منشين لكل دفعة تالتة ثانوي 2022
 من بيتك لحد ما تخرج من لجنه الامتحان وكيفية التعامل مع البابل شيت
مهم جدا جدا

___________
1- نومك ليله الامتحان لا يصح أن يقل عن ست الي ثمان ساعات ممنوع تماما السهر ليله الامتحان والله والله ضرره أكثر من فائدته حتي لو فيه حاجات لسه ما ذاكرتها برضوا لازم تنام كفايه ، وبعدين مش هم الست ساعات دول الي هيفرقوا معاك يعني ، امتحانك محتاج طالب أعصابه بارده ومركز وهادئ ومستحيل تكون مركز وأنت مش نايم كويس
من فضلك لازم تنام كفايه ليله الامتحان
________
2 اول ما تصحي هتصلي وتلبس وتنزل علي طول مافيش داعي تراجع حاجه اول ما تصحي ، أنت وفي المواصلات هتمسك المصحف وتفضل تقرأ قرآن لحد ما توصل لجنتك ، برضوا ممنوع تراجع أي حاجة في المواصلات
____________
3 اول ما توصل لجنتك لو كان فيه حد من صحابك بيضحك وبيهزر اقعد معاه واضحك وهزر عادي جدا ، انما لو لقيت حد بيراجع ابعد بعيد واقعد على جنب واذكر ربك بأي أذكار تيجي على بالك .
________________
4 -هتدخل لجنتك تسمي الله ، وأول حاجه هتمسك ورقه البابل شيت هتكتب اسمك بخط واضح ، رقم جلوسك بخط واضح ، رقم النموذج بخط واضح ، بالله عليك بخط واضح وفيه مربعات لرقم الجلوس ورقم النموذج مهم تكتب كل رقم في مربع وبخط واضح بلاش يكون رقم فوق ورقم تحت. والله السنه الي فاتت ناس كانت تبدل الأرقام هي وبتكتب رقم النموذج وده حاجه ممكن توديك في داهيه ، فبالله عليك لازم تكون هادي تماماً أنت وبتكتب رقم الجلوس ورقم النموذج أنت مش في ابتدائي عشان تغلط فيهم يعني بعد ما تخلص كتابه بياناتك بخط واضح اركن ورقه البابل شيت على جنب وملكش دعوه بيها نهائيا دلوقتي

---------------------

5-هتمسك البوكليت بتاعك بعد ما تكتب عليه بياناتك هو كمان وهتبدا تحل
المفروض كل سؤال لن يستغرق منك إلا أقل من دقيقة أو دقيقه ونص بحد أقصى ، لو حسيت السؤال هيعك معاك من فضلك لازم تسيبه وتدخل على الي بعده ، لأنك ممكن تحاول فيه ويستنزف وقت كبير منك وفي الآخر يطلع غلط وكمان متلاقيش وقت لباقي الأسئلة ،
طلبه كتير السنين الي فاتت كانت تشتكي أنه الوقت قليل ولا يكفي الامتحان ، مع أنه الوقت مناسب جدا بس لو أحسنت استغلاله ، فمن فضلك اول ما تحس السؤال هياخد اكتر من دقيقة منك علم عليه وادخل على الي بعده .
___________
6 - امتحانك 50 سؤال باستثناء العربي 60 سؤال فلو كل سؤال اخد منك دقيقه ونص فأنت كده هتكون خلصت بعد أول ساعه ونص يعني بعد نص الوقت وهنفترض أنه فيه خمس ست أسئلة وقفوا معاك ولسه ما حلتهم.
__________
7- بعد كده هترجع تراجع على الاسئله الي أنت حليتها ومتأكد منها وتتاكد أنه كله تمام.
______________

