عن درجات أعمال السنة.. وامتحانات الثانوية العامة:
= من ٦ ابتدائي إلى ٢ ثانوي عام، عندك أعمال سنة.. سيبك من درجات الحضور والسلوك اللي كدة كدة تقريبا (كله مش هياخد فيها أقل من ٨ من ١٠).. أنا اللي يهمني الامتحان الشهري اللي عليه ١٠ درجات.. حضرتك متحفظ ليه على الامتحان الشهري؟!.. انت كولي أمر يهمك في المقام الأول ابنك يتعلم وتشوف مستواه كل فترة، كويس متوسط محتاج يركز شوية، محتاج يشد حيلة في مادة معينة، وهو ده الهدف من الامتحان الشهري ..
ابنك كدة كدة بيذاكر وبياخد دروس، طب إيه المانع كل فترة يمتحن امتحان شهري يشوف فيه مستواه.. وكدة كدة لو كان مستواه ضعيف أو متوسط في شهر، وجاب في الشهر التاني درجة أعلم هياخد الدرجة الأعلى وتتحط على مجموعه.. ما انت لازم تتابع ابنك وتشوف مستواه كل فترة، وتخليه يجتهد عن اليوم اللي قبله، ودي ميزة الامتحان الشهري اللي هتكون دليل قدامك لمستوى ابنك.
= بالنسبة للثانوية العامة:
= انت كطالب هتدرب طول السنة على شكل وطريقة الأسئلة ومواصفات كل امتحان، وهيكون في إيدك مخرجات التعلم لكل مادة يعني مش هيخرج عنها الامتحان بس محتاج تركز في المفاهيم والمخرجات لكل درس.. والامتحان هيكون (أوبن بوك) يعني من مجلدات المفاهيم.. يعني تقريبا هيكون معاك ملخص الكتاب اللي اتعمل في عهد دكتور طارق شوقي.. يعني داخل الامتحان وانت تقريبا معاك كل أدوات النجاح.. إيه مخوفك؟!.
= هتجيلك أسئلة اختيار من متعدد و١٥٪ أسئلة مقالية كل سؤال منها هتجاوب عليه في سطرين تلاتة.. وهيكون فيه نموذج إجابة (تقريبي) المعلم هيصحح منه السؤال المقالي.. ولما تيجي تتظلم هتاخد ورقة أسئلة وورقة إجابتك ونموذج الإجابة اللي اتصحح منه الامتحان علشان تصحح لنفسك بنفسك وتدي لنفسك الدرجة اللي انت تستحقها.
= أنا مليش أدنى مصلحة لا في تطبيق ده ولا إلغاء ده.. أنا بكلمك كولي أمر قبل ما أكون صحفي متخصص في التعليم وببسط لك الموضوع.. انت كأب بالنسبة لأعمال السنة هتراقب مستوى ابنك شهريا.. واللي هيحط الامتحان لا معلم المدرسة ولا ابنك هيكون تحت رحمة حد إلا مستواه وبس.. وانت كطالب ثانوية عامة توكل على الله وارسم لنفسك هدف من دي الوقت واطمن لبكرة.. هتدرب على الامتحان بدري وهيكون معاك أدوات تفوقك بس انت أحسن استغلالها.. ولن يظلم ربك أحدًا
احمد حافظ
صحفي بالاهرام
