خلاصة مناقشة وزير التعليم بمجلس النواب ..
الوزير النهاردة قال ان مناهج رابعة ابتدائي دي الأفضل بشهادة المؤسسات الدولية، وان الشكاوي معظمها بسبب العلوم والرياضيات والاتنين دول لزوم المنافسة الدولية فنركز عليهم
بالنسبة بقى للتعينات والـ120 ألف والـ36 ألف معلم فقال مفيش تعيين لأن مفيش ميزانية ولا فلوس، وان التطوع بالتدريس ده شيء طبيعي جدا لأن بره الناس بتكون فخورة بالتطوع ومفيهوش إهانة للمعلمين ولا حاجة.
تعالوا بقى أقولكم قال ايه بخصوص مرتبات المدرسين، فقال انه مفروض يكونوا أعلى راتب في مصر بس مفيش فلوس.
قال كمان اننا في مصر بنصرف على الطالب 4 آلاف جنيه لكن في دولة زي فنلندا بيصرفوا على الطالب 400 ألف جنيه في السنة.
الوزير كمان انتقد تدخل أولياء الأمور في التعليم ووصف بإنه مش طبيعي وغير مبرر وإنهم مكبرين الموضوع، وقالهم سبولي الولاد أنا هعلمهم ومستقبلهم هيبقي أفضل..
هتيجي تسألني بقى الجلسة خلصت على ايه هقولك خلصت بشكل مش حلو نهائي.. الوزير اعترض على مقاطعة النواب ليه وقال مش هدخل في اللعبة دي
هوب رئيس المجلس اعترض احنا سلطة تشريعية ومعندناش لعب هوووب اترفعت الجلسة..