= فين الأمن الإداري اللي مهمته يفتش الطلاب؟.. فين المراقبين اللي واقفين على الطلاب في اللجان؟.. يعني إيه طالب يصور أكتر من ورقة من كراسة الأسئلة ويفتح النت وينشر وكأنه قاعد في سايبر نت محدش بيقوله انت بتعمل ايه؟ حضرتك كمراقب كنت فين وبتعمل إيه؟ حضرتك كفرد أمن عديت ليه طالب من بوابة المدرسة ومعاه تليفون ولا ساعة مبرمجمة ولا أي أدة غش؟ حضرتك معاك ساعة كاملة تفتش فيها من 8 إلى 9.. حضرتك كنت فين بالظبط؟.
= حضرتك كرئيس لجنة شايف إن الأوضاع عندك أكبر منك ومن المراقبين ومن الأمن الإداري، ما تقول للوزارة احتياجاتك إيه علشان اللجنة تتظبط.. آه اللي بيصور وينشر بيتجاب من قفاه وبيشيل الليلة لأنه بيتفضح من خلال الكود السري، طب اللي بيستقبل إجابات فقط، سواء بسماعة أو بأي وسيلة تانية.. بيعدي ازاي وليه.. والناس اللي في اللجنة فين بجد؟.
= حاجة تانية.. جروبات تليجرام اللي علشان تشترك فيها لازم تبعت كارت شحن على رقم تليفون معروف.. أو تبعت فلوس على فودافون كاش وبرضو الرقم معروف.. الناس دي مش بيتعرف مكانها وعنوانها وتتجاب من قفاها ليه؟.. الناس دي بتتحدى الدولة وبتنشر أرقامها بمنتهى الجرأة، طب ليه مش بيتقبض عليها وتكون عبرة لمن لا يعتبر.
= اللي بيتعمل من كل الأجهزة ووزارة التعليم علشان ورقة الأسئلة تتأمن لحد ما توصل للطالب مجهود خرافي بجد، لكن اللي بيحصل داخل اللجان من اللي الوزارة مختاراهم ومكلفاهم يكونوا أمناء على المسؤولية دي.. حرام حرام حرام.
احمد حافظ
صحفي بالاهرام