8_ هترجع تمسك ورقه البابل شيت وتركن القلم الجاف على جنب وتمسك القلم الرصاص الجميل بتاعك وهتبدا تظلل سؤال سؤال في ورقة البابل شيت بكل تركيز
1 أ
2 ب
تكون في كامل تركيزك أنت وبتنقل،
نقلك للاسئله لا يستغرق اكتر من نصف ساعة _ده لو أنت بطئ_
بعد كده هتراجع تاني سريعا وتطابق اجابتك في البوكليت مع اجابه البابل شيت ,وده لن يستغرق منك بضع دقائق ، بعد ما تتأكد أنك مظلل كل سؤال في مكانه ومتأكد من كل حاجه هتمسك قلمك الجاف وتبدأ تظلل ، مافيش داعي تمسح الرصاص ، ظلل فوق الرصاص عادي خالص .
مهم جدا انك تطمس الدائره بالكامل ، متطلعش بره الدائره
تظليلك بالقلم الجاف برضوا لن يستغرق منك إلا دقائق معدودة.
______________

9-أنت كده يا بطل هتكون خلصت امتحانك وظللت كل حاجه والمفاجأة كمان انك لو اتبعت الخطوات الي قولتها بالظبط هيكون ظللت البابل شيت بدون أي شطب
وهو ده الهدف الي كاتب البوست عشانه ، اني مش عايزك تشطب في البابل شيت وبعد كده ترجع تعمل علامه اكس وتجاوب اجابه تاني ليه العك ده !!!! عشان تكون في السليم معلش اتبع الخطوات وعايزك تحط في دماغك أنه الشطب ممنوع تماما حتي لو حد قلك الوزير قال عادي ، أنا عايزك تكون مميز ومتشطبش من فضلك
ليه بقا متشطبش !؟
عشان ده جهاز الي بيصحح ولن يتم مراجعة اجابتك يدويا الا لو الجهاز لقيك شاطب ومعرفش يتعرف على اجابتك في الحاله دي هيتم التدخل يدوياً ، لكن هسالك سؤال هل أنت متأكد أنه هيتم التدخل يدوياً ولا ممكن يعدوها كده عادي !!؟ انت ليه تحط نفسك تحت رحمه المصحح !! من فضلك بلاش شطب .

10 أخيراً بقا أنت كده خلصت وجاوبت في البابل شيت كل الأسئلة المتاكد منها لكن ما زال هناك خمس ست أسئلة انت معلم عليهم ولسه ما حلتهم
دلوقتي بقا هتبدا تحلهم وهيكون معاك حوالي ربع ساعة من الوقت تحاول فيهم والسؤال الي تحله ، ظلله في البابل شيت علي طول حتي لو مش متأكد منه ، ومهم خالص تركز أنت وبتظلل في مكان السؤال نفسه ، لأنه وارد مع التوتر تروح تظلل السؤال الي فوقه أو الي تحته الي انت اصلا حليته فبالله عليك تركز
لو لقيت الوقت خلص وفيه سؤالين لسه ما حلتهم ظللهم أي حاجة وخلاص وارد تطلع صح.

أخيرا
الوضع بسيط جدا والبابل شيت حلو خالص بس عايز طالب هادئ
هقولك أخطأء ممكن تقع فيها لو ملتزمتش بالخطوات دي
ممكن أنت وبتظلل تنسي سؤال في النص وتظلل الي بعده وهتيجي في الآخر تكتشف أنه فيه سؤال مالهوش مكان ومعني كده يا حبيبي انك أغلب الامتحان غلط عندك وده بسبب التسرع ،يعني أنت ممكن تكون ذاكرت وتعبت وحليت الأسئلة كلها صح لكن في التظليل في البابل شيت بدلت سؤال مكان سؤال او نسيت سؤال في النص وبكده مبروك عليك انت شيلت الماده للاسف وطبعا القانون لا يحمي المغفلين فمافيش حد مثلا هيروح يراجع اجابتك الصح في البوكليت أو الكلام ده ، الي هيتم تصحيحه هو البابل شيت فقط لا غير.

أخيراً بقا
الفتره دي عايزك تطبع تلاته أربع نسخ من الورقه دي وتبدأ تتدرب على التعامل مع البابل شيت الفتره الجايه بنفس الخطوات الي قولتها .
افتكر بقا أنه تعاملك مع ورقه الامتحان والوقت اهم من مذاكرتك نفسها
إيه لازمه المذاكرة وأنت مش عارف تتعامل مع ورقه الامتحان ولا الوقت!!!