= عن درجات أعمال السنة لطلاب المدارس.. فكرة للتطبيق:
= لازم يكون فيه نظام جديد تماما لدرجات أعمال السنة في المدارس، لتحقيق الانضباط والالتزام وقياس مستوى الطالب بشكل مستمر.. مش يكون فيه امتحان نصف سنة وآخر السنة بدون الطالب ما يعرف مستواه في المادة كل فترة، ولا ولي الأمر يعرف مستوى ابنه كل فترة، ولا المعلم نفسه ما يعرف مستوى الطلاب عنده في الفصل، كل فترة.
= إيه علاقة الامتحانات بأعمال السنة؟.. الفكرة اللي أنا بطرحها، إن يكون عندي درجات على أعمال السنة، تشمل (تقييم سلوك الطالب + تقييم حضور أو غياب الطالب + تقييم مستوى الطالب).. يعني مثلا، لو هعمل درجات السنة على 20 % من درجات الترم الأول ولو هنقول مثلا 20 درجة، هخللي 5 درجات على السلوك، و5 درجات على الحضور، و10 درجات على الامتحان الشهري (يعني نعمل امتحان قياس مستوى كل شهر في الترم).
= طب مين هيكون مسئول عن الخمس درجات سلوك؟. طبعا المعلمين. طب مين هيكون مسئول عن الخمس درجات حضور؟. طبعا إدارة المدرسة. طب مين هيكون مسئول عن العشر درجات بتوع الامتحان الشهري؟. هنا بقى المعضلة الأهم: مين يحط الامتحان أصلا بتاع الشهر؟.. أنا رأيي اللي يحط الامتحان موجه المادة، ويكون الامتحان ده على مستوى المدرسة، مش معلم الفصل هو اللي يحطه، ويبقى عندي يوم كده بنهاية الشهر يتعمل فيه امتحان لتقييم مستوى الطالب عليه 10 درجات، أهو منه يعرف مستواه كل فترة، وأهله كما يعرفوا، ولو محتاج يشد حيله شوية، يبقى يشد حيله.
= هي دي درجات أعمال السنة اللي أنا أتمنى تطبيقها، علشان تعمل انضباط في الحضور، وانضباط في السلوك، وانضباط في التحصيل الدراسي بكل مادة.. أتصور إن مفيش ولي أمر مش عايز ابنه يبقى كويس، ومفيش ولي أمر مش عايز ابنه في السلوك يبقى متميز، ويكون مطمن كل فترة على مستواه، كويس متوسط ولا محتاج يشد حيله شوية.. وأتمنى لو إن الطالب ياخد العشر درجات الأعلى في الامتحانين.. يعني لو جاب في امتحان شهر 11 مثلا 6 من عشرة وجاب في امتحان شهر 12 الدرجة النهائية (10 من 10) يبقى ياخد العشر درجات مش الـ 6 درجات علشان نحفزه ونقوله برافو عليك انت مستواك اتطور وتستحق الدرجة الأعلى.. علشان كده بطرح الفكرة، وبناقشها مع حضراتكم، ربما توصل صح لصانع القرار في وزارة التعليم.
احمد حافظ
صحفي بالأهرام