دفعه الثانوية العامة 2023 .. مهم جدا
ازاي تذاكر احياء وفيزياء وكيمياء
دعوه ليا وليكم ربنا معاكم ويوفقكم ومتشغلوش بالكم بحد لإني عارفه الضغط الي بيبقا عليكم واتمني لكل واحد/ه هنا يحقق حلمه/ا بالتوفيق للجميع
ازاي تذاكر احياء وفيزياء وكيمياء
- اول حاجه لازم تركز مع الي بيقوله المستر لإن الكيمياء والفيزياء والاحياء بتعتمد عالفهم مش الحفظ يعني لو فهمت هتحفظ بس تأكد ع حفظك
- تاني حاجه لو ليك صاحب بيفضل يقولك احنا مش هنجيب مجموع كويس احنا مش هندخل الي عاوزينه او صاحب بيكلمك عالطول فالحصه دا تقطع علاقتك بيه اصلا لأنه بيحبطك ومش هتعرف تركز مع المستر
- تالت حاجه والأهم لازم تكون بتصلي وبتدعي وبتقرأ قرأن واكيد ربنا هيباركلك ف مذاكرتك
- رابع حاجه ممكن تشرب فنجان قعوه او لبن عشان تركز وانت بذاكر بس مش كتير وممكن تاكل شكولاته جمبهم
- خامس حاجه لازم تكون مخلص الي وراك عشان وانت بتذاكر ماتفضلش تقول انا لسه معملتش كذا وكذا ومذا ومش هتعرف تركز ف مذاكرتك لان دماغك هتكون مركزه فالحاجات الي انت معملتهاش
- سادس حاجه متقولش كمان ساعه وابقي اذاكر او انا م شويه وبعدين ابقي اذاكر او العب عالموبايل شويه وبعدين اذاكر لا ياحبيبي الي بتعمله دا غلط جدا ومش هيفيدك ف حاجه
- سابع حاجه لازم يكون عندك ثقه ف نفسك وتكون عاليه اوي عشان محدش يهدها ف لحظه والثقه دي اهم حاجه الإنسان الي معندوش ثقه ف نفسه دا بيبقي انسان فاشل مش اكتر
- ثامن حاجه بعد ماتخلص مذاكره اعمل لنفسك مسائل وتعملها سهله ومش سهله اوي وصعبه وتشوف مستوى نفسك عامل ازاي وكمان لو حليت اكتر هتستفاد اكتر
دعوه ليا وليكم ربنا معاكم ويوفقكم ومتشغلوش بالكم بحد لإني عارفه الضغط الي بيبقا عليكم واتمني لكل واحد/ه هنا يحقق حلمه/ا بالتوفيق للجميع
واخيرا قد يمكنك الاطلاع على
فى البداية يجب أن تراعى النقاط الأتية :
1- انت جربت وشفت اسئلة النظام الجديد فى سنة أولى وسنة تانية وعلشان كدة متسمعش كلام حد مجربش النظام دا يعنى لو حد من النظام القديم قالك ذاكر بطريقة معينة قوله ان الطريقة دى متنفعش فى النظام الجديد
2- فى النظام الجديد ممكن تذاكر كتير لكن متعرفش تحل الأسئلة لأنك ذاكرت غلط
3- لما حد يقولك افهم متحفظش ممكن يكون ردك الطبيعى " يعنى اعمل ايه بالظبط " أنا عايز طريقة المذاكرة بالخطوات
4- ممكن يكون فى الكتاب المدرسى تعريف مثلا للجغرافيا السياسية وانت تقول ده حفظ مش فهم وأنا بقولك ان دا فهم مش حفظ فيكون ردك برضو ازاى
وعلشان كدة لازم تحدد مشكلتك فى النظام الجديد فى انك مش بتذاكر صح وانك محتاج تعرف ازاى تذاكر
وكمان لازم تبعد وتخلص نفسك من المعتقدات السلبية والخاطئة مثل :
1- انك مهما ذاكرت مش هتعرف تحل لأن أسئلة النظام الجديد معقدة وتعجيزية " وده مش صحيح "
2- ان النظام الجديد ممكن يتلغى " لا خلاص انت بقيت فيه فلازم تتعايش وتعود نفسك عليه "
3- انك طلعت من سنة أولى وسنة تانية متعرفش حاجة علشان كدة مش هتعرف حاجة فى سنة تالتة " لا برضو ده غلط ممكن تركز فى سنة تالتة بالطريقة الصح للمذاكرة "
والان اعرض عليكم ازاى تذاكروا بالطريقة الصحيحة وبنواتج التعلم الحقيقية :
