحن معلومات ويفضيها في الامتحان مش أكتر، وجيت قولت له افهم الأول لأني معنديش معلومات أديهالك.. روح ابحث عنها بنفسك على المنصات وبنك المعرفة لأن الكتاب مش كفاية.. طب ما توفر لي كتاب منهجه كله فهم مش حفظ وبعدين نتحاسب!.
حاجة أخيرة: تقدر حضرتك تقوللي، لو لم يتدخل الرئيس السيسي بحكمته وعقلانيته، وألغى امتحانات التابلت كان ممكن حصل إيه دي الوقت (أسئلة مبالغ فيها + منصة وارد بقوة تقع)؟.. حضرتك متخيل المشهد كان هيبقى عامل إزاي؟.
تقدر حضرتك تقوللي مبرر واحد يخليك تعمل جدولين ثانوية عامة، واحد علمي، وواحد أدبي، والامتحانات تختلف، وتفتح على نفسك أبواب الجدل والغضب بدون أي داعٍ أو مبرر مقنع؟ طب إيه علاقة الجدولين بالتطوير؟!. عرفوا مشكلة الثانوية العامة فين بالظبط؟. الطالب المجتهد فعلا عايز تطوير تعليم، وعايز فهم، وعايز يبقى مواكب للعصر، بس في نفس الوقت عايز كل ده يطبق صح وبإقناع مش عافية.
قبل أن تلوموا الناس على الشكوى لوموا أنفسكم على كل شيء مضى

تعاليق

لا يوجد حالياً أي تعليق
privacy_tip صلاحيات هذا المنتدى:
لاتستطيع الرد على المواضيع في هذا المنتدى