شوية نصائح ع الماشي تمشي عليهم في حل أى مسألة فيزياء ...
صحصح معايا كده ومتعيطش :
١)تقرأ نص السؤال كويس جدا ..بتأني
٢)تطلع المعطيات ..يعني هتطلع أى رقم موجود عندك في المسألة ورمزه ويساوى زى كده: مثلا قالك سيارة سرعتها
30m/ s يبقي رمزها ال هو إنت عارفه v=30 m/s
وهكذا...
٣)حدد المطلوب ..تشوف هو عاوز منك إيه تجيب قيمته في المسألة بالظبط ؟
٤) تشوف القانون ال بيربط بين الخطوة (٢،٣).
طيب يامستر أنا بعمل كل ده بس فيه حاجات مش بعرف أجبها وبتبقي ناقصة معايا لما أجي أعوض ؟..بص هقولك ع حاجة تمشي عليها ع طول ...
(لو مديك أى معطى في المسألة وحضرتك مستخدمتهوش تأكد إن كده فيه حاجة في حلك غلط ) وأكيد هو مش هيديك معطي لله وللوطن كده ..لأ هو مدهولك علشان تقدر من خلاله تجيب الحاجة ال ناقصة معاك في القانون .
٥) أستحلفك بالله تركز من وحدات القياس في السؤال ومينفعش مثلا لو عندى قيمتين لشدة التيار واحدة بالأمبير والتانية بالملي أمبير لازم أخليهم نفس الوحدة ...ودا ع سبيل المثال علشان تعبك في السؤال ميروحش ع الفاضي.
٦)وأنت بتكتب ع الالة الحاسبة ركز جدا إنك بتكتب صح بحيث الالة تطلعلك الناتج صح .
٧)في النظام الجديد هو بيلعب معاك في السؤال ع فهمك يعني ممكن يكتبلك إجابتين متشابهين جدا ويدوبك يغيرلك حاجة صغيرة (زى الفسفوسة كده ) بحيث حضرتك مع التوتر تتلخبط وتطلع من الامتحان فاكر إنك حالل صح وإنت غلط ...نركز من فهم الحتة دى
٨)أوعى متحلش بإيدك وانت بتذاكر حل مرة واتنين وتلاته واربعة ...الحل الكتير بيثبت المعلومة والقوانين .
وعذرا للإطالة ..
أ/ هاني محمود
+