1- شوف كل مادة وافهم المادة دى عايزة منك ايه لأن لكل مادة طريقة مذاكرة مختلفة فمثلا مذاكرة الجغرافيا والتاريخ تختلف عن الفيزياء والرياضيات
2- اقرأ الموضوع كويس وحاول انك تفهمه " طب ازاى " لو مثلا فى تعريف مكتوب فى التاريخ قوله انت باسلوبك العامى واديله أمثلة من الحياة واستنتج منه معلومات تانية
مثال : تعريف الجغرافيا السياسية هى فرع من فروع الجغرافيا البشرية يهتم بدراسة المقومات الطبيعية والبشرية للدولة وتأثير ذلك فى قوتها وعلاقاتها الدولية
نستنتج من هذا التعريف أن الجغرافيا السياسية :
- تتشابه مع فروع الجغرافيا البشرية وتختلف عن فروع الجغرافيا الطبيعية
- محور دراستها هو الدولة
- تركز فى الدولة على قوتها أو ضعفها
- لها علاقة بالعلوم الأخرى لأنها لن تستطيع تحديد قوة أو ضعف الدولة إلا بالاستعانة بالعلوم الأخرى التى تعطيها صورة كاملة عن الدولة
3- متذكرش بالورقة والقلم زى النظام القديم لكن ممكن تكتب ملاحظاتك – أو ملخص للدرس – أو معلومات اضافية بجانب معلومات الكتاب المدرسى
4- متحلش أسئلة على الدرس بالنظام القديم ومتسمعش أى شرح بالنظام القديم لأنه تعطيل لوقتك
5- حل أسئلة كتير للدرس على النظام الجديد وكل شوية ارجع لمعلومات الكتاب وضيف ليها كل ما تتوصل إليه من معلومات جديدة
6- قسم السؤال إلى أجزاء – واستنتج معلوماتك عن كل جزء – ثم اربط بينهما
7- لما تختار اختيار واجابة معينة لازم تقول انت اخترت الاجابة دى ليه ويا ريت كمان تدى أمثلة علشان تكون متأكد من اجابتك بالدليل " وده برضو هيزود معرفتك وفهمك للدرس "
8- لازم تكون عندك معلومات عن محتوى المادة نفسها ومصطلحاتها
مثال فى الجغرافيا : لازم تبقى فاهم يعنى ايه تضاريس – حدود – مناخ – نبات طبيعى – قارة – نشاط اقتصادى – وسائل نقل – وسائل اتصال – نهر دولى – أقلية .... وغيرها , وتكون عندك معلومات عن دول العالم وقاراتها
9- لازم تعمل باستمرار ربط بين معلومات الدروس كلها , وتستنتج معلومات جديدة وممكن تساعدك الأسئلة الجديدة فى دا عن طريق انك تجاوب عن سؤال واحد بمعلومات من دروس مختلفة
10- ناقش معلميك باستمرار وجادلهم فى المعلومات , واتكلم مع اصحابك عن معلوماتك الاضافية عن الدرس
وفى النهاية لا تقرأ هذا الكلام وتقول دا كلام صعب لأنه بالعكس أسهل كتير من الحفظ أنا عايزك تشوف الأسئلة الجديدة وتبحث وتناقش وتجادل فى الاجابات علشان فى الاخر تكون مقتنع بالاجابة , وكل ما تحل أسئلة أكتر وتناقشها معلومات هتزيد بالتدريج وهتلاقى أسئلة كتير ( مش هقول كلها ) أصبحت سهلة بالنسبة ليك
أما بالنسبة لسؤال " اعمل واذاكر ازاى فى ليلة الامتحان " دا سؤال سابق لأوانه وباذن الله لما تذاكروا وتفهموا السنة كلها ابقى اقولكم ان شاء الله تعملوا ايه فى ليلة الامتحان
والمهم انك تكون عارف ان النظام الجديد أصبح هو أساس التعليم فلو معرفتش تتعامل معاه بالطريقة بتاعه هتكون بتضيع وقتك ومجهودك على الفاضى
" ذاكر صح هتوفر مجهود , ذاكر صح هتعرف تحل الأسئلة الجديدة , ذاكر صح هتتفوق وتجيب درجات عالية باذن الله "
وتأكد أن لكل مجتهد نصيب , وأن الله لا يضيع أجر من أحسن عملا
مع أطيب تمنياتى لكم بالتوفيق
Mohamed Said
Mr.Riad2022-12-31, 11:49 am