الأخ ولى أمر الطالب
زى ما انت ولى أمر ، أنا برضه ولى أمر ، بس الفرق اللى بينى وبينك إنك بتغذى كرش ابنك بالطبيخ ،وانا بغذى عقله بالعلم وحب الوطن وإنه يبقا مواطن صالح
وزى ما أنا ما بتدخلشى فى طريقة شغلك تعمله ازاى فسيبنى أنا كمان أشتغل زى ما أنا اتعلمت ازاى أشتغل ، لغاية باب المدرسة والفذلكة وادعاء العلم بالتدريس وتوقف ، أنا عمرى ما كنت عدو لإبنك أنا إسمى معلم ، وان كنت محموق من الدروس الخصوصية فدى مش مشكلتى ، دى مشكلة البلد اتكلم معاهم وقولهم ادوا المدرس حقه وحاسبوه زى ما انتم عايزين
وماتعملشى منى قضيى تتسلى بيها فى وقت فراغك ، ثقف نفسك الأول واعرف الدول اللى كرمت المعلم أصبحت ازاى ، وشوف الفرق بينى وبينك فى معاملة أولادك ،، إنت ممكن تسب وتلعن فى ابنك وممكن كمان تطلق أمه عشان ماعرفتشى تربيه هو واخواته الاتنين ، أما أنا فقدامى 60 عقلية زى ابنك ومستحمل ، ويوم ما بغضب بيبقا ضربى لابنك تهذيب مش تعذيب ،
عمرك ما اتكلمت على اللى مؤهله أصغر من مؤهلى لما يوقفك فى إشارة مرور ويقولك لف ياحيوان من الشارع التانى ، بالعكس انت بتقابله بابتسامة وتقوله لامؤاخذة ياباشا ما أخدتش بالى
عيب تدمر جيل وتبقى السبب فى سوء نفسية معلم ممكن بسببك يتحول لإنسان تانى ويبيع ضميره ويبطل يشرح